លោកនាយករដ្ឋមន្ត្រី ហ៊ុន សែន បានផ្ញើសារអរគុណទៅដល់ប្រជាពលរដ្ឋខ្មែរឥស្លាម ដោយថា បានចូលរួមថែរក្សាសន្តិភាព និងមានជំនឿលើការដឹកនាំរបស់លោក។
លោក ហ៊ុន សែន បានផ្ញើសារបែបនេះនៅលើទំព័រហ្វេសប៊ុករបស់លោកនៅរសៀលថ្ងៃនេះ តែប៉ុន្មានថ្ងៃប៉ុណ្ណោះមុនការមកដល់នៃពិធីបួសខែរ៉ម៉ាដនរបស់ឥស្លាមសាសនិក។
លោក ហ៊ុន សែន រៀបរាប់ថា៖ «ខ្ញុំសូមផ្ញើរនូវក្តីនឹករលឹក និង អរគុណយ៉ាងជ្រាលជ្រៅបំផុតចំពោះបងប្អូនឥស្លាមកម្ពុជា ដែលបានចូលរួមថែរក្សា សុខសន្តិភាព ហើយមានជំនឿជឿជាក់លើការដឹកនាំរបស់ខ្ញុំ និងរបស់គណបក្សប្រជាជនកម្ពុជាតាំងពីដើមរៀងមក»។
ពលរដ្ឋខ្មែរ នឹងចាប់ផ្ដើមប្រារព្ធពិធីបួសខែរ៉ម៉ាដនតាមប្រពៃណីឥស្លាមនៅថ្ងៃទី៧ ខែឧសភាសប្ដាហ៍ក្រោយនេះ។
ពលរដ្ឋខ្មែរឥស្លាម ត្រូវបានប៉ាន់ប្រមាណថា មានចំនួនប្រហែល ១ភាគរយនៃចំនួនពលរដ្ឋខ្មែរសរុបខ្ទង់ ១៦លាននាក់ ដែលប៉ាន់ប្រមាណដោយទីភ្នាក់ងារប្រជាជននៃអង្គការសហប្រជាជាតិ៕