លោកនាយករដ្ឋមន្ត្រី ហ៊ុន សែន បញ្ជាដល់ក្រុមការងារថ្នាក់ជាតិទាំងអស់ឲ្យចុះមូលដ្ឋានពន្យល់ពលរដ្ឋពីផលវិបាកនៃបដិវត្តន៍ពណ៌ផ្តួលរំលំរដ្ឋាភិបាលដែលដឹកនាំដោយលោក សម រង្ស៊ី។
ក្នុងលិខិតចុះថ្ងៃទី៧ ខែឧសភា លោក ហ៊ុន សែន បានបញ្ជាដល់ក្រុមការងារថ្នាក់ជាតិ និងអាជ្ញាធរមូលដ្ឋានទាំងអស់គ្រប់គ្រងស្ថានភាពមូលដ្ឋានឲ្យបានប្រសើរបន្ថែមទៀត ជាពិសេសត្រូវអប់រំពលរដ្ឋពីផលវិបាកនៃបដិវត្តន៍ពណ៌ និងការវិលត្រលប់របស់លោក សម រង្ស៊ី មកដឹកនាំបដិវត្តន៍មួយនេះ។
លោកសរសេរថា៖ «ការវិលត្រលប់មកកម្ពុជាវិញ ឬមិនវិលត្រលប់មកកម្ពុជាវិញរបស់ទណ្ឌិត សម រង្ស៊ី ក៏ដូចជា ការដឹកនាំបដិវត្តន៍ពណ៌បានសម្រេច ឬមិនបានសម្រេច គឺមិនចំណុះទៅលើមហិច្ឆិតារបស់ទណ្ឌិតរូបនេះឡើយ កត្តាសំខាន់ជាគន្លឹះគឺអាស្រ័យទៅលើការគ្រប់គ្រងបានល្អប្រសើរនូវសភាពការណ៍តាមមូលដ្ឋាននានាទូទាំងប្រទេស»។
មួយរយៈមកនេះ លោក សម រង្ស៊ី ដែលនិរទេសខ្លួនឯងចេញក្រៅប្រទេស តែងតែប្រកាសជារឿយៗពីការវិលត្រលប់របស់លោកកម្ពុជាវិញ ដោយមិនមានកំណត់ថ្ងៃណាច្បាស់លាស់នោះទេ ខណៈរដ្ឋាភិបាលប្រកាសថា នឹងចាប់ខ្លួនប្រសិនជាលោក សម រង្ស៊ី ឈានជើងចូលដល់ដីកម្ពុជានោះ៕
