មន្ត្រីជាន់ខ្ពស់ផ្នែកចរាចរណ៍ ឲ្យដឹងថា មនុស្សដល់ទៅជាង ២០០នាក់ ស្លាប់ ហើយជាង ៥០០នាក់ទៀត បានរងរបួសក្នុងគ្រោះថ្នាក់ចរាចរណ៍ជិត ៤០០ករណីនៅក្នុងខែមីនាកន្លងមកនេះ ជាអត្រាស្លាប់ខ្ពស់បំផុត បើធៀបនឹងតួលេខ ២ខែទៀតក្នុងឆ្នាំនេះ។
ថ្លែងក្នុងសន្និសីទសារព័តមានស្តីពីទិដ្ឋភាពច្បាប់ និងវិធានការទប់ស្កាត់គ្រោះថ្នាក់ចរាចរណ៍នៅទីស្តីការគណៈរដ្ឋមន្ត្រីព្រឹកនេះ ប្រធាននាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ លោក រុន រ័ត្នវាសនា បានឲ្យដឹងថា មនុស្សដល់ទៅ ២០៣នាក់ បានស្លាប់ និង៥១៥នាក់ទៀត បានរងរបួស នៅក្នុងគ្រោះថ្នាក់ចរាចរណ៍ ៣៨៣ករណី នៅទូទាំងប្រទេស នៅក្នុងខែមីនាកន្លងមកនេះ ជាតួលេខខ្ពស់ជាងតួលេខអ្នកស្លាប់ក្នុងគ្រោះថ្នាក់ចរាចរណ៍នៅក្នុងខែកុម្ភៈ និងខែមករាកន្លងមកទៅទៀត។
មន្ត្រីនគរបាលរូបនេះ ឲ្យដឹងទៀតថា មនុស្សស្លាប់ក្នុងគ្រោះថ្នាក់ចរាចរណ៍នៅក្នុងខែកុម្ភៈ មានចំនួនជាង ១៥០នាក់ និងខែមករាកន្លងមកមានចំនួន ១៤៨នាក់ប៉ុណ្ណោះ។
បើតាមមន្ត្រីនគរបាលរូបនេះ យ៉ាងហោចណាស់មនុស្ស ៥នាក់ បានស្លាប់នៅក្នុងគ្រោះថ្នាក់ចរាចរណ៍ក្នុងមួយថ្ងៃនៅខែមករា និងខែកុម្ភៈ ប៉ុន្តែ អត្រាចំនួនអ្នកស្លាប់ជាមធ្យមក្នុងមួយថ្ងៃ បានកើនឡើងដល់ ១១នាក់នៅក្នុងខែមីនាកន្លងមកនេះ។
លោក រុន រ័ត្នវាសនា មានប្រសាសន៍ថា៖ «គ្រោះថ្នាក់ចរាចរណ៍នេះនៅតែជាកង្វល់! មិនអាចតែនគរបាលមួយមុខធ្វើបានទេ វាទាល់តែមានការផ្សព្វផ្សាយ។ ពេលនេះ យើងផ្សព្វផ្សាយគ្រប់ទូរទស្សន៍ គ្រប់សារព័ត៌មាន គ្រប់វេបសាយ វិទ្យុមួយចំនួន ប៉ុន្តែ ការផ្សព្វផ្សាយយ៉ាងណាក៏ដោយនៅតែមិនគ្រប់គ្រាន់។ វាមានតែការផ្សព្វផ្សាយតៗគ្នា ដែលល្អជាងវិទ្យុ ទូរទស្សន៍នេះឯង!»។
មន្ត្រីនគរបាលរូបនេះ បានបន្ទោសបញ្ហាគ្រោះថ្នាក់ចរាចរណ៍ទៅលើការបើកបររបស់មនុស្ស ដូចជា បើកបរក្នុងល្បឿនលឿន មិនគោរពសិទ្ធិ មិនប្រកាន់ស្ដាំ បើកបរជែងប្រកបដោយគ្រោះថ្នាក់ បើកបរក្រោមឥទ្ធិពលនៃគ្រឿងស្រវឹងជាដើម។
អនុប្រធានវិទ្យាស្ថានសុវត្ថិភាពចរាចរណ៍ លោក គង់ រតនៈ សម្តែងការបារម្ភពីកំណើនមនុស្សស្លាប់ក្នុងគ្រោះថ្នាក់ចរាចរណ៍នេះ និងថា ឥរិយាបថអ្នកប្រើប្រាស់ផ្លូវនៅតែមិនមានការកែប្រែ ដោយលោកជំរុញឲ្យសមត្ថកិច្ចរឹតបន្តឹងការអនុវត្តច្បាប់។
លោក គង់ រតនៈ មានប្រសាសន៍ថា៖ «ប្រជាពលរដ្ឋហ្នឹង គាត់ដូចជាមិនកែប្រែឥរិយាបថទេ បើទោះជាមានការអប់រំផ្សព្វផ្សាយ។ អាចថា គាត់មាន តែមិនសមធ្វើតាម។ អញ្ចឹង ដល់ដំណាក់កាលនេះ គឺមានតែយើងសំណូមពរឲ្យសុំឲ្យអាជ្ញាធរមានសមត្ថកិច្ច គាត់រឹតបន្តឹងច្បាប់ឲ្យបានតឹង ហើយសុំធ្វើឲ្យបានច្រើនកន្លែង ធ្វើឲ្យបានទៀតទាត់»។
លោក រុន រ័ត្នវាសនា រំលឹកឲ្យដឹងទៀតថា គ្រោះថ្នាក់ចរាចណ៍នៅឆ្នាំ២០១៨ បានសម្លាប់មនុស្សចំនួន ១ ៧៦១នាក់ ដែលចំនួននោះមានការថយចុះអ្នកស្លាប់ ១៩នាក់ពីឆ្នាំ២០១៧៕