មន្ត្រីនគរបាលម្នាក់មកពីខេត្តត្បូងឃ្មុំ បានសម្រេចប្ដឹងសន្តិសុខ ២រូបនៅក្នុងខណ្ឌដូនពេញ ដោយចោទថា បានប្រើអំពើហិង្សាលើរូបលោកអំឡុងពេលលោកធ្វើដំណើរមករាជធានីភ្នំពេញ។
មន្ត្រីនគរបាលចរាចរណ៍ណ៍នៃស្នងការដ្ឋាននគរបាលខេត្តត្បូងឃ្មុំ លោក សួន បូណា បានអះអាងថា រូបលោកបានរងរបួសបែកក្បាល ក្រោយពីរងអំពើហិង្សាពីសំណាក់សន្តិសុខ ២រូបនៅក្នុងខណ្ឌដូនពេញ កាលពីថ្ងៃអាទិត្យចុងសប្ដាហ៍កន្លងមកនេះ។
មន្ត្រីនគរបាលរូបនេះ បញ្ជាក់ថា សន្តិសុខខណ្ឌដូនពេញទាំង ២រូបដែលប្រើអំពើហិង្សាលើរូបលោកមានម្នាក់ឈ្មោះ រដ្ឋ និងម្នាក់ទៀត ឈ្មោះ សូ សុផល។
លោកមានប្រសាសន៍ថា៖ «ខ្ញុំក៏ជានគរបាលចរាចរណ៍មួយរូបដែរ ខ្ញុំក៏ធ្លាប់រៀបចំសណ្តាប់ធ្នាប់ជូនសង្គមដែរ ហើយក៏ធ្វើការជូនជាតិដែរ។ ការបញ្ចៀសចរាចរណ៍ ការរៀបចំសណ្តាប់ធ្នាប់ចរាចរណ៍ យើងគ្រាន់តែប្រាប់តៃកុងឡានឱ្យគាត់ដូរគោលដៅពីកន្លែងដែលគាត់ឈប់ហ្នឹង ឱ្យគាត់ទៅមុខទៅ កុំមានការប្រើហិង្សា ឬមានអី។ ទោះជារូបភាពណាមួយក៏ដោយ សុំកុំឱ្យមានការប្រើអំពើហិង្សាទៅលើមនុស្ស»។
ស្នងការនគរបាលខេត្តត្បូងឃ្មុំ បានលើកសរសើរពីគុណធម៌របស់លោក សួន បូណា នៅលើទំព័រហ្វេសប៊ុករបស់ស្ថាប័ននេះផ្ទាល់ ក្រោយពីលោកបានដឹកយាយតា ២នាក់ពីខេត្តត្បូងឃ្មុំ មកកាន់រាជធានីភ្នំពេញដោយមិនយកកំរៃ ប៉ុន្តែ ថា លោក បូណា ត្រូវបានសន្តិសុខខណ្ឌដូនពេញវាយឲ្យបែកក្បាល និងជំរិតទារប្រាក់ ៥ម៉ឺនរៀល។
ក្រោយកើតហេតុមួយថ្ងៃ មន្ត្រីនគរបាលរូបនេះ ក៏បានដាក់ពាក្យបណ្តឹងទៅនាយកដ្ឋាននគរបាលព្រហ្មទណ្ឌ ប្តឹងសន្តិសុខទាំងពីរនាក់ និងបក្ខពួក ពីបទហិង្សាដោយចេតនាមានស្ថានទម្ងន់។
អភិបាលខណ្ឌដូនពេញ លោក សុខ ពេញវុធ បានទទួលស្គាល់ថា ពិតជាមានករណីនេះកើតឡើងមែន ហើយថា បណ្ដាលមកពីមន្ត្រីនគរបាលរូបនោះ ឈប់ដាក់អ្នកដំណើរនៅកន្លែងហាមឃាត់ ដោយមិនព្រមចេញ ខាងកងសន្តិសុខមានបំណងឃាត់យកមកអប់រំនៅសាលាខណ្ឌ។
យ៉ាងនេះក្តី លោកបានបញ្ជាឱ្យកងសន្តិសុខទាំងនោះចូលបំភ្លឺនៅនាយកដ្ឋាននគរបាលព្រហ្មទណ្ឌនាថ្ងៃនេះ ប៉ុន្តែ លោកច្រានចោលការលើកឡើងថា សន្តិសុខរបស់លោកជំរិតទារប្រាក់ពីមន្ត្រីរូបនោះ។
លោកមានប្រសាសន៍ថា៖ «ជំរិតយកលុយប្រាំម៉ឺន ជារឿងចោទប្រកាន់ហើយ គ្មានការពិតទេរឿងហ្នឹង ហើយខ្ញុំឱ្យប្រជាការពារចូលបំភ្លឺនៅនាយកដ្ឋានបទល្មើសព្រហ្មទណ្ឌនៅក្រសួងមហាផ្ទៃហើយ។ ខ្ញុំជាអ្នកឱ្យចូលបំភ្លឺផ្ទាល់ ព្រោះខ្ញុំក៏មិនគាំទ្រដែរ ប្រសិនបើមានអំពើល្មើសច្បាប់ ប៉ុន្តែ នេះខ្ញុំជឿថា អាចជាការយល់ច្រឡំ ឬជាការចោទប្រកាន់គ្នាទៅវិញទៅមក»។
ប្រធានការិយាល័យផ្នែកអង្កេតនៃអង្គការលីកាដូ អំ សំអាត ដែលធ្លាប់ត្រូវបានកងសន្តិសុខខណ្ឌដូនពេញវាយដំយ៉ាងដំណំកាលពីចុងឆ្នាំ២០១៦ ដែរនោះ មានប្រសាសន៍ថា វប្បធម៌និទណ្ឌភាព និងការលើកទឹកចិត្តដល់អ្នកប្រើអំពើហិង្សានោះហើយ ដែលនាំឱ្យបញ្ហានេះនៅតែកើតមានឡើង។
លោក សំអាត បន្ថែមថា ចំណាត់ការផ្លូវច្បាប់ពិតប្រាកដទៅលើក្រុមសន្តិសុខខណ្ឌដូនពេញដែលប្រើអំពើហិង្សាទៅលើមន្ត្រីចរាចរណ៍ពេលនេះ នឹងក្លាយជាគំរូមួយឈានទៅកាត់បន្ថយការប្រើប្រាស់ហិង្សាទៅលើពលរដ្ឋពីសំណាក់កងកម្លាំង ឬកងសន្តិសុខផងដែរ។
លោក អំ សំអាត មានប្រសាសន៍ថា៖ «ប្រសិនបើមានការអនុវត្តច្បាប់ឱ្យបានត្រឹមត្រូវ ហើយអ្នកដែលប្រើប្រាស់អំពើហិង្សាត្រូវទទួលទោសទៅតាមផ្លូវច្បាប់ អាហ្នឹងវាជាគំរូមួយល្អនៃការប្រើប្រាស់អំពើហិង្សាពីសំណាក់កងសន្តិសុខហ្នឹង ហើយក៏ជាគំរូសម្រាប់អ្នកក្រោយហ្នឹង គាត់មានការគិតពិចារណា មុននឹងប្រើអំពើហិង្សា ព្រោះកាលណាប្រើប្រាស់អំពើហិង្សាខ្លួនត្រូវប្រឈមុខចំពោះមុខច្បាប់ ប្រឈមមុខនឹងការជាប់ពន្ធនាគារ»។
កងសន្តិសុខខណ្ឌដូនពេញ ចូលរួមក្នុងការបង្ក្រាបលើការប្រមូលផ្ដុំ ឬបាតុកម្មនានា ជាពិសេសការតវ៉ារបស់សកម្មជនដីធ្លី ពិធីជួបជុំ និងដង្ហែក្បួនរបស់សកម្មជនសិទ្ធិមនុស្ស កម្មករ និងក្រុមបក្សប្រឆាំង។
សកម្មជនសិទ្ធិមនុស្ស លោក អំ សំអាត ផ្ទាល់ បានរងការវាយដំពីសំណាក់កងកម្លាំងសន្តិសុខខណ្ឌដូនពេញ កាលពីខែតុលា ឆ្នាំ២០១៦កន្លងមក អំឡុងពេលលោក និងក្រុមសកម្មជនដីធ្លី បានប្រារព្ធទិវាសិទ្ធិលំនៅឋានអន្តរជាតិ៕
