គណកម្មការទូរទស្សន៍ប៉ុស្ដិ៍លេខ៥បានបើកព្រឹត្តិការណ៍ប្រកួតប្រដាល់គុនខ្មែរចម្រុះ ដែលមានឈ្មោះថា Khmer Fight ជាលើកទី២ កាលពីថ្ងៃទី១៥ ខែមេសា ដើម្បីអបអរសាទរសង្ក្រាន្តព្រៃវែងក្រោមការចូលរួមយ៉ាងច្រើនកុះករពីអ្នកទស្សនាជាតិ និងអន្តរជាតិ ហើយមានកីឡាករល្បីៗរបស់កម្ពុជា និងបរទេសខ្លាំងៗរហូតដល់៦គូមកចូលរួមប្រកួត។
នេះជាលើក២ហើយដែលកម្ពុជាក្រោមការរៀបចំរបស់គណកម្មការទូរទស្សន៍ប៉ុស្ដិ៍លេខ៥ បានបើកព្រឹត្តិការណ៍ប្រកួតប្រដាល់គុនខ្មែរចម្រុះ ដែលមានឈ្មោះថា Khmer Fight ដោយលើកទី១បើកប្រកួតនៅក្នុងព្រឹត្តិការណ៍សម្ពោធវិមានឈ្នះឈ្នះ និងលើកទី២គឺទើបតែបញ្ចប់នៅក្នុងព្រឹត្តិការណ៍សង្ក្រានព្រៃវែងកាលពីថ្ងៃទី១៥ មេសា ឆ្នាំ២០១៩នេះ។ ការប្រកួតនេះគឺជាផ្នែកមួយនៃការផ្សព្វផ្សាយគុនខ្មែរឲ្យអន្តរជាតិបានស្គាល់ផងដែរ។
គណកម្មការរៀបចំការប្រកួតបានអះអាងថាប្រដាល់ក្បាច់គុនបុរាណខ្មែរកម្ពុជាមានតាំងពីយូរណាស់មកហើយ។ ប៉ុន្តែប្រទេសថៃបានបើកព្រឹត្តិការណ៍ Thai Fight ហើយល្បីសុះសាយលើឆាកអន្តរជាតិខ្លាំងជាកម្ពុជា ទើបនៅពេលកម្ពុជាជាម្ចាស់ក្បាច់គុនដើម ដែលទើបនឹងបើកព្រឹត្តិការណ៍ Khmer Fight បែរទៅជាមានទស្សនៈថាកម្ពុជាចម្លងក្បាច់គុន និងការប្រកួតតាមលំនាំThai Fight។
លោក សេង កដិកា អ្នករៀបចំការប្រកួតប្រចាំនៅប៉ុស្ដិ៍លេខ៥ បានអះអាងថា គឺជារឿងលំបាកដែលកម្ពុជានឹងត្រូវបន្តឲ្យសុះសាយក្បាច់គុនរបស់ខ្លួនដើម្បីឲ្យអន្តរជាតិទទួលស្គាល់ភ្លាមៗនោះទេ ដោយសារតែអន្តរជាតិនាពេលបច្ចុប្បន្នគេស្គាល់ថាThai Fight របស់ថៃច្រើនជាង។ លោកថាកម្ពុជាត្រូវការការជ្រោមជ្រែងច្រើនទៀត ដើម្បីរៀបចំព្រឹត្តិការណ៍មួយនេះឲ្យបានញឹកញាប់ ហើយក៏ត្រូវតែមានដៃគូដែលមានទុនច្រើនដើម្បីអញ្ជើញកីឡាករខ្លាំងៗរបស់បរទេសឲ្យមកប្រកួតបានល្អជាង២លើកកន្លងមក ដើម្បីឲ្យបរទេសច្រើនឡើងបានស្គាល់ពីព្រឹត្តិការណ៍ Khmer Fight ដែលជាម្ចាស់ក្បាច់គុន ដោយមិនមែនចម្លងពីថៃ។
លោក សេង កដិកា បានបន្តថាព្រឹត្តិការណ៍ Khmer Fight តម្រូវឲ្យកីឡាករបរទេសមកប្រកួតត្រូវគោរពតាមលក្ខន្តិកៈរបស់ក្បាច់គុនចម្រុះខ្មែរ ដែលមិនខុសពីដើម្បីផ្សព្វផ្សាយអោយក្បាច់គុនត្រូវបានអន្តរជាតិទទួលស្គាល់។ លោកថាព្រឹត្តិការណ៍ Thia Fight ត្រូវបានថៃគេបើកប្រកួតស្ទើរតែជុំវិញពិភពលោក ហើយគណកម្មការរបស់គេក៏មានហិរញ្ញវត្ថុគ្រប់គ្រាន់ក្នុងការបើកប្រកួតដណ្ដើមខ្សែក្រវាត់ និងប្រាក់រង្វាន់ច្រើនៗដែលនាំឲ្យកីឡាករបរទេសល្បីៗនៅលើពិភពលោកចង់ចូលមកប្រកួតនោះដែរ។ ដូច្នេះហើយទើបធ្វើឲ្យក្បាច់គុនថៃតាមរយៈព្រឹត្តិការណ៍មួយនេះល្បីល្បាញជាងខ្មែរ។
លោក សេង កដិកា អំពាវនាវឲ្យមានការសហការ និងចូលរួមគាំទ្រព្រឹត្តិការណ៍នេះឲ្យបានខ្លាំង ដោយក្រៅពី Khmer Fight ត្រូវមានលទ្ធភាពប្រកួតបានញឹកក្នុងស្រុក ក៏ត្រូវតែមានលទ្ធភាពផ្ដល់តម្លៃខ្លួនឲ្យកីឡាករបរទេសខ្លាំងៗមកប្រកួត និងត្រូវមានលទ្ធភាពទៅប្រកួតនៅក្រៅប្រទេសដូចគ្នានឹង Thai Fight កន្លងមក ទើបធ្វើឲ្យក្បាច់គុនរបស់ខ្មែរ សុះសាយលើឆាកអន្តរជាតិ។
គួរបញ្ជាក់ផងដែរថាព្រឹត្តិការណ៍ Khmer Fight ដែលបានធ្វើឡើងជាលើកទី២នៅសង្ក្រានព្រៃវែងដ្បិតថាមានតែកីឡាករបរទេស៦គូ មកពី៥ប្រទេសមកប្រកួតមែន ប៉ុន្តែសម្រាប់ការរៀបចំគឺទទួលបានជោគជ័យខ្លាំង ដោយគេសម្គាល់ឃើញមាន គេហទំព័របរទេសមួយចំនួនផ្សាយបន្តពីកម្ពុជា ដែលធ្វើអោយក្បាច់គុនខ្មែរចាប់ផ្ដើមទទួលស្គាល់លើឆាកអន្តរជាតិជាបណ្ដើរៗនោះផង៕
