មន្ត្រីជាន់ខ្ពស់អះអាងថា សភាបានយល់ព្រមឱ្យក្រុមហ៊ុនវិនិយោគថាមពលអគ្គិសនីបន្ថែមនៅខេត្តចំនួន៣ ដើម្បីធានាដល់ការផ្តត់ផ្គង់ឲ្យមានតម្លៃទាប។
អ្នកនាំពាក្យរដ្ឋសភា លោក ឡេង ប៉េងឡុង ប្រាប់ VOD ថា សភាកាលពីថ្ងៃចន្ទម្សិលមិញ បានអនុម័តលើសេចក្តីព្រាងច្បាប់ ដើម្បីបើកផ្លូវឱ្យក្រុមហ៊ុនវិនិយោគថាមពលអគ្គិសនីនៅខេត្តពោធិ៍សាត់ កំពង់ស្ពឺ និងកំពង់ឆ្នាំង។
អ្នកនាំពាក្យរូបនេះបញ្ជាក់ថា ទីតាំងផលិតថាមពលអគ្គិសនីទាំងនេះ មាន៣ទីតាំង ដំឡើងផ្ទាំងសូឡាដើម្បីផលិតអគ្គិសនីដើរដោយពន្លឺព្រះអាទិត្យ និង១ទីតាំង សិក្សាគម្រោងវារីអគ្គិសនីទាញចេញពីស្ទឹងពោធិ៍សាត់ ។
លោក ឡេង ប៉េងឡុង ឲ្យដឹងទៀតថា ការដែលសភាយល់ព្រមបែបនេះ ដើម្បីសម្រួលដល់ការអភិវឌ្ឍ និងបញ្ចុះតម្លៃអគ្គិសនីដល់អ្នកប្រើប្រាស់ ។
លោក មានប្រសាសន៍ថា៖ «យើងសព្វថ្ងៃនៅទិញ [អគ្គិសនី] ពីប្រទេសថៃ និងវៀតណាម ដូច្នេះ វាអត់ទាន់គ្រប់ទេ។ យើងខំផលិតអគ្គិសនីឱ្យកាន់តែច្រើន ដើម្បីឱ្យវាមានតម្លៃកាន់តែថោក ដើម្បីសម្រួលដល់ពលរដ្ឋប្រើប្រាស់ផង ជំរុញដល់ការអភិវឌ្ឍផង»។
បើតាមសេចក្តីប្រកាសរបស់រដ្ឋសភា ចុះថ្ងៃទី១ ខែកក្កដា ការយល់ព្រមឱ្យក្រុមហ៊ុនវិនិយោគថាមពលអគ្គិសនីបន្ថែមនេះ នឹងទទួលបានការផ្គត់ផ្គង់ថាមពលអគ្គិសនី ២៨០មេហ្គាវ៉ាត់បន្ថែមទៀត។
នៅដើមឆ្នាំនេះ ការផ្គត់ផ្គង់អគ្គិសនី ត្រូវកាត់ផ្តាច់៦ម៉ោងក្នុង១ថ្ងៃ ដែលអគ្គិសនីកម្ពុជាបំភ្លឺថា មកពីកម្ពុជាជួបបញ្ហាអាកាសធាតុក្តៅ។ ករណីនេះ បង្កឱ្យមានការព្រួយបារម្ភពីពលរដ្ឋ និងអ្នកវិនិយោគ។
ប៉ុន្តែ លោកនាយករដ្ឋមន្ត្រី ហ៊ុន សែន អំឡុងទៅទស្សនកិច្ចនៅប្រទេសជប៉ុន នាចុងខែឧសភា បានលើកឡើងថា បញ្ហាកង្វះអគ្គិសនីនឹងលែងកើតមានទៀតហើយ។
បើតាមមេដឹកនាំរូបនេះ កម្ពុជានឹងបន្ថែមការផ្គត់ផ្គង់ក្នុងបរិមាណ ៥០០មេហ្គាវ៉ាត់បន្ថែមទៀតពីប្រភពនានា រួមទាំងពន្លឺព្រះអាទិត្យ បញ្ជូនម៉ាស៊ីនអគ្គិសនីពីប្រទេសហ្វាំងឡង់ ចំនួន ២០០មេហ្គាវ៉ាត់ និងពីប្រទេសអាល់ឡឺម៉ង់ ចំនួន ២០០មេហ្គាវ៉ាត់ ដើម្បីយកមកបម្រុងទុក ៕
