រដ្ឋាភិបាលបានសម្រេចដាក់ឲ្យអនុវត្តឡើងវិញនូវនីតិវិធីមួយចំនួននៃការគ្រប់គ្រងលើមធ្យោបាយដឹកជញ្ជូន ដែលត្រូវបានលោកនាយករដ្ឋមន្ត្រី ហ៊ុន សែន សម្រេចមិនឲ្យអនុវត្តអំឡុងពេលចាប់ផ្ដើមអនុវត្តច្បាប់ចរាចរណ៍ថ្មីកាលពី ៣ឆ្នាំមុន។
ក្នុងអនុក្រឹត្យចុះថ្ងៃទី៣ ខែមិថុនា លោកនាយករដ្ឋមន្ត្រី ហ៊ុន សែន បានសម្រេចថា ចាប់ពីពេលនេះតទៅ រាល់ការផ្ទេរកម្មសិទ្ធិយានជំនិះឆ្លងរាជធានី ឬខេត្ត ស្លាកលេខ និងបណ្ណសម្គាល់យានជំនិះនោះ ក៏តម្រូវប្ដូរតាមម្ចាស់ថ្មីនៃយានជំនិះនេះផងដែរ។
យោងតាមអនុក្រឹត្យនេះ រដ្ឋាភិបាលបានសម្រេចតម្រូវឲ្យម្ចាស់យានយន្តទាំងអស់ផ្ទេរកម្មសិទ្ធិលើយានយន្តរបស់ពួកគេ ដែលនីតិវិធីដ៏វែងមួយនេះ ត្រូវបានលោក ហ៊ុន សែន សម្រេចមិនឲ្យអនុវត្តម្ដងរួចមកហើយកាលពីដើមឆ្នាំ២០១៦កន្លងមក។
អ្នកនាំពាក្យក្រសួងសាធារណការ និងដឹកជញ្ជូន លោក វ៉ាស៊ឹម សុរិយា បានពន្យល់ថា ការសម្រេចនេះ មានន័យថា ម្ចាស់រថយន្តដែលទិញថ្មី និងទិញបន្តពីអ្នកដទៃ មិនត្រូវអនុញ្ញាតឲ្យប្រើប្រាស់ស្លាកលេខ និងបណ្ណសម្គាល់ដែលខុសពីរបស់ខ្លួននោះទេ គឺតម្រូវឲ្យធ្វើថ្មីតែម្ដង។
លោក វ៉ាស៊ឹម សុរិយា មានប្រសាសន៍ថា៖ «ពីមុនឧបមាថា យើងប្ដូរពីភ្នំពេញទៅតាកែវគឺយើងត្រូវប្ដូរផ្លាកលេខ តែជាទូទៅអ្នកដែលទិញឡានហើយ ច្រើនតែទុកផ្លាកលេខភ្នំពេញជិះអ៊ីចឹងទៅ តែដល់ពេលនេះត្រូវផ្ទេរដាច់ខាត់ហើយ។ អ៊ីចឹង យើងត្រូវមានលេខថ្មីចុះបញ្ជីថ្មីនៅនោះហើយ។ អ៊ីចឹងបានយើងថា ដល់ពេលហ្នឹងលេខដែលជាប់នឹងឡានហ្នឹង បើខ្ញុំមិនច្រឡំទេ គឺស្លាកលេខហ្នឹងត្រូវគ្រវាត់ចោលភ្លាម»។
លោក វ៉ាស៊ឹម សុរិយា បន្ថែមថា ជាគោលការណ៍នៃច្បាប់បច្ចុប្បន្ន ម្ចាស់យានយន្តត្រូវរកម្ចាស់រថយន្តដើមមកបញ្ជាក់ការផ្ទេរកម្មសិទ្ធិនេះ តែលោកថា ដោយសារឃើញពលរដ្ឋមានការលំបាកក្នុងការផ្ទេរនេះ រដ្ឋាភិបាលកំពុងសិក្សារកនីតិវិធីថ្មីដើម្បីសម្រួលបញ្ហានេះផងដែរ។
លោក សុរិយា បន្ថែមថា៖ «ឥឡូវនេះ យើងប្រើប្រព័ន្ធ IT ដល់ពេលចុះបញ្ជី គឺម្ចាស់ហើយដំបូងបំផុតនោះដែលបានទិញឡានពីឃ្លាំងមកហ្នឹងបានចុះបញ្ជីជាមួយក្រសួង តែបើគាត់អត់បានលុបអត់បានផ្ទេរកម្មសិទ្ធិទេ គឺឈ្មោះគាត់នៅហ្នឹង។ បើសិនជាមានករណីព្រហ្មទណ្ឌអី មានករណីប្ដឹងផ្ដល់អី គឺឈ្មោះគាត់ហ្នឹងហើយទទួលការស្រាវជ្រាវហើយ»។
