លោកនាយករដ្ឋមន្ត្រីហ៊ុន សែន បានប្រកាសជាថ្មីទៀត ថាខ្លួននឹងមិនញុះញ៉មឬ អោនក្បាលចំពោះការគាបសង្កត់ឬ គំរាមកំហែងរបស់បរទេសណាមួយនោះឡើយ។
ថ្លែងក្នុងពិធីរំឭកខួបលើកទី៦៨នៃការបង្កើតគណបក្សប្រជាជនកម្ពុជានៅព្រឹកនេះ លោកហ៊ុន សែន បានបញ្ជាក់ជំហថាកម្ពុជាមិននៅក្រោមការត្រួតត្រារបស់ប្រទេសណាមួយឡើយ ហើយកម្ពុជាក៏មិនផ្តល់ឱកាសសម្រាប់ឱ្យបរទេសចូលមកជ្រៀតជ្រែកកិច្ចការផ្ទៃក្នុងរបស់ខ្លួននោះដែរ។
លោកបានថ្លែងទៀតថា រដ្ឋាភិបាលរបស់លោកកន្លងមកធ្លាប់រងនូវការដាក់ទណ្ឌកម្មដ៏អយុត្តិធម៌ពីសំណាក់ប្រទេសខាងក្រៅរួចទៅហើយ។ ដូច្នេះរដ្ឋាភិបាលរបស់លោកពេលនេះ ក៏មិនត្រូវឱនក្បាលចំពោះមុខការគាបសង្កត់ឬ ការគំរាមកំហែងណាមួយទៀតនោះដែរ ដោយថា ការមិនអោនក្បាលរបស់រដ្ឋាភិបាលលោក ជាកិត្តិយសរបស់ជាតិ។
លោកមានប្រសាសន៍ថា៖ «យើងមិនត្រូវអោនក្បាលចំពោះមុខការគាបសង្កត់ឬ ការគំរាមកំហែងណាមួយឡើយ។ យើងធ្លាប់ទទួលរងរួចមកហើយនូវការដាក់ទណ្ឌកម្មដ៏អយុត្តិធម៌បំផុតពីសំណាក់ប្រទេសក្រៅ។ ការមិនឱនក្បាលរបស់យើង វាជាកិត្តិយសជាតិរបស់យើង។ វាជាការប្រមាថដ៏ធ្ងន់ធ្ងរសម្រាប់ជាតិយើង ប្រសិនបើយើងយកអធិបតេយ្យជាតិយើង ទៅដោះដូរជាមួយជំនួយ ឬការអនុគ្រោះណាមួយពីខាងក្រៅ»។
ការថ្លែងរបស់លោកហ៊ុន សែន ចំពោះភាពមិនចុះញ៉មជាមួយបរទេសនេះ មិនមែនជាលើកទីមួយទេ ដែលគេដឹងថាជាការឆ្លើយតបទៅនឹងសហភាពអឺរ៉ុប ចំពោះការព្រមានអំពីលទ្ធភាពឆ្ពោះទៅព្យួរប្រព័ន្ធអនុគ្រោះពន្ធ EBA ពីកម្ពុជា ប្រសិនបើរដ្ឋាភិបាលនេះមិនព្រមស្តារលទ្ធិប្រជាធិបតេយ្យនិងគោរពសិទ្ធិមនុស្សឡើងវិញ។
ក្រៅពីការប្រកាន់ជំហមិនអោនក្បាលចំពោះការព្រមានដាក់ទណ្ឌកម្មសេដ្ឋកិច្ចណាពីសំណាក់សហគមន៍អន្តរជាតិ លោក ហ៊ុន សែន ក៏ធ្លាប់បានប្រកាសថាលោកនឹងយកហេតុផលនៃការដាក់ទណ្ឌកម្មសេដ្ឋកិច្ចមកលើកម្ពុជា ដើម្បីកម្ទេចជីវិតក្រុមប្រឆាំង មិនឱ្យក្រុមនេះអាចមានកម្លាំងចូលរួមការបោះឆ្នោតឆ្នាំ២០២២និង២០២៣ឡើយ។
រដ្ឋាភិបាលលោកហ៊ុន សែន ក៏បានប្រកាសពីកំណែទម្រង់ផ្ទៃក្នុង និងកែទម្រង់លើវិស័យឯកជនមួយចំនួន ដើម្បីត្រៀមទប់ទល់នឹងការដកប្រព័ន្ធអនុគ្រោះពន្ធណាមួយកើតឡើងទៀតផង។
ចំណែកអតីតប្រធានគណបក្សសង្រ្គោះជាតិ ដែលកំពុងរស់នៅនិរទេសខ្លួននៅក្រៅប្រទេស លោក សម រង្ស៊ី កាលពីថ្ងៃទី២៦ មិថុនា បានប្រកាសថ្កោលទោស និងដាក់បន្ទុកទៅលើលោកនាយករដ្ឋមន្ដ្រី ហ៊ុន សែន ប្រសិនបើកម្ពុជាបាត់បង់ប្រព័ន្ធអនុគ្រោះពន្ធ «អ្វីគ្រប់យ៉ាងលើកលែងតែអាវុធ» ឬហៅកាត់ថា ប្រព័ន្ធ EBA របស់អឺរ៉ុបមែននោះ។
