ប្រមុខរដ្ឋាភិបាលបានអំពាវនាវដល់ប្រជាពលរដ្ឋ និងជាពិសេសទៅដល់ស្ថាប័នរដ្ឋទូទាំងប្រទេស ចូលរួមសន្សំសំចៃនូវការប្រើប្រាស់អគ្គិសនី ក្រោយតម្លៃអគ្គិសនីឈានដល់ដំណាក់កាលខាតបង់ក្នុងទំហំទឹកប្រាក់ប្រមាណជាង១០០លានដុល្លារ។
ក្នុងពិធីជួបសំណេះសំណាលជាមួយគណៈប្រតិភូកីឡា អាស៊ានប៉ារ៉ាហ្គេម (ASEAN Para Games) នៅព្រឹកថ្ងៃទី០៦ ខែកក្កដា ឆ្នាំ២០២២ លោកនាយករដ្ឋមន្រ្តី ហ៊ុន សែន បានអំពាវនាវដល់ប្រជាពលរដ្ឋ និងបណ្ដាស្ថាប័នជាតិទាំងអស់ ឱ្យខិតខំសន្សំសំចៃនូវការប្រើប្រាស់អគ្គិសនី ខណៈនេះជាលើកដំបូងនៅក្នុងប្រវត្តិសាស្ត្រអគ្គិសនីកម្ពុជា ដែលបានឈានចូលដល់ដំណាក់កាលនៃការខាតបង់។
លោកបន្តថា ការខាតបង់ទៅលើបញ្ហាអគ្គិសនីនេះកើតឡើងក្រោយមានវិបត្តិសង្គ្រាមរវាងរុស្ស៊ី និងអ៊ុយក្រែន និងការដាក់ទណ្ឌកម្មគ្នា ដែលធ្វើឱ្យវិបត្តិថាមពលកើតឡើងពេញបន្ទុកនៅលើពិភពលោក។
លោកនាយករដ្ឋមន្ត្រី ហ៊ុន សែន ថ្លែងថា៖ «អ៊ីចឹងខ្ញុំសូមអំពាវនាវគ្រប់ទីកន្លែងទាំងអស់ឱ្យយកចិត្តទុកដាក់ទៅលើការសន្សំសំចៃភ្លើង [អគ្គិសនី] ហើយចាប់ផ្ដើមពីស្ថាប័នរដ្ឋដែលប្រើប្រាស់ដោយថវិកាជាតិ ព្រោះបើមិនអ៊ីចឹងទេ គឺយើងនឹងទទួលការខាតបង់កាន់តែធំ។ ក្នុងឆ្នាំនេះ តាមការគិត យើងខាតប្រមាណជាង១០០លានដុល្លារ ដែលត្រូវខាតបង់ ដែលផ្ដើមចេញពីសង្គ្រាមរុស្សី-អ៊ុយក្រែនម្ខាង តែម្ខាងទៀតផ្ដើមចេញពីការដាក់ទណ្ឌកម្ម»។
ទាក់ទិននឹងបញ្ហាអគ្គិសនីនេះដែរ លោកថា រដ្ឋាភិបាលបានជួបពិភាក្សាជាមួយមន្ត្រីជំនាញ កាលពីថ្ងៃម្សិលមិញ ដើម្បីរាយការណ៍អំពីវិធានការទាំងឡាយ ដែលក្នុងនោះ រដ្ឋាភិបាលគ្រោងនឹងប្រកាសការបញ្ចុះថ្លៃអគ្គិសនីនៅចុងឆ្នាំ២០២២នេះ ប៉ុន្តែគម្រោងបញ្ចុះថ្លៃអគ្គិសនីនេះមិនអាចធ្វើទៅបាន ដោយសារតែបញ្ហាសង្គ្រាមនៅអ៊ុយក្រែន ដែលធ្វើឱ្យមានវិបត្តិថាមពលនេះកើតឡើង៕
