ក្រសួងពាណិជ្ជកម្ម បានស្នើដល់រដ្ឋាភិបាលចិនក្នុងការបង្កើតកម្មវិធីទូរស័ព្ទ WeChat ជាភាសាខ្មែរ ដោយថា ដើម្បីពង្រឹងពាណិជ្ជកម្មអេឡិចត្រូនិចនៅកម្ពុជា និងទប់ស្កាត់ព័ត៌មានក្លែងក្លាយ។
យោងតាមការផ្សាយក្នុងទំព័រហ្វេសប៊ុកក្រសួងពាណិជ្ជកម្ម កាលពីម្សិលមិញ ក្នុងជំនួបជាមួយអនុប្រធានមូលនិធិហ្សិនចិន សម្រាប់កិច្ចសហប្រតិបត្តិការអន្តរជាតិ លោកស្រី តៅ យីតៅ រដ្ឋមន្ត្រីក្រសួងពាណិជ្ជកម្មលោក ប៉ាន សូរស័ក្កិ មានប្រសាសន៍ថា កម្មវិធីទូរស័ព្ទដៃ WeChat ជាភាសាខ្មែរនេះ នឹងផ្ដល់ឲ្យអ្នកប្រើប្រាស់អាចទូទាត់ការចំណាយតាមប្រព័ន្ធអេឡិចត្រូនិកដោយប្រើប្រាស់បាកូដ និងអាចទប់ស្កាត់ព័ត៌មានក្លែងក្លាយនៅលើប្រព័ន្ធអ៊ីនធឺណិតផងដែរ។
អនុប្រធានសមាគមបណ្ដាញយុវជនកម្ពុជា លោក ស ម៉ូរី ស្វាគមន៍ចំពោះការយកបច្ចេកវិទ្យាថ្មីៗដើម្បីសម្រួលដល់ទំនាក់ទំនង និងពាណិជ្ជកម្មរបស់ពលរដ្ឋ។ ប៉ុន្តែ លោកស្នើដល់រដ្ឋាភិបាលគួរមានវិធានការដើម្បីការពារទិន្នន័យ និងភាពឯកជនរបស់អ្នកប្រើប្រាស់នៅកម្ពុជា ខណៈលោកលើកឡើងពីកម្មវិធីនេះ ដែលបានប្រើប្រាស់នៅប្រទេសចិនត្រូវបានគ្រប់គ្រងទាំងស្រុងដោយរដ្ឋាភិបាលទៅលើទិន្នន័យរបស់ពលរដ្ឋខ្លួន។
លោកថា៖ «សម្រាប់ករណីនៅស្រុកខ្មែរ ខ្ញុំមិនទាន់មានព័ត៌មានច្បាស់ទេ តែបើសិនជាមានការប្រើប្រាស់ WeChat នៅស្រុកខ្មែរតាមរយៈជំនួយបច្ចេកទេសពីចិន ខ្ញុំយល់ថា រដ្ឋាភិបាល និងភាគីពាក់ព័ន្ធត្រូវធានាថា ទិន្នន័យរបស់អ្នកប្រើប្រាស់នោះ គឺត្រូវបានការពារឲ្យមានសុវត្ថិភាពបំផុត។ ព្រោះច្បាប់អន្តរជាតិនៅក្នុងកតិកាសញ្ញាអំពីសិទ្ធិពលរដ្ឋ និងសិទ្ធិនយោបាយ គឺបានធានានូវសិទ្ធិមនុស្សគ្រប់រូប ហើយរដ្ឋាភិបាលកម្ពុជាក៏បានផ្ដល់សច្ចាប័នដែរ អញ្ចឹងសិទ្ធិនោះគឺត្រូវបានការពារទាំងក្រៅ និងក្នុងលំហបច្ចេកវិទ្យាដូចគ្នា»។
អ្នកនាំពាក្យក្រសួងពាណិជ្ជកម្ម លោក ឡុង កែមវិចិត្រ មានប្រសាសន៍បញ្ជាក់បន្ថែមថា អ្វីដែលរដ្ឋមន្ត្រីស្នើសុំនេះគឺគ្រាន់តែជាការចាប់ផ្ដើមក្នុងការយកបច្ចេកវិទ្យា ដើម្បីសម្រួលពាណិជ្ជកម្មតាមអេឡិចត្រូនិចកម្ពុជាប៉ុណ្ណោះ។ លោកបន្ថែមថា ប្រសិនជាមានការវិវត្តជាវិជ្ជមានបន្ថែមទៀតនោះក្រសួងនឹងភាគីពាក់ព័ន្ធ នឹងពិនិត្យផងដែរដើម្បីធានាដល់សិទ្ធិរបស់ពលរដ្ឋ។
លោកថា៖ «WeChat ឬក៏សេវាដទៃទៀតដែលក្រុមហ៊ុននោះបានផ្ដល់ឲ្យនៅក្នុងប្រទេសកម្ពុជាគឺមានអ្វីដែលខ្ញុំបានជម្រាបជូនអម្បាញ់មិញ។ អញ្ចឹង មិនមែនថា យកគាត់មកហើយយើងអត់មើលតាមដាននោះទេ ព្រោះនេះជាអ្វីដែលយើងគួរតែតាមដានផងដែរ » ។
ទោះជាយ៉ាងណាក្នុងជំនួបកាលពីម្សិលមិញ គណៈប្រតិភូចិននៅមិនទាន់មានការឆ្លើយតបជាវិជ្ជមាននៅឡើយទេ ដោយថា យកទៅពិភាក្សាជាមួយក្រុមហ៊ុនដែលបង្កើតកម្មវិធីទូរស័ព្ទនេះសិន។
កម្មវិធី WeChat ជាបណ្ដាញទំនាក់ទំនងសង្គមរបស់រដ្ឋាភិបាលចិន ដែលវាមានមុខងារស្រដៀងគ្នាទៅនឹងបណ្ដាញទំនាក់ទំនងសង្គមផ្សេងទៀតផងដែរ តែវាអាចឲ្យអ្នកប្រើប្រាស់អាចប្រតិការចំណូលចំណាយពាណិជ្ជកម្មតាមប្រព័ន្ធអ៊ីនធឺណិតបាន។
ក្នុងរបាយការណ៍ចេញផ្សាយកាលពីឆ្នាំ២០១៦ របស់អង្គការ Amnesty អន្តរជាតិបានរកឃើញថា កម្មវិធីទូរស័ព្ទ WeChat នេះមិនបានការពារសិទ្ធិរបស់អ្នកប្រើប្រាស់នោះទេ ដោយក្នុងនោះរាប់ចាប់ពីការអនុញ្ញាតឲ្យភាគីទី៣ចូលមើលសារទំនាក់ទំនងរបស់អ្នកប្រើប្រាស់បាន និងការអនុញ្ញាតឲ្យរដ្ឋាភិបាលអាចសុំទិន្នន័យរបស់អ្នកប្រើប្រាស់បានដោយសំងាត់ផងដែរ៕
