ប្រតិភូសហភាពអឺរ៉ុបគ្រោងធ្វើទស្សនកិច្ចមកកម្ពុជានៅដើមខែមិថុនាខាងមុខ ដើម្បីពិនិត្យពីបញ្ហាសិទ្ធិមនុស្សក្នុងបរិបទនៃដំណើរការព្យួរប្រព័ន្ធអនុគ្រោះពន្ធ EBA ជាបណ្ដោះអាសន្ន។ នេះបើតាមតំណាងបេសកកម្មទូតអឺរ៉ុបប្រចាំកម្ពុជា លោក George Edgar។
ប្រាប់ VOD តាមសារអេឡិចត្រូនិកអ៊ីម៉េលនៅថ្ងៃនេះ តំណាងបេសកកម្មទូតអឺរ៉ុបប្រចាំកម្ពុជាលោក George Edgar ឲ្យដឹងថា ប្រតិភូអឺរ៉ុបនឹងធ្វើទស្សនកិច្ចនៅកម្ពុជាចាប់ពីថ្ងៃទី៣ ខែមិថុនា ខាងមុខ ក្នុងបេសកកម្មស្វែងរកការពិត បន្ទាប់ពីសហភាពអឺរ៉ុបបានប្រកាសរាប់ថ្ងៃថយក្រោយពីវិធានការព្យួរប្រព័ន្ធអនុគ្រោះពន្ធ«អ្វីៗគ្រប់យ៉ាងលើកលែងតែអាវុធ»កាលពីខែកុម្ភៈ។
លោកសរសេរថា៖ «ជាបេសកកម្មស្វែងរកការពិត មកពីគណៈកម្មការសហភាពអឺរ៉ុប និងគណៈកម្មាការទទួលបន្ទុកកិច្ចការបរទេស នឹងធ្វើទស្សនកិច្ចនៅកម្ពុជានាពេលដ៏ខ្លីខាងមុខ។ ដែលនេះជាផ្នែកនៃដំណើរការទំនាក់ទំនងរវាងសហភាពអឺរ៉ុប និងកម្ពុជា ក្នុងបរិបទក្នុងប្រព័ន្ធអនុគ្រោះពន្ធអ្វីៗគ្រប់យ៉ាងលើកលែងតែអាវុធ »។
អ្នកនាំពាក្យគណបក្សប្រជាជនកម្ពុជា លោក សុខ ឥសាន មានប្រសាសន៍ថា លោកមិនមានជំនឿថាបេសកកម្មស្វែងរកការពិតរបស់សហភាពអឺរ៉ុបលើកនេះអាចស្វែងរកការពិតជាក់ស្ដែងពីកម្ពុជានោះទេ ដោយថា ការចុះបេសកកម្មរបស់តំណាងសហភាពអឺរ៉ុបជាច្រើនដងមកហើយនោះ សុទ្ធតែមានចម្លើយអវិជ្ជមានសម្រាប់ប្រទេសនេះ។
លោក សុខ ឥសាន៖ «គេកំពុងតែនៅសប្បាយ អ្នករកស៊ីអីរកស៊ីទៅ ធ្វើការអីធ្វើការទៅ ជីវភាពសង្គមវាធម្មតា ដល់អ្នកវាយតម្លៃបែរជាថា រំលោភសិទ្ធិមនុស្សធ្ងន់ធ្ងរទៅវិញ។ បើសិនជាមានការរំលោភសិទ្ធិមនុស្សធ្ងន់ធ្ងរ សង្គមហ្នឹងវារំជើបរំជួលបះបោរហុយផ្សែង រត់ចូលលេណដ្ឋានគ្រប់គ្នាហើយ»។
