មេនគរបាលរាជធានីភ្នំពេញ លោក ស ថេត ព្រមានបណ្ដេញមន្ត្រីនគរបាលដែលពាក់ព័ន្ធនឹងថ្នាំញៀនចេញពីក្របខណ្ឌនគរបាលជាតិ ហើយថា នឹងដាក់មន្ត្រីនគរបាលទាំងអស់ឲ្យស្ថិតក្រោមការត្រួតពិនិត្យទឹកនោម។
ស្នងការនគរបាលរាជធានីភ្នំពេញ លោក ស ថេត បានព្រមានបែបនេះនៅលើទំព័រហ្វេសបុករបស់លោកនៅព្រឹកនេះ ដោយបានហាមមន្ត្រីនគរបាលរាជធានីទាំងអស់មិនឲ្យពាក់ព័ន្ធនឹងគ្រឿងញៀន។
លោកសរសេរថា៖ «នៅពេលគោរពទង់ជាតិ ខ្ញុំក៏បានលើកឡើងអំពីការវិវត្តន៍សភាពថ្មីៗនៅក្នុងប្រទេស និងក្រៅប្រទេសដល់កងកម្លាំង ហើយខ្ញុំក៏បានប្រកាសថា មន្ត្រីនគរបាលដាច់ខាតមិនត្រូវពាក់ព័ន្ធនឹងគ្រឿងញៀន ហើយនៅពេលខាងមុខ នឹងធ្វើតេស្តទឹកនោម ប្រសិនបើរកឃើញមន្រ្តីណាមានសារធាតុញៀន នឹងបណ្ដេញចេញពីក្របខណ្ឌ»។
លោក ស ថេត បានថ្លែងប្រាប់ VOD បន្ថែមថា ការព្រមាននេះ គឺជាការរំលឹកដល់មន្ត្រីនគរបាលរាជធានីទាំងអស់ ឲ្យមានការប្រុងប្រយ័ត្នចំពោះគ្រឿងញៀន ខណៈមន្ត្រីទាំងនោះក្រៅពីដេញចេញហើយ នឹងត្រូវសម្រេចបញ្ជូនទៅមណ្ឌលបន្សាបគ្រឿងញៀនផងដែរ។
លោកថា៖ «ចុះញៀនមានអីប្រសិនជាគាត់ស្ម័គ្រចិត្តគាត់អាចទៅព្យាបាលនៅមណ្ឌលបានតើ។ វាមិនមែនជាការជួញដូរទេអ្នកញៀនគឺជាជនរងគ្រោះ។ បើសិនជាយើងរកឃើញគាត់អាចស្ម័គ្រចិត្តខ្លួនគាត់ ឬក៏អាណាព្យាបាលយកទៅព្យាបាលនៅមណ្ឌលទៅ»។
ទីប្រឹក្សាកម្មវិធីអភិវឌ្ឍន៍ធនធានយុវជនកម្ពុជា លោក ឈាង សុខា មានជំនឿតិចតួចប៉ុណ្ណោះចំពោះវិធានការណ៍ថ្មីនេះ ដោយសារការអនុវត្តន៍វិធានការកាលពីកន្លងទៅគឺច្រើនតែខុសពីការលើកឡើង។
លោកថា៖ «បើសិនជាឃើញហើយមិនត្រូវរើសមុខទេ បើឃើញហើយកូនអ្នកណាក៏ដោយខ្សែអ្នកណាក៏ដោយ គឺយើងធ្វើឲ្យអស់លទ្ធភាពដើម្បីបង្ហាញពីតម្លាភាពទៅមហាជន ហើយបើធ្វើបែបនេះបានវាជារឿងមួយល្អ ដែលជាគំរូភាពមួយល្អហើយពលរដ្ឋក៏ចាប់ផ្ដើមមានទំនុកចិត្តជាមួយរដ្ឋាភិបាលដែរ។ គ្រាន់តែថាជាទូទៅយើងឃើញហើយថាវាកម្រណាស់អ្វីដែលបាននិយាយបានត្រឹមនិយាយ តែដល់ធ្វើមិនធ្វើដូចការនិយាយដែលធ្វើឲ្យពលរដ្ឋគាត់អស់សង្ឃឹមដែរនិយាយឲ្យស្មោះត្រង់ទៅ»។
កាលពីថ្ងៃទី២១ មីនា រដ្ឋមន្ត្រីក្រសួងមហាផ្ទៃលោក ស ខេង បានជំរុញដល់មន្ដ្រីទាំងអស់ចូលរួមទប់ស្កាត់បង្ក្រាបការចរាចរណ៍ និងប្រើប្រាស់គ្រឿងញៀន ខណៈលោកក៏ព្រមានផងដែរទៅលើមន្ត្រីណាដែលហ៊ានចេញមុខអន្តរាគមន៍ការអនុវត្តន៍របស់មន្ត្រីជំនាញគ្រឿងញៀន។
ក្នុងឆ្នាំ២០១៨ កម្ពុជាបង្ក្រាបបទល្មើសគ្រឿងញៀនបានជាង ៨ពាន់ករណី ក្នុងនោះឃាត់ខ្លួនជនសង្ស័យ បានជាង ១ម៉ឺន ៦ពាន់នាក់ ក្នុងនោះស្រី ១,៣៣៣នាក់៕