ទេសរដ្ឋមន្ត្រី និងជាអនុប្រធានទី១ អាជ្ញាធរមីន បានលើកឡើងថា រដ្ឋាភិបាលមានការសោកស្តាយ និងព្រួយបារម្ភយ៉ាងខ្លាំងចំពោះការកើនឡើងនៃការគ្រោះថ្នាក់ដោយសារមីន និងសំណល់ជាតិផ្ទុះពីសង្គ្រាមដែលបានកើនឡើង១០០ភាគរយ នៅដើមឆ្នាំ២០១៩នេះ។
ទំព័រហ្វេសប៊ុកអាជ្ញាធរមីននៅថ្ងៃនេះ ដោយដកស្រង់ប្រសាសន៍ទេសរដ្ឋមន្ត្រី និង អនុប្រធានទី១ នៃអាជ្ញាធរមីន លោក លី ធុជ បានបង្ហាញក្តីបារម្ភនិងសោកស្តាយចំពោះអ្នករងគ្រោះដោយសារគ្រាប់មីន និងសំណល់ជាតិផ្ទុះនេះ ហើយលោកក៏ស្នើសុំឲ្យគ្រប់ប្រតិបត្តិករទាំងអស់បង្កើនការយកចិត្តទុកដាក់អប់រំការយល់ដឹងពីមីន និងស្នើសុំឲ្យនគរបាលជាតិផ្សព្វផ្សាយច្បាប់ស្តីពីគ្រប់គ្រងគ្រឿងផ្ទុះ និងគ្រាប់រំសេវ នៅតាមភូមិ ឃុំ។
ទំព័រហ្វេសប៊ុកស្រង់ប្រសាសន៍លោក លី ធុជ ៖ « កិច្ចប្រជុំនេះនឹងផ្តល់ជាវេទិកាដល់ប្រតិបត្តិករជាតិ-អន្តរជាតិ និងភាគីពាក់ព័ន្ធបង្ហាញពីសមិទ្ធផលដែលសម្រេចបាន ក៏ដូចជាដោះស្រាយបញ្ហាប្រឈមនានាដែលកំពុងកើតមានឡើងនៅក្នុងវិស័យសកម្មភាពមីនទាំងមូល និងលើកទិសដៅបន្តឈានទៅរកការអនុវត្តការងារប្រកបដោយប្រសិទ្ធភាពខ្ពស់ និងប្រសិទ្ធផល »។
គិតចាប់ពីខែមករា ដល់ថ្ងៃទី១៨ ខែមីនា ឆ្នាំ២០១៩នេះ មានជនរងគ្រោះស្លាប់ និងរបួសចំនួន ៣៥នាក់ បើប្រៀបធៀបរយៈពេលដូចគ្នាកាលពីឆ្នាំមុន គឺកើនឡើងស្ទើរតែ ១០០ ភាគរយ។
កន្លងមក សហរដ្ឋអាមេរិក ធា្លប់អះអាងថា ក្នុងរយៈពេល២០ឆ្នាំចុងក្រោយនេះ ខ្លួនបានចំណាយថវិកាជាង១៣១លានដុល្លារសំរាប់គម្រោងមនុស្សធម៌នៅកម្ពុជា ដើម្បីដោះមីន និងយុទ្ធភណ្ឌមិនទាន់ផ្ទុះដទៃទៀត ដែលសល់ពីជម្លោះផ្ទៃក្នុង និងជម្លោះក្នុងតំបន់កាលពីសម័យសង្គ្រោម។
យោងតាមរបាយការណ៍របស់អាជ្ញាធរមីនកម្ពុជាគិតត្រឹមខែវិច្ឆិកា ឆ្នាំ២០១៨ ជនរងគ្រោះដោយសារគ្រាប់មីននិងគ្រាប់មិនទាន់ផ្ទុះសរុបមានចំនួនជាង៦ម៉ឺននាក់(៦៤ ៧៧១) ក្នុងនោះជិត២ម៉ឺននាក់ត្រូវបានស្លាប់ និងមានជាង៤ម៉ឺននាក់ទៀតពិការ៕