អ្នកនាំពាក្យសមាគមសិទ្ធិមនុស្សអាដហុក លោក សឹង សែនករុណា មានប្រសាសន៍ថា ស្ថានភាពសិទ្ធិមនុស្សរបស់កម្ពុជា រដ្ឋាភិបាលមិនអាចវាយតម្លៃយកត្រូវតែម្ខាងបាននោះទេ ហើយការវាយតម្លៃយកត្រូវតែជារបស់ខ្លួន ហើយមិនទទួលយកយោបល់របស់សហភាពអឺរ៉ុប គឺជាបញ្ហាដែលធ្វើឱ្យប៉ះពាល់ដល់ប្រយោជន៍ជាតិទាំងមូល។
លោកបន្ថែមថា រដ្ឋាភិបាលគួរបន្ទន់ជំហរចរចា និងទទួលយកចំណុចអវិជ្ជមានរបស់ខ្លួនមកកែប្រែដើម្បីរក្សាប្រយោជន៍ជាតិ និងប្រជាជនទាំងមូល។
លោក ករុណា៖ «មានន័យថា បញ្ហាដែលសហភាពអឺរ៉ុបបានលើកឡើងទាំងប៉ុន្មាន យើងគួរតែពិនិត្យឡើងវិញ ហើយធ្វើការដោះស្រាយបញ្ហាទាំងអស់ហ្នឹងទៅ។ ព្រោះបញ្ហាទាំងអស់ហ្នឹងវាមិនមែនជាបញ្ហារបស់ជនបរទេស ឬក៏អន្តរជាតិទេ គឺជាបញ្ហារវាងជាតិសាសន៍ខ្មែរខ្លួនឯង។ យើងគួរតែយកដំណោះស្រាយហ្នឹងមកជជែកគ្នារកដំណោះស្រាយ ដើម្បីឲ្យខ្មែរ និងខ្មែរត្រូវរ៉ូវគ្នា ហើយយើងចាប់ផ្ដើមដំណើរការលទ្ធិប្រជាធិបតេយ្យមួយនៅកម្ពុជាដោយត្រឹមត្រូវឡើងវិញ ដោយមិនរងការរិះគន់ពីសហគមន៍ជាតិ និងអន្តរជាតិតទៅមុខទៀត»។
សហភាពអឺរ៉ុប កាលពីខែកុម្ភៈ ឆ្នាំ២០១៩នេះ បានប្រកាសរាប់ថយក្រោយអំពីដំណើរការព្យួរប្រព័ន្ធអនុគ្រោះពន្ធ EBA ពីកម្ពុជា ក្រោយពីប្លុកលោកសេរីមួយនេះរកឃើញថា រដ្ឋាភិបាលកម្ពុជា បានបរាជ័យក្នុងការស្ដារស្ថានភាពសិទ្ធិមនុស្ស និងលទ្ធិប្រជាធិបតេយ្យ។
ដំណើរការរាប់ថយក្រោយនោះគឺមានរយៈពេល ១៨ខែមុនការព្យួរ ឬមិនព្យួរពីកម្ពុជា ក្នុងនោះ ៦ខែដើម្បីឲ្យសហភាពអឺរ៉ុបពិនិត្យ និងពិភាក្សាជាមួយរដ្ឋាភិបាល ហើយ ៣ខែទៀតរៀបចំរបាយការណ៍ដោយផ្អែកតាមការរកឃើញ ហើយសល់ពីនោះមានរយៈពេល ១២ខែក្នុងការពិចារណាដកហូត ឬបន្តប្រព័ន្ធអនុគ្រោះនេះ។
ក្នុងរបាយការណ៍ចេញផ្សាយកាលពីថ្ងៃទី៦ ខែឧសភា ធនាគារពិភពលោកព្រមានថា កម្ពុជាប្រឈមនឹងការខាតបង់ទឹកប្រាក់ចន្លោះពី៥១៣លានដុល្លារ ដល់៦៥៤លានដុល្លារ ប្រសិនជាបាត់បង់ប្រព័ន្ធអនុគ្រោះពន្ធរបស់អឺរ៉ុប EBA ក្នុងនោះវិស័យកាត់ដេរត្រូវប្រឈមនឹងការខាតបង់ជាង ៣៨១លានដុល្លារ ស្បែកជើងត្រូវប្រឈមនឹងការខាតបង់ជាង ១២៨លានដុល្លារ៕