រដ្ឋមន្ត្រីក្រសួងសាធារណការ គ្រោងចុះពិនិត្យលើផ្លូវផ្សេងទៀតដែលមានការរាយការណ៍ពីភាពមិនប្រក្រតី បន្ទាប់ពីផ្លូវមួយចំនួនត្រូវបានរកឃើញពីភាពមិនប្រក្រតី និងតម្រូវឲ្យសាងសង់ឡើងវិញ។
អ្នកនាំពាក្យក្រសួងសាធារណការលោក គង់ វិមាន មានប្រសាសន៍ថាចាប់ពីពេលនេះតទៅរដ្ឋមន្ត្រីក្រសួងនឹងចុះទៅពិនិត្យលើផ្លូវដែលកំពុងសាងសង់ដោយខ្លួនលោកផ្ទាល់ ក្រោយពីមើលឃើញថាក្រុមហ៊ុនមួយចំនួនកំពុងសាងសង់ផ្លូវដោយពុំមានគុណភាពតាមកិច្ចសន្យាដែលបានចុះជាមួយក្រសួង។
លោកថា៖ «គ្រប់ផ្លូវទាំងអស់យើងសុទ្ធតែមានការបែងចែកតាមភារកិច្ចជូនទៅឯកឧត្ដមរដ្ឋលេខាធិការដែលទទួលបន្ទុកតាមផ្លូវនីមួយៗ អញ្ចឹងឯកឧត្ដមរដ្ឋលេខាធិការលោកកាន់គម្រោងហ្នឹងផ្ទាល់លោកមានសិទ្ធិក្នុងការចុះទៅពិនិត្យ និងធ្វើរបាយការណ៍ជូនឯកឧត្ដមទេសរដ្ឋមន្ត្រី ហើយក្នុងករណីណាដែលមិនប្រក្រតីឯកឧត្ដមទេសរដ្ឋមន្ត្រីលោកចាត់វិធានការដូច ករណីផ្លូវជាតិ៦អា កន្លងមក និងផ្លូវជាតិលេខ៣ពីកំពតទៅវាលរេញដូចគ្នា » ។
ទោះជាយ៉ាងណា លោកមិនទាន់បញ្ជាក់នៅឡើយទេថារដ្ឋមន្ត្រីក្រសួងនឹងចុះពិនិត្យលើផ្លូវណាបន្តទៀត។
កាលពីសប្ដាហ៍មុនរដ្ឋមន្ត្រីក្រសួងសាធារណការលោក ស៊ុន ចាន់ថុល បានចុះពិនិត្យការសាងសង់ផ្លូវជាតិលេខ៣ នឹងតម្រូវឲ្យក្រុមហ៊ុនដែលទទួលសាងសង់ផ្លូវនេះកែតម្រូវជាបន្ទាន់នូវការសាងសង់ក្រោយរកឃើញថាផ្លូវនេះ ធ្វើដោយគ្មានគុណភាពត្រឹមត្រូវ។
រហូតមកដល់ពេលនេះ ក្រសួងនៅមិនទាន់មានវិធានការ ឬទណ្ឌកម្មណាដាក់ទៅលើក្រុមហ៊ុន ឬអ្នកពាក់ព័ន្ធ នៅពេលរដ្ឋរកឃើញថាការសាងសង់ផ្លូវនោះពុំអនុវត្តន៍តាមកិច្ចសន្យានោះទេក្រៅពីបញ្ជាឲ្យក្រុមហ៊ុនសាងសង់កែតម្រូវតាមកិច្ចសន្យាតែប៉ុណ្ណោះ។
នាយកប្រតិបត្តិសម្ព័ន្ធគណនេយ្យភាពសង្គមលោក សន ជ័យ មានប្រសាសន៍ប្រាប់VOD កាលពីចុងសប្ដាហ៍មុនថា ការចុះទៅពិនិត្យគឺជារឿងមួយដែលត្រូវអនុវត្តន៍ តែថាវាមិនទាន់ចំចំណុចដែលអាចលុបបំបាត់បញ្ហានេះទាំងស្រុងនោះទេ។ លោកឲ្យជាយោបល់ថាដើម្បីធានាការសាងសង់ផ្លូវប្រកបដោយគុណភាព រដ្ឋមន្ត្រីក្រសួងនេះ ត្រូវទប់ស្កាត់កុំឱ្យមានអំពើពុករលួយជាប្រព័ន្ធពីសំណាក់មន្ត្រីខ្លួនក្នុងការជ្រើសរើសដៃគូសម្រាប់អភិវឌ្ឍន៍ និងការដេញថ្លៃគម្រោងជាដើម ទើបវិធានការដោះស្រាយចំបញ្ហា។
លោកមានប្រសាសន៍ថា៖ «គេត្រូវមានវិធានការទៅលើមន្ត្រីបច្ចេកទេស ក្នុងកម្រិតមន្ត្រីផ្នែកសាងសង់ផ្លូវហ្នឹង ហើយបើវាជាទម្រង់មួយធំ កន្លែងហ្នឹង អង្គភាពប្រឆាំងអំពើពុករលួយមិនបាច់ប្រាប់ទេ ត្រូវបើកការស៊ើបអង្កេតទៅលើអំពើពុករលួយណាមួយដែលអាចកើតមាន »។
រដ្ឋមន្ត្រីក្រសួងមហាផ្ទៃ និងជាប្រធានគណកម្មាធិការជាតិសុវត្ថិភាពចរាចរណ៍ផ្លូវគោកលោក ស ខេង កាលពីឆ្នាំ២០១៨ បានរិះគន់ការសាងសង់ផ្លូវមួយចំនួនដែលថាហាក់មិនបានបំពេញនូវគុណភាព ដើម្បីបំរើការប្រើប្រាស់បានជាប់ល្អនោះទេ ដោយលោកលើកឡើងពីការសាងសង់ផ្លូវមួយចំនួនដែលរួមមានផ្លូវជាតិលេខ៨ ផ្លូវជាតិលេខ៦អាជាដើម។
បច្ចុប្បន្ននេះ ផ្លូវថ្នល់រួមទាំងផ្លូវជាតិ និងផ្លូវខេត្ដមានប្រវែង សរុប១៦ ២៩២គីឡូម៉ែត្រ ក្នុងនោះចាក់កៅស៊ូ និងបេតុងប្រវែង៨ ៥២៦គីឡូម៉ែត្រ ស្មើនឹងជាង៥២ភាគរយនៃប្រវែងផ្លូវសរុបនៅទូទាំងប្រទេស។
រដ្ឋមន្ត្រីក្រសួងសាធារណការ និង ដឹកជញ្ជូន លោក ស៊ុន ចាន់ថុល ធ្លាប់ថ្លែងថា ក្នុងមួយឆ្នាំរដ្ឋាភិបាលចំណាយលុយជិត២០០លានដុល្លារដើម្បីជួសជុល និង ថែទាំផ្លូវទូទាំងប្រទេស៕