មន្រ្តីការទូតអង់គ្លេស និងចិន បន្តបោះពាក្យសម្តីដាក់គ្នាខ្លាំងៗពាក់ព័ន្ធនឹងការធ្វើបាតុកម្មតវ៉ារបស់ពលរដ្ឋហុងកុង។
កាលពីថ្ងៃទី១ ខែកក្កដា ក្នុងពេលដែលរដ្ឋាភិបាលប្រារព្ធខួប២២ឆ្នាំដែលអង់គ្លេសប្រគល់ទឹកដីហុងកុងឲ្យចិន ពលរដ្ឋហុងកុងបាននាំគ្នាធ្វើបាតុកម្ម។ ក្រុមបាតុករបានសម្រុកចូលក្នុងអគារសភាហុងកុង ដែលជាហេតុធ្វើឲ្យសមត្ថកិច្ចបាញ់ឧស្ម័នបង្ហូរទឹកភ្នែកបំបែកពួកគេ។
ក្រុមបាតុករបានទាមទារឱ្យរដ្ឋាភិបាលទម្លាក់ចោលទាំងស្រុងសេចក្តីស្នើច្បាប់ធ្វើបត្យាប័នអ្នកទោស ស្នើឱ្យមេដឹកនាំហុងកុង លោកស្រី Carrie Lam ចុះចេញពីតំណែង និងស៊ើបអង្កេតការប្រើប្រាស់អំពើហិង្សារបស់ប៉ូលីសទៅលើក្រុមបាតុករ។
ប្រមុខការទូតអង់គ្លេស លោក Jeremy Hunt បានសរសេរនៅលើបណ្ដាញTwitter របស់លោកកាលពីថ្ងៃទី១ ខែកក្កដា ថាអង់គ្លេសគាំទ្រពលរដ្ឋហុងកុងក្នុងការប្រើប្រាស់សិទ្ធរបស់ពួកគេក្នុងការធ្វើបាតុកម្មដោយអហិង្សា។ ទោះយ៉ាងណាក៏ដោយ លោកនៅតែទទូចឲ្យក្រុមបាតុករទាំងនោះបញ្ចៀសឲ្យបាននូវការប្រើហិង្សា ហើយត្រូវធ្វើអ្វីឲ្យស្របទៅតាមច្បាប់។
រដ្ឋមន្រ្តីការបរទេស អង់គ្លេសរូបនេះ ក៏បានផ្ញើសារទៅកាន់រដ្ឋាភិបាលចិនផងដែរក្នុង Twitter ដែលលោកបង្ហោះកាលពីថ្ងៃទី៣ ខែកក្កដា។ លោក បានសរសេរថា ទំនាក់ទំនងល្អរវាងប្រទេសទាំងពីរ គឺផ្អែកលើការគោរពគ្នាទៅវិញទៅមក និងការគោរពកិច្ចព្រមព្រៀងរួមដែលបានធ្វើជាមួយគ្នា។ លោក បញ្ជាក់ថា នេះជាវិធីល្អបំផុតដើម្បីរក្សាទំនាក់ទំនងរវាងអង់គ្លេស និងចិន។
ឯកអគ្គរាជទូតចិនប្រចាំទីក្រុងឡុង លោក Liu Xiaoming បានលើកឡើងក្នុងសន្និសីទសារព័ត៌មានមួយកាលពីម្សិលមិញថា ការថ្លែងរបស់ប្រមុខការទូតអង់គ្លេស លោក Jeremy Hunt បានបំផ្លាញដល់ទំនាក់ទំនងរវាងប្រទេសទាំងពីរ។ លោក Liu Xiaoming បានបញ្ជាក់ស្រដៀងគ្នានឹងលោក Jeremy Hunt ដែរ ដោយថា ទំនាក់ទំនងរវាងចិន និងអង់គ្លេស ត្រូវមានការគោរពគ្នាទៅវិញទៅមកជាមូលដ្ឋាន។ លោក ព្រមានថា ប្រសិនបើអង់គ្លេសនៅតែមិនទទួលស្គាល់ពីអធិបតេយ្យភាពរបស់ចិនលើដែនដីហុងកុង ហើយនូវតែបន្តលូកដៃចូលកិច្ចការផ្ទៃក្នុងដែនកោះមួយនេះ នោះទំនាក់ទំនងរវាងប្រទេសទាំងពីរនឹងអាចមានបញ្ហាច្រើនជាងនេះ។
ចាប់តាំងពីថ្ងៃចន្ទមក អ្នកនាំពាក្យក្រសួងការបរទេសចិន តែងតែប្រើវេទិការសន្និសីទសារព័ត៌មានប្រចាំថ្ងៃរបស់ខ្លួន វាយប្រហារ និងឆ្លើយតបទៅនឹងភាគីអង់គ្លេសជុំវិញការអត្ថាធិប្បាយនានាទាក់ទងនឹងបាតុកម្មរបស់ពលរដ្ឋហុងកុង។
អ្នកនាំពាក្យក្រសួងការបរទេសចិន លោក Geng Shuang បានថ្លែងកាលពីម្សិលមិញថា ប្រមុខការទូតអង់គ្លេសហាក់ស្ថិតនៅក្នុងភាពស្រមើស្រមៃពីអនុត្តរភាពនៃអាណានិគមរបស់ខ្លួន ហើយនៅតែរិះគន់អ្នកដទៃថាអន់ជាងខ្លួន។
លោកថា ចាប់តាំងពីអង់គ្លេសប្រគល់ដែនដីហុងកុងឲ្យចិនវិញនៅថ្ងៃទី១ ខែកក្កដា ឆ្នាំ១៩៩៧មក ដែនកោះនេះត្រូវស្ថិតក្រោមការគ្រប់គ្រងតាមរដ្ឋធម្មនុញ្ញរបស់ចិន។ លោក បន្ថែមថា អង់គ្លេសគ្មានអធិបតេយ្យភាព និងសិទ្ធិណាមួយដើម្បីគ្រប់គ្រងហុងកុងទៀតឡើយ ហើយគ្មានសូម្បីតែអះអាងពីទំនូលខុសត្រូវណាមួយ។
លោក Geng Shuang បានចោទសួរទៅអង់គ្លេសផងដែរ ថាតើហុងកុងនៅពេលដែលគ្រប់គ្រងដោយអង់គ្លេសមានប្រជាធិបតេយ្យដែរឬទេ។ លោកថា កាលនោះប្រជាពលរដ្ឋហុងកុងគ្មានឡើយសូម្បីតែសិទ្ធិធ្វើការតវ៉ាតាមដងផ្លូវ។ អ្នកនាំពាក្យក្រសួងការបរទេសចិនរូបនេះ បន្តថា ចាប់តាំងពីអនុវត្តគោលនយោបាយ«ប្រទេសមួយ ប្រព័ន្ធពីរ» ពលរដ្ឋហុងកុងបានសប្បាយរីករាយក្នុងការប្រើប្រាស់សិទ្ធិ និងសេរីភាពតាមបែបប្រជាធិបតេយ្យ។
លោក Geng Shuang បានហៅបាតុកម្មកាលពីថ្ងៃចន្ទថា ជាការជាន់ឈ្លីនីតិរដ្ឋ និងបំផ្លាញស្ថិរភាពរបស់ដែនដីហុងកុង។ ក្រុងប៉េកាំង បានប្រកាសគាំទ្ររាល់ចំណាត់ការរបស់រដ្ឋាភិបាលហុងកុង ដើម្បីរក្សាសណ្តាប់ធ្នាប់ ការរីកចម្រើន និងស្ថិរភាពដែនកោះមួយនេះ។
តាមការចុះផ្សាយរបស់សារព័ត៌មាន Sraits Times របស់សឹង្ហបុរី គិតមកត្រឹមថ្ងៃទី៤ ខែកក្កដានេះ អាជ្ញាធរហុងកុងបានចាប់ខ្លួនបាតុករចំនួន១២នាក់ដែលពាក់ព័ន្ធនឹងបាតុកម្មកាលពីថ្ងៃទី១ ខែកក្កដា៕