លោកបន្ថែមថា៖ « បើលោក ហ៊ុន សែន មិនព្រមធ្វើតាមសំណើរបស់អឺរ៉ុបទេ គឺលោក ហ៊ុន សែន ហ្នឹងហើយជាអ្នកទទួលខុសត្រូវ ធ្វើឲ្យកម្មករបាត់បង់ការងារ ឲ្យប្រជាពលរដ្ឋជួបការលំបាក គឺលោក ហ៊ុន សែន ហ្នឹងហើយអ្នកទទួលខុសត្រូវ។ មានអីពិបាក ដោះលែងលោក កឹម សុខា មានអីពិបាក ឥឡូវទម្លាក់ចោលការចោទប្រកាន់វិញទៅ ឲ្យគណបក្សសង្គ្រោះជាតិដំណើរការឡើងវិញទៅ មានអីពិបាក»។ »
ប្រធានក្រុមអ្នកវិភាគវ័យក្មេង កញ្ញា លី ស្រីស្រស់ បានលើកឡើងថាការសម្របសម្រួលណាមួយដើម្បីផលប្រយោជន៍ជាតិ ពុំមែនជាការអោនក្បាលនោះទេ។ កញ្ញាថា សម្រាប់ការទាមទាររបស់អឺរ៉ុប និងអាមេរិក ឱ្យកម្ពុជាស្តារលទ្ធិប្រជាធិបតេយ្យ និងគោរពសិទ្ធិមនុស្សនោះ គឺពុំមែនស្ថិតនៅក្នុងទម្រង់ដែលអូសទាញឱ្យកម្ពុជាដើរលើផ្លូវអាក្រក់នោះឡើយ។
កញ្ញាបន្ថែមថា៖ «ខ្ញុំចង់លើកឡើងថា តើយើងគិតថាវាជាការអោនក្បាល ហើយទីប៉ុណ្ណោះសហភាពអឺរ៉ុប នឹងដកប្រព័ន្ធអនុគ្រោះពន្ធ សួរថាការអោនក្បាលឬ ការបាត់បង់ប្រយោជន៍ជាតិមួយណាសំខាន់ជាង? ដែលយើងមើលឃើញពីផលប៉ះពាល់នៃការ ដកប្រព័ន្ធអនុគ្រោះពន្ធ EBA និងផលប៉ះពាល់នៃការដកប្រព័ន្ធអនុគ្រោះពន្ធ GSP របស់សហរដ្ឋអាមេរិក»។
កាលពីថ្ងៃទី១១ ខែកុម្ភៈ សហភាពអឺរ៉ុបបានប្រកាសអំពីការចាប់ផ្ដើមដំណើរការដែលឈានទៅព្យួរជាបណ្ដោះអាសន្ននូវប្រព័ន្ធអនុគ្រោះពន្ធ «អ្វីគ្រប់យ៉ាងលើកលែងតែអាវុធ» ពីកម្ពុជា បន្ទាប់ពីមើលឃើញការធ្លាក់ចុះនៃលទ្ធិប្រជាធិបតេយ្យ បញ្ហាសិទ្ធិមនុស្ស និងនីតិរដ្ឋ នៅក្នុងរយៈពេល ១៨ខែចុងក្រោយមកនេះ។
ក្រោយការប្រកាសរបស់អឺរ៉ុបមួយថ្ងៃ សហរដ្ឋអាមេរិកបានបង្ហាញក្តីបារម្ភចំពោះបញ្ហានេះ ដោយអាមេរិកបង្ហាញផ្លូវថា កម្ពុជានៅតែមានឱកាសក្នុងការជៀសផុតពីផលអវិជ្ជមានផ្នែកសេដ្ឋកិច្ច នៃការដកប្រព័ន្ធការអនុគ្រោះពន្ធ EBA ដោយគ្រាន់តែធ្វើតាមការទាមទាររបស់អឺរ៉ុប ដូចជាស្តារឡើងវិញនូវលទ្ធិប្រជាធិបតេយ្យ ពហុបក្សពិតប្រាកដ ដូចមានចែងនៅក្នុងរដ្ឋធម្មនុញ្ញនៃប្រទេសកម្ពុជា។
ប្រទេសមហាអំណាចមួយនេះ បានទាមទារឱ្យរដ្ឋាភិបាលទម្លាក់ចោលនូវបទចោទប្រកាន់លើលោក កឹម សុខា និងការចោទប្រកាន់តាមទំនើងចិត្តទាំងអស់ ប្រឆាំងនឹងអ្នកទោសនយោបាយដទៃទៀត ហើយអនុញ្ញាតអោយសហជីព អង្គការសារព័ត៌មានឯករាជ្យ និងក្រុមដទៃទៀតនៃសង្គមស៊ីវិល ដំណើរការដោយគ្មានការរឹតត្បិត។
អាមេរិក ក៏បានណែនាំផងដែរ ឲ្យមេដឹកនាំកម្ពុជាតម្កល់សុខុមាលភាពរបស់ប្រទេសឲ្យខ្ពស់ជាងផលប្រយោជន៍ផ្ទាល់ខ្លួន និងផលប្រយោជន៍នយោបាយ៕