របាយការណ៍របស់អង្គការអន្តរជាតិមួយ បានវាយតម្លៃសេរីភាពនៃអង្គការសង្គមស៊ីវិលនៅកម្ពុជាស្ថិតក្នុងកម្រិតមួយដែលរងការបង្ក្រាបពីរដ្ឋាភិបាល រាប់ចាប់តាំងពីការចោទប្រកាន់ និងការប្រើប្រាស់ច្បាប់ប្រឆាំងសង្គមស៊ីវិល និងប្រព័ន្ធផ្សព្វផ្សាយ។
ក្នុងរបាយការណ៍របស់សម្ព័ន្ធភាពសង្គមស៊ីវិលសកល (CIVICUS) ដែលបានចេញផ្សាយក្នុងខែមីនានេះ ចែកចំណាត់ថ្នាក់សេរីភាពសង្គមស៊ីវិលក្នុងប្រទេសចំនួន ១៩៥ ទូទាំងពិភពលោក ជា ៥ចំណាត់ថ្នាក់ដែលរួមមាន ចំណាត់ថ្នាក់សេរីភាពពេញលេញ តូចចង្អៀត ការរាំងខ្ទប់ បង្ក្រាប និងចំណាត់ថ្នាក់គ្មានសេរីភាពទាល់តែសោះ ក្នុងនោះកម្ពុជាត្រូវបានគេវាយតម្លៃស្ថិតក្នុងចំណាត់ថ្នាក់ដែលសង្គមស៊ីវិលរងការបង្ក្រាបពីរដ្ឋាភិបាល។
របាយការណ៍ដដែលនោះ បានលើកឡើងថា ចាប់តាំងពីការបោះឆ្នោតឆ្នាំ២០១៨មក ការធ្វើសកម្មភាពរបស់សង្គមស៊ីវិលនៅកម្ពុជា ត្រូវបានរារាំង ដែលធ្វើឲ្យសង្គមស៊ីវិលមានលំហសេរីភាពតិចបំផុត ហើយសង្គមស៊ីវិលមួយចំនួន ក៏រងនូវការគំរាមកំហែងពីការប្រើច្បាប់ដោយរដ្ឋាភិបាលផងដែរ។
ក្នុងរបាយការណ៍នោះសរសេរថា៖ «ចំនួនច្បាប់ និងបទបញ្ជា ត្រូវបានប្រើប្រាស់ប្រឆាំងសង្គមស៊ីវិល រួមមានច្បាប់អង្គការសង្គមស៊ីវិល ច្បាប់ប្រឆាំងអំពើពុករលួយ និងច្បាប់ពន្ធដារជាដើម។ ការប្រើប្រាស់អង្គភាពប្រឆាំងអំពើពុករលួយប្រឆាំងសកម្មជនសង្គមស៊ីវិល ការបិទប្រព័ន្ធផ្សព្វផ្សាយ និងទម្រង់ផ្សេងៗនៃការបំភិតបំភ័យ បានបន្ថែមការដាក់កំហិតទៅលើការប្រតិបត្តិរបស់សង្គមស៊ីវិលផងដែរ»។
VOD មិនអាចទាក់ទងអ្នកនាំពាក្យក្រសួងយុត្តិធម៌ លោក ជិន ម៉ាលីន និងអ្នកនាំពាក្យក្រសួងមហាផ្ទៃ លោក ផាត សុផានិត បាននៅឡើយទេ។
ទោះជាយ៉ាងណា កាលពីដើមឆ្នាំនេះ រដ្ឋមន្ត្រីក្រសួងមហាផ្ទៃ លោក ស ខេង បានលើកឡើងថា គ្មានសង្គមស៊ីវិលណាមួយត្រូវបានរដ្ឋាភិបាលចាត់ចូលក្នុងបញ្ជីខ្មៅ ឬធ្វើទុក្ខបុកម្នេញនោះទេ ខណៈលោកអះអាងថា វិធានការកាលពីកន្លងទៅរបស់រដ្ឋាភិបាល គឺជាការអនុវត្តច្បាប់ និងពង្រឹងនីតិរដ្ឋតែប៉ុណ្ណោះ។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា មានប្រសាសន៍ថា ទោះបីជាមានការធានាអះអាងពីថ្នាក់ដឹកនាំរដ្ឋក៏ដោយ តែលោកសង្កេតឃើញថា បញ្ហានេះនៅតែកើតមាននៅឡើយ។
សកម្មជនសិទ្ធិមនុស្សរូបនេះ បានស្នើឲ្យរដ្ឋាភិបាលគួរទទួលយករបាយការណ៍នេះមកពិនិត្យ ដើម្បីឲ្យដឹងពីអ្វីដែលគេរិះគន់ និងកែសម្រួលផងដែរ។
លោក ស៊ឹង សែនករុណា ប្រាប់ថា៖ « ខេត្តមួយចំនួនមិនបានគោរពតាមសេចក្ដីណែនាំរបស់ក្រសួងមហាផ្ទៃទេ ហើយឃើញថា អាជ្ញាធរឃុំអាជ្ញាធរប៉ូលិសនៅមូលដ្ឋានអីហ្នឹង តែងតែធ្វើទុក្ខបុកម្នេញសមាជិកអង្គការខាងខ្ញុំ ដែលចុះបំពេញការងារ តែងតែមានការកោះហៅពីមន្ត្រីប៉ូលិសទៅសាកសួរ មានជនស៊ីវិលទៅជ្រៀតជ្រែកពេលដែលយើងបំពេញការងារជាដើម»។
កាលពីចុងឆ្នាំ២០១៨កន្លងទៅ រដ្ឋាភិបាលបានបង្កើតគណៈកម្មាធិការមួយដើម្បីគ្រប់គ្រង និងធានាការអនុវត្តច្បាប់សមាគម និងអង្គការបរទេសដែលធ្វើការនៅកម្ពុជា ខណៈសង្គមស៊ីវិលចាត់ទុកវិធានថ្មីនេះជាការគំរាមកំហែងមួយទៀតលើក្រុមអង្គការសង្គមស៊ីវិល ដែលធ្វើការជំរុញឲ្យមានការគោរពសិទ្ធិមនុស្ស និងប្រជាធិបតេយ្យក្នុងប្រទេសកម្ពុជា។
របាយការណ៍របស់ក្រសួងមហាផ្ទៃឲ្យដឹងថា អង្គការសមាគមដែលបានចុះបញ្ជីនៅក្រសួងមហាផ្ទៃរហូតមកដល់ពេលនេះមានចំនួន ៥ ៣៦៣ អង្គការ នៅក្នុងនោះសមាគមមានចំនួន ២,១៧៩ និងអង្គការមិនមែនរដ្ឋាភិបាលចំនួន ៣ ១៤៩៕