អង្គការសង្គមស៊ីវិល និងសហគមន៍ចំនួន ៨៥ បានស្នើទៅគ្រប់ថ្នាក់ដឹកនាំ និងពលរដ្ឋខ្មែរគ្រប់រូបឲ្យចូលរួមការពារ និងលើកតម្កើងនូវស្មារតីនៃកិច្ចព្រមព្រៀងសន្តិភាពទីក្រុងប៉ារីស និងរដ្ឋធម្មនុញ្ញកម្ពុជាឡើងវិញ ដើម្បីបញ្ចៀសទណ្ឌកម្មសេដ្ឋកិច្ច និងអស្ថិរភាពសង្គម។
ក្នុងសេចក្ដីថ្លែងការណ៍រួមចុះថ្ងៃទី៣ ខែឧសភា ក្រុមអ្នកតាមដានបញ្ហាសង្គមកម្ពុជា បានបង្ហាញការព្រួយបារម្ភចំពោះស្ថានភាពនយោបាយ សេដ្ឋកិច្ច ក្រោយការគោរពសិទ្ធិមនុស្ស និងប្រជាធិបតេយ្យបានធ្លាក់ចុះជាបន្តបន្ទាប់ចាប់តាំងពីការបោះឆ្នោតជ្រើសតាំងតំណាងរាស្ត្រឆ្នាំ២០១៨ និងក្រោយការផាត់គណបក្សប្រឆាំងដែលមានអ្នកគាំទ្រជិតពាក់កណ្ដាលប្រទេសចេញ។
ក្រុមសង្គមស៊ីវិលលើកឡើងក្នុងសេចក្ដីថ្លែងការណ៍នោះថា៖ «ប្រវត្តិសាស្ត្រប្រទេសកម្ពុជាបានបង្ហាញថា កង្វះយន្តការនៃការបោះឆ្នោតដោយសេរី ត្រឹមត្រូវ និងយុត្តិធម៌ បាននាំឲ្យពលរដ្ឋកម្ពុជារងទុក្ខវេទនាយ៉ាងធ្ងន់ធ្ងរ បែកបាក់ព្រាត់ប្រាសគ្រួសារ និងស្លាប់ជាច្រើនជាងគេនៅក្នុងសម័យសង្គ្រាមត្រជាក់។ បទពិសោធន៍ដ៏ជូរចត់នេះហើយដែលធ្វើឲ្យមានកិច្ចព្រមព្រៀងសន្តិភាពទីក្រុងប៉ារីសនេះកើតឡើង។ ការគ្រប់គ្រង និងការអភិវឌ្ឍប្រទេស ដោយមិនយកចិត្តទុកដាក់ការគោរពសិទ្ធិមនុស្ស និងលទ្ធិប្រជាធិបតេយ្យពិតប្រាកដ អាចនាំឲ្យប្រទេសកម្ពុជា ធ្លាក់ចូលទៅក្នុងសោកនាដកម្មដូចអតីតកាល»។
អ្នកនាំពាក្យសមាគមអាដហុក លោក ស៊ឹង សែនករុណា មានប្រសាសន៍ថា អង្គការរបស់លោក ក៏ដូចជាអង្គការដទៃមើលឃើញពីភាពធ្លាក់ចុះនៃការគោរពសិទ្ធិមនុស្ស និងប្រជាធិបតេយ្យនៅក្នុងប្រទេស ហើយហាក់បានដើរចេញកាន់តែឆ្ងាយពីស្មារតីនៃកិច្ចព្រមព្រៀងទីក្រុងប៉ារីស ដែលបានធ្វើឲ្យប៉ះពាល់ដល់ទំនាក់ទំនងរវាងកម្ពុជា និងលោកសេរី។
លោក ករុណា៖ «យើងមានការព្រួយបារម្ភ ប្រសិនលោកសេរីដកដៃចេញ សេដ្ឋកិច្ចនៅក្នុងប្រទេសកម្ពុជា ឬក៏ស្ថានភាពនយោបាយនៅកម្ពុជាកាន់តែធ្ងន់ធ្ងរ និងអាក្រក់ទៅៗ។ អ៊ីចឹងហើយ យើងចង់ឲ្យងាកមកគិតពីស្មារតីកិច្ចព្រមព្រៀងក្រុងប៉ារីសនេះ ដែលជាស្មារតីរួមគ្នារបស់អ្នកជាតិនិយមទាំងអស់ឲ្យគិតគូរដល់ជោគវាសនាប្រទេសជាតិ ដោយបញ្ឈប់ការតតាំងគ្នាដោយចុងកាណុងអីហ្នឹង មកជជែកគ្នានៅតុចរចា អភិវឌ្ឍន៍ប្រទេសជាតិដោយការគោរពសិទ្ធិមនុស្ស និងលទ្ធិប្រជាធិបតេយ្យហ្នឹង»។
អ្នកនាំពាក្យគណបក្សប្រជាជន លោក សុខ ឥសាន ចាត់ទុកសេចក្ដីថ្លែងការណ៍រួមនេះថា កំពុងព្យាយាមជ្រៀតជ្រែកដល់កិច្ចការរបស់រដ្ឋាភិបាលក្នុងការរក្សាលទ្ធិប្រជាធិបតេយ្យ និងសិទ្ធិមនុស្សនៅក្នុងប្រទេស។ លោកបន្ថែមថា ស្មារតីនៃសន្ធិសញ្ញាសន្តិភាពទីក្រុងប៉ារីស បានរលាយចូលរដ្ឋធម្មនុញ្ញរបស់កម្ពុជា ហើយរដ្ឋាភិបាលក៏បានប្រតិបត្តិពេញលេញតាមរដ្ឋធម្មនុញ្ញនេះដែរ។
លោក សុខ ឥសាន មានប្រសាសន៍ថា៖ «បើមានការរំលោភសិទ្ធិមនុស្សធ្ងន់ធ្ងរ ប្រជារាស្ត្រប្រាកដជាមានការបះបោរប្រឆាំងរដ្ឋាភិបាលហើយ មិនមែនប្រទេសជាតិស្ថិតក្នុងស្ថិរភាពនយោបាយ ក្រោមដំបូលសន្តិភាពយ៉ាងរឹងមាំដូច្នេះទេ។ ហើយម្យ៉ាងទៀត បើមានការរំលោភសិទ្ធិមនុស្សធ្ងន់ធ្ងរ ខ្ញុំយល់ថា សង្គមស៊ីវិលទាំង៨៥ និងលើកមុន ៧៣មក ក៏មិនអាចមានមតិរិះគន់ ឬវាយប្រហារមកលើរាជរដ្ឋាភិបាលតាមនិន្នាការលំអៀងនយោបាយនៅកម្ពុជាដែរ»។
ប្រតិភូសហភាពអឺរ៉ុបបានចាប់ផ្ដើមធ្វើទស្សនកិច្ចរបស់ខ្លួនហើយនៅថ្ងៃទី៣ ខែមិថុនា ដើម្បីពិនិត្យពីបញ្ហាសិទ្ធិមនុស្សនៅកម្ពុជាមុនរៀបចំរបាយការណ៍ដាក់ទៅកាន់តំណាងសហភាពធ្វើការពិនិត្យថាព្យួរ ឬបន្តប្រព័ន្ធអនុគ្រោះពន្ធ EBA សម្រាប់កម្ពុជា។ ទោះជាយ៉ាងណា សម្រាប់រដ្ឋាភិបាលមិនយល់ថា ការធ្វើដំណើរទស្សនកិច្ចរបស់ប្រតិភូអឺរ៉ុបនេះអាចវាយតម្លៃវិជ្ជមានចំពោះរដ្ឋាភិបាលនោះទេ។
កាលពីថ្ងៃទី១ ខែមិថុនានេះ មានអង្គការសង្គមស៊ីវិលក្នុងស្រុកចំនួន៧៣ បានធ្វើសេចក្ដីថ្លែងការណ៍ដាក់ទៅកាន់រដ្ឋាភិបាល ដើម្បីឲ្យរដ្ឋាភិបាលបញ្ឈប់ការរំលោភសិទ្ធិមនុស្ស និងសេរីភាពមូលដ្ឋាន ដើម្បីរក្សាប្រព័ន្ធអនុគ្រោះពន្ធ EBA នេះ៕
