មន្ត្រីជាន់ខ្ពស់ក្រសួងពាណិជ្ជកម្ម លើកឡើងថា តម្លៃប្រេងសាំងនៅកម្ពុជាឡើងថ្លៃ គឺមកពីចរន្តតម្លៃប្រេងនៅលើទីផ្សារអន្តរជាតិ។
ក្នុងសេចក្តីជូនដំណឹងរបស់ក្រសួងពាណិជ្ជកម្មដែលចេញកាលពីម្សិលមិញ ចាប់ពីថ្ងៃទី១ ដល់ ថ្ងៃទី១៥ ខែមេសា ប្រេងសាំងធម្មតាក្នុងមួយលីត្រមានតម្លៃ៣៧៥០រៀល ហើយប្រេងម៉ាស៊ូតក្នុងមួយលីត្រមានតម្លៃ៣៥៥០រៀល។
អ្នកនាំពាក្យក្រសួងពាណិជ្ជកម្ម លោក ស៊ាង ថៃ មានប្រាប់ VOD បន្ថែម នៅព្រឹកនេះ ថា ការឡើងថ្លៃនេះគឺដោយសារការឡើងថ្លៃប្រេងពីទីផ្សារអន្តរជាតិ ហើយក្រសួងនៅមិនទាន់ចាត់វិធានការអីនៅឡើយដែរ ដោយថា តម្លៃនេះនៅក្នុងកម្រិតពិចារណានៅឡើយ។
លោក ស៊ាង ថៃ មានប្រសាសន៍ថា៖ «ដូចយើងបានជ្រាបហើយ យើងអត់ផលិតសាំងទេ! ហើយរដ្ឋក៏អត់មានបានដំឡើងអីដែរ គឺនៅដដែល! តាមការគណនាហ្នឹង យើងឃើញហើយ ដោយសារថ្លៃអន្តរជាតិវាឡើង។ ស្អីដែលវាឡើងវាចុះ វាពាក់ព័ន្ធតែជាមួយនឹងថ្លៃអន្តរជាតិ។ យើងមិនទាន់មានអីទេឥឡូវ ព្រោះវាឡើងវាចុះៗ ដូចថ្ងៃមុននោះវាឡើងដល់៤០០០ជាង វាចុះមកទាបមែនទែន ឥឡូវវាឡើងមកដល់៣៧៥០ អ៊ីចឹង កម្រិតវានៅសល់ក្នុងការពិចារណា។»
ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ លោក វន់ ពៅ សំណូមពររដ្ឋាភិបាលដោះស្រាយបញ្ហាសាំងឡើងថ្លៃជាបន្ទាន់ ដោយថាករណីនេះកំពុងធ្វើឱ្យប៉ះពាល់ជីវភាពប្រជាពលរដ្ឋ។
លោក វន់ ពៅ មានប្រសាសន៍ថា៖ «បើសិនជារដ្ឋាភិបាលមិនគិតគូរ នៅតែបណ្តែតបណ្តោយសាំងឡើងចុះៗតាមអំពើចិត្តរបស់អ្នកលក់មួយចំនួនទេ ខ្ញុំគិតថា វាជារឿងមួយប៉ះពាល់ទៅលើប្រជាពលរដ្ឋខ្មែរទូទាំងប្រទេសតែម្តង រឿងថ្លៃសាំងនេះ។ តែឥឡូវសាំងឡើងថ្លៃ ហើយប្រជាពលរដ្ឋប្រើម៉ាស៊ីនភ្លើងច្រើនទៀត សួរថាវាប៉ះពាល់ដល់កម្រិតណា? អាហ្នឹងរដ្ឋត្រូវតែដោះស្រាយជាបន្ទាន់ផងដែរ!» ។
តាមសេចក្ដីជូនដំណឹងកំណត់ពីតម្លៃសាំងរបស់ក្រសួងពាណិជ្ជកម្មឱ្យដឹងថា ក្នុងរយៈពេល៣ខែចុងក្រោយនេះ តម្លៃសាំងធ្លាក់ចុះថ្លៃទាបបំផុតនៅត្រឹម៣២០០រៀល៕