កម្ពុជា បានបង្កើតមជ្ឈមណ្ឌលសិក្សាតាមប្រព័ន្ធអ៊ីនធឺណិត កម្រិតមូលដ្ឋានត្រឹមថ្នាក់ទី៩ ចំនួន២កន្លែងបន្ថែមទៀត ដើម្បីជួយដល់អ្នកដែលបានបោះបង់ការសិក្សាអាចទទួលបានការសិក្សាកម្រិតមូលដ្ឋាន ដែលអាចយកចំណេះវិជ្ជាដែលបានសិក្សានេះទៅប្រើប្រាស់ធ្វើឲ្យប្រសើរឡើងនូវផលិតភាព និងបំនិនជីវិតរបស់ពួកគេ។
កាលពីម្សិលមិញ រដ្ឋាភិបាលកម្ពុជា និងអង្គការយូណេស្គូ បានដាក់សម្ពោធរួមគ្នានូវមជ្ឈមណ្ឌលសិក្សាអប់រំកម្រិតមូលដ្ឋាននេះចំនួន២នៅក្នុងខេត្តសៀមរាប ដែលមានទីតាំងនៅក្នុងវិទ្យាស្ថានជាតិពហុបច្ចេកទេសអង្គរ និងវិទ្យាស្ថានពហុបច្ចេកទេសភូមិភាគតេជោសែនសៀមរាប។
ក្នុងសេចក្តីប្រកាសព័ត៌មានចុះថ្ងៃទី១០ ខែកក្កដា ក្រសួងការងារឲ្យដឹងថា កម្មវិធីបណ្ដុះបណ្ដាលការសិក្សាកម្រិតមូលដ្ឋាននេះនឹងជួយដល់យុវជនដែលបានបោះបង់ការសិក្សា ដើម្បីឲ្យពួកគេទទួលបានការបណ្ដុះបណ្ដាលការសិក្សាថ្នាក់មូលដ្ឋានដែលមានតម្លៃស្មើថ្នាក់ទី៩ ដែលការអប់រំកម្រិតមូលដ្ឋាននេះនឹងជួយដល់ពួកគេឲ្យមានចំណេះដឹង និងជំនាញ ដើម្បីធ្វើឲ្យប្រសើរឡើងនូវផលិតភាព និងបំនិនជីវិត។
ក្នុងសេចក្តីប្រកាសនោះ លើកឡើងថា៖ «សិស្សដែលបានចុះឈ្មោះ នឹងត្រូវបានផ្ដល់ជូននូវសេវាអ៊ីនធឺណិតដោយ Smart Axiata ដោយឥតគិតថ្លៃសម្រាប់ការសិក្សាតាមប្រព័ន្ធអេឡិចត្រូនិច ស្របតាមតម្រូវការរបស់ពួកគេ។ សិស្សដែលបានបញ្ចប់មុខវិជ្ជាទាំងអស់ដោយជោគជ័យ នឹងឆ្លងកាត់ការវាស់ស្ទង់សមត្ថភាពតាមរយៈការប្រឡង និងទទួលបានវិញ្ញាបនបត្រអប់រំមូលដ្ឋាន ហើយមានឱកាសបន្តការសិក្សារបស់គេទាំងនៅវិទ្យាល័យវិជ្ជាជីវៈ ឬក៏នៅតាមគ្រឹះស្ថានអប់រំបណ្ដុះបណ្ដាលបច្ចេកទេស និងវិជ្ជាជីវៈ»។
អនុប្រធានការិយាល័យបណ្ដុះបណ្ដាលពិសេស និងយេនឌ័រ នៃនាយកដ្ឋានបណ្ដុះបណ្ដាលរបស់ក្រសួងការងារ អ្នកស្រី ឡុង សុផាន មានប្រសាសន៍ថា ការបង្កើតកម្មវិធីនេះឡើងគឺដើម្បីផ្ដល់ឱកាសដល់អ្នកដែលធ្លាប់បានបោះបង់ការសិក្សាឲ្យទទួលបានការអប់រំមូលដ្ឋានពេញលេញ។ អ្នកស្រីបន្ថែមថា យុវជនដែលមានបំណងចង់សិក្សាក្នុងកម្មវិធីថ្មីនេះ អាចចុះឈ្មោះបានតាមរយៈប្រព័ន្ធអ៊ីនធឺណិតតាមការណែនាំរបស់គេហទំព័រហ្វេសបុក ប៊ីប (Basic Education Equivalency Programme -BEEP) ឬទៅទាក់ទងផ្ទាល់នៅមជ្ឈមណ្ឌលសិក្សាបាន។
ចំពោះការសិក្សាវិញ អ្នកស្រីបញ្ជាក់ថា មិនកំណត់រយៈពេលនោះទេ ហើយបេក្ខជនអាចធ្វើការសