សម្ព័ន្ធអ្នកកាសែតអាស៊ីអាគ្នេយ៍ហៅកាត់ថា SEAPA លើកឡើងថា រដ្ឋាភិបាលកម្ពុជាកំពុងប្រើប្រាស់ប្រព័ន្ធច្បាប់ក្នុងការបង្ក្រាបអ្នកកាសែត ខណៈរដ្ឋាភិបាលច្រានចោល និងថាច្បាប់មានសម្រាប់អនុវត្តលើអ្នកខុសប៉ុណ្ណោះ។
ក្នុងអត្ថបទរបស់ SEAPA ចេញផ្សាយថ្ងៃទី៣ ខែឧសភា បានលើកឡើងថា ចាប់តាំងពីឆ្នាំ២០១៨មក រដ្ឋាភិបាលកម្ពុជាបានបង្កើតច្បាប់ថ្មីៗជាច្រើន និងកំពុងតែធ្វើច្បាប់ថ្មីមួយចំនួនទៀតដែលបានធ្វើឲ្យប៉ះពាល់ដល់សិទ្ធិក្នុងការបញ្ចេញមតិ និងសេរីភាពសារព័ត៌មាននៅក្នុងប្រទេសនេះផងដែរ។
SEAPA បានបន្ថែមថា ចាប់តាំងពីឆ្នាំ២០១៨មក មានអ្នកកាសែត៧នាក់ហើយ ក្នុងនោះមានអតីតអ្នកកាសែតអាស៊ីសេរីពីរនាក់ អតីតអ្នកកាសែត Cambodia Daily ម្នាក់ អ្នកកាសែតអនឡាញ៣នាក់ និងអ្នកកាសែតអូស្ត្រាលីម្នាក់ ត្រូវបានរដ្ឋាភិបាលប្រើប្រាស់ច្បាប់ទាំងនោះប្រឆាំងពួកគេ។
SEAPA លើកឡើងថា៖ « ជាអកុសល ករណីពាក់ព័ន្ធនឹងឧក្រិដ្ឋកម្មប្រឆាំងនឹងអ្នកសារព័ត៌មាននៅកម្ពុជា ជារឿយៗមិនត្រូវបានស៊ើបអង្កេត ឬស៊ើបអង្កេតដោយគ្មានតម្លាភាព ឯករាជ្យភាព និងលំអៀង។ ហើយនៅពេលដែលពួកគេត្រូវបានផ្ដន្ទាទោស ពួកគេតែងតែទទួលបានការកាត់ទោសយ៉ាងអយុត្តិធម៌ ឬត្រូវបានដោះលែងមុន» ។
ច្បាប់ដែល SEAPA លើកឡើងនោះ រួមមាន ច្បាប់វិសោធនកម្មថ្មីរដ្ឋធម្មនុញ្ញ ក្រមព្រហ្មទណ្ឌ សេចក្ដីប្រកាសរួមរបស់ក្រសួងមហាផ្ទៃ ក្រសួងប្រៃសនីយ៍ និងក្រសួងព័ត៌មាន ដើម្បីត្រួតពិនិត្យលើការផ្សព្វផ្សាយព័ត៌មានតាមប្រព័ន្ធអ៊ីនធឺណិត ជាដើម។
រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ បានលើកឡើងថា គ្មានអ្នកកាសែតអាជីពដែលប្រកបដោយវិជ្ជាជីវៈណាម្នាក់ត្រូវបានរដ្ឋាភិបាលប្រើច្បាប់ជាការគំរាមកំហែងនោះទេ មានតែអ្នកកាសែតដែលធ្វើខុសច្បាប់ប៉ុណ្ណោះ ដែលត្រូវប្រឈមនឹងសកម្មភាពរបស់ខ្លួន។
លោកថា៖ « គាត់គិតតែមួយចំហៀង តែគាត់អត់គិតមួយចំហៀងទៀត! ហើយសួរទៀត តើអ្នកកាសែតដែលមានរឿងប៉ុន្មានក៏ដោយដែលឮឈ្មោះឬអត់? មន្ត្រីរបស់ខ្ញុំក៏មានមួយដែរនៅAKP ក៏ជាប់គុកដែរ ព្រោះខុសច្បាប់ដូចគ្នា » ។
នាយិកាប្រតិបត្តិអង្គការក្រុមការងារដើម្បីដោះស្រាយទំនាស់ លោកស្រី ស្រី សុធារី មានប្រសាសន៍ថា ចាប់ពីឆ្នាំ២០១៨មក សេរីភាពប្រព័ន្ធផ្សព្វផ្សាយមានការរឹតត្បិតប្រាកដមែន ដែលបានធ្វើឲ្យធ្លាក់ចុះដល់សេរីភាពនៃការបញ្ចេញមតិ និងសេរីភាពសារព័ត៌មាន ហើយវាបានធ្វើឲ្យពលរដ្ឋបាត់បង់ជំនឿលើប្រព័ន្ធផ្សព្វផ្សាយផងដែរ។
លោកស្រី ស្រី សុធារី៖ « ជាពិសេសមុនពេលបោះឆ្នោត កំឡុងពេល និងក្រោយពេលបោះឆ្នោតហ្នឹង។ យើងឃើញថា មានការរឹតត្បិតសិទ្ធសេរីភាព មានការប្រើប្រាស់ច្បាប់មួយចំនួន! ជាយន្តការដើម្បីបិទសិទ្ធិសេរីភាព មិនមែនជាការផ្ដល់នូវសិទ្ធិសេរីភាពដល់អ្នកសារព័ត៌មានក្នុងការចុះផ្សាយនូវសារព័ត៌មានពិតទេ » ។
របាយការណ៍ស្ដីពីសន្ទស្សន៍សេរីភាពសារព័ត៌មានពិភពលោកឆ្នាំ២០១៩ បានចាត់ថ្នាក់ប្រទេសកម្ពុជាក្នុងលំដាប់លេខ១៤៣ លើ១៨០ ដែលបង្ហាញថា សេរីសារព័ត៌មាននៅក្នុងប្រទេសនេះស្ទើរតែគ្មានសេរីភាពទាល់តែសោះ នឹងបានធ្លាក់ចុះជាបន្តបន្ទាប់ពី១៤២ នៅឆ្នាំ២០១៨ និង១៣៧ ក្នុងឆ្នាំ២០១៧៕
