សហរដ្ឋអាមេរិកបានស្រាវជ្រាវ និងពិន័យដល់ក្រុមហ៊ុនចិនមួយចំនួនដែលបាននាំទំនិញទៅកាន់ប្រទេសនេះដោយប្រើប្រាស់ឈ្មោះ និងទឹកដីកម្ពុជា។ នេះបើតាមទីភ្នាក់ងារសារព័ត៌មានរ៉យទ័រដែលចេញផ្សាយនាថ្ងៃនេះ។
អ្នកនាំពាក្យស្ថានទូតអាមេរិកប្រចាំកម្ពុជា លោក Arend Zwartjes បានប្រាប់រ៉យទ័រ ថា នាយកដ្ឋានសន្តិសុខជាតិអាមេរិកបានត្រួតពិនិត្យ និងពិន័យទៅលើក្រុមហ៊ុនចិនមួយចំនួនដែលបានបំពានបំរាមគយរបស់អាមេរិក ដោយថា ក្រុមហ៊ុនទាំងនេះបានបញ្ជូនទំនិញពីចិនទៅសហរដ្ឋអាមេរិកតាមរយៈប្រទេសកម្ពុជា ដើម្បីគេចពីការបង់ពន្ធ ឬបង់ពន្ធក្នុងកម្រិតលើកលែង។
ទោះជាយ៉ាងណា លោក Arend Zwartjes មិនបានបញ្ជាក់ថា ក្រុមហ៊ុនដែលត្រូវពិន័យនោះមានប៉ុន្មាននោះទេ ដោយគ្រាន់តែបញ្ជាក់ថា ក្រុមហ៊ុនចិនទាំងនោះមានទីតាំងនៅតំបន់សេដ្ឋកិច្ចក្នុងខេត្តព្រះសីហនុ នៃប្រទេសកម្ពុជា។
សង្គ្រាមពាណិជ្ជកម្មរវាងចិន អាមេរិក បានធ្វើឲ្យប្រទេសទាំងពីរនេះតំឡើងពន្ធនាំចូលឲ្យគ្នាទៅវិញទៅមក ដោយក្នុងនោះ ប្រទេសចិនត្រូវមើលឃើញថា កំពុងរងការខាតបង់ច្រើនជាង។
កាលពីថ្ងៃទី២៣ ខែមីនា ឆ្នាំ២០១៨កន្លងទៅ ប្រធានាធិបតីអាមេរិក លោក ដូណាល់ ត្រាំ បានចុះហត្ថលេខាឲ្យបន្តប្រព័ន្ធអនុគ្រោះពន្ធទូទៅ ហៅកាត់ថា GSP ដល់កម្ពុជាដោយមានសុពលភាពរហូតដល់ចុងឆ្នាំ២០២០។
តាមរយៈប្រព័ន្ធអនុគ្រោះពន្ធនេះ ក្នុងត្រីមាសទី១ នៃឆ្នាំ២០១៩ កម្ពុជាបាននាំចេញទំនិញទៅអាមេរិកគិតជាទឹកប្រាក់ប្រមាណជាង ១ពាន់លានដុល្លារ កើនឡើង ២៤ភាគរយ បើធៀបនឹងទំហំនៃការនាំចេញក្នុងរយៈពេលដូចគ្នា៕