លោកនាយករដ្ឋមន្ត្រី ហ៊ុន សែន បានព្រមានដកតំណែងមេប៉េអឹមខេត្តក្រចេះ ក្រោយពីកូនប្រុសរបស់មន្ត្រីអាវុធហត្ថរូបនេះ ត្រូវបានចោទថា បានដកកាំភ្លើងគំរាមពលរដ្ឋ។
ថ្លែងក្នុងពិធីប្រគល់សញ្ញាបត្រដល់និស្សិតសាកលវិទ្យាល័យភ្នំពេញអន្តរជាតិ (PPIU) នៅព្រឹកនេះ លោកនាយករដ្ឋមន្រ្តី ហ៊ុន សែន បានផ្ដាំផ្ញើទៅកាន់មេបញ្ជាការអាវុធហត្ថខេត្តក្រចេះ ឲ្យបញ្ចុះបញ្ចូលកូនប្រុសដែលដកកាំភ្លើងគំរាមពលរដ្ឋនៅខេត្តកំពង់ចាម ចូលមកដោះស្រាយនៅតុលាការ បើមិនចង់បាត់បង់តួនាទី។
លោក ហ៊ុន សែន មានប្រសាសន៍ថា៖ «ផ្តាំទៅមេប៉េអឹមខេត្តក្រចេះផង! បញ្ចុះបញ្ចូលកូនឲ្យមកតាមការកោះហៅរបស់ព្រះរាជអាជ្ញាខេត្តកំពង់ចាមមក! វាអត់ទាន់មានរឿងអីទេ ប៉ុន្តែ បើសិនស្រឡាញ់កូនពេក អ្នកនឹងអស់ស័ក្តិ។ ខ្ញុំអត់ធ្វើអីទេ ខ្ញុំគ្រាន់តែដកស័ក្តិបណ្តេញចោលតែប៉ុណ្ណឹង»។
លោក សាន្ត សុខុម ដែលជាមន្ត្រីអាវុធហត្ថខេត្តកំពង់ចាមឋានន្តរស័ក្តិវរសេនីយ៍ត្រី និងជាកូនប្រុសបង្កើតរបស់លោកឧត្តមសេនីយ៍ត្រី សាន្ត ប៊ុនថាន មេបញ្ជាការកងរាជអាវុធហត្ថខេត្តក្រចេះនោះ ត្រូវបានតុលាការខេត្តកំពង់ចាមកោះហៅឲ្យចូលទៅបំភ្លឺ ក្រោយពីត្រូវបានប្រជាពលរដ្ឋនៅខេត្តកំពង់ចាមប្ដឹងថា បានប្រើអំពើហិង្សាដោយចេតនា និងគំរាមកំហែងបាញ់សម្លាប់នៅក្នុងជម្លោះមួយកាលពីសប្ដាហ៍មុន។
វីដេអូកាមេរ៉ាសុវត្ថិភាពមួយ បានបង្ហាញបុរសម្នាក់ស្ថិតក្នុងសម្លៀកបំពាក់ស៊ីវិល បានដកកាំភ្លើងភ្ជង់ និងវាយទៅលើបុរសម្នាក់ទៀត នៅឯហាងបម្រើសេវាអ៊ីនធឺណិតមួយកន្លែង ស្ថិតក្នុងខេត្តកំពង់ចាម៕