កាលពីថ្ងៃទី៣ ខែមិថុនា លោកនាយករដ្ឋមន្ត្រី ហ៊ុន សែន បានបញ្ជាឲ្យក្រសួងពាក់ព័ន្ធដោះស្រាយបញ្ហានេះឲ្យបានឆាប់ ដោយលោកផ្ដល់ជាយោបល់ថា ការផ្ទេរកម្មសិទ្ធិ គឺត្រូវធ្វើត្រឹមអ្នកលក់ និងអ្នកទិញបានហើយ ដើម្បីកាត់បន្ថយនីតិវិធីស្មុគស្មាញ និងការចំណាយខ្ពស់ពេក។
លោក ហ៊ុន សែន ថ្លែងថា៖ «អ៊ីចឹងទេ បើសិនមានរឿងហ្នឹង ក៏ត្រូវខិតខំដោះស្រាយ ដើម្បីឱ្យផ្ទេរត្រឹមតែអ្នកទិញលក់ជាមួយគ្នា គឺកាត់ឈ្មោះចេញតែម្ដង ហើយតម្លៃឲ្យវាសមរម្យជាមួយភាពរហ័សរហួន ហើយកុំទាមទារឲ្យមានការផ្ទេរច្រើនដំណាក់ពេក»។
នាយកប្រតិបត្តិសម្ព័ន្ធគណនេយ្យភាពសង្គម លោក សន ជ័យ មានប្រសាសន៍ថា កម្រិតនៃគោលនយោបាយ គឺមានរួចហើយចំពោះការផ្ទេរកម្មសិទ្ធិ តែឧបសគ្គនៅក្នុងការអនុវត្តនោះ គឺបណ្ដាលមកពីភាពមិនច្បាស់លាស់នៃប្រភពឯកសារ ភាពស្មុគស្មាញនៃការអនុវត្តរបស់មន្ត្រីថ្នាក់ក្រោមជាតិ និងក្រសួង ហើយផ្នែកសំខាន់មួយទៀត គឺទាក់ទងនឹងការបង់ពន្ធ។
លោក សន ជ័យ ប្រាប់ថា៖ «ម្យ៉ាងទៀត របៀបនៃការទិញលក់ហ្នឹង វាមានភាពផុយស្រួយ គ្រាន់តែផ្ដិតមេដៃរវាងអ្នកលក់ និងអ្នកទិញ ជាដើម។ វាជានីតិវិធីរដ្ឋបាលដែលមានភាពសាមញ្ញពេក តែនៅពេលដែលយកភាពសាមញ្ញហ្នឹងយកមកផ្ទៀងផ្ទាត់នឹងផ្លូវច្បាប់ វាមានភាពស្មុគស្មាញ ដែលធ្វើឲ្យមានការអូសបន្លាយ។ ទើបតែមានរឿងធំៗមួយចំនួនទេ ដែលតម្រូវឲ្យម្ចាស់ដើមមកទទួលខុសត្រូវមុខច្បាប់ ប្រសិនជារថយន្តដែលលក់ទៅហើយហ្នឹងបង្កគ្រោះថ្នាក់ចរាចរណ៍ ឬបង្កបទល្មើសផ្សេងៗ»។
រដ្ឋាភិបាលបានសម្រេចដំណើរការនីតិវិធីទាំងនេះឡើងវិញ បន្ទាប់ពីនារីម្នាក់ឈ្មោះ យិន ម៉ាណា បានបើកបររថយន្តបុកនិស្សិតស្រីម្នាក់បណ្ដាលឲ្យស្លាប់កាលពីថ្ងៃទី២៦ ខែមីនាកន្លងមក ប៉ុន្តែ រថយន្តបង្កគ្រោះថ្នាក់នោះ ត្រូវបានចុះបញ្ជីកាន់កាប់ដោយបុគ្គលផ្សេងទៅវិញ។
ច្បាប់ចរាចរណ៍ផ្លូវគោក មាត្រា៤៩ បានចែងថា ការលក់ទិញ ការធ្វើអំណោយ និងរាល់ទម្រង់ផ្សេងទៀតដែលនាំឲ្យមានការផ្លាស់ប្ដូរកម្មសិទ្ធិករនៃយានយន្ត ត្រូវបំពេញសំណុំបែបបទដើម្បីផ្ទេរកម្មសិទ្ធិយានយន្តមិនឲ្យលើសរយៈពេល៩០ថ្ងៃ។
កាលពីដើមឆ្នាំ២០១៦ រដ្ឋាភិបាលបានសម្រេចថា ដើម្បីដោះស្រាយការលំបាកជូនសាធារណជន រដ្ឋាភិបាលសម្រេចទទួលស្គាល់ការកាន់កាប់ជាក់ស្ដែង ដោយមិនតម្រូវឲ្យមានការបញ្ជាក់ម្ចាស់ដើមឡើយ៕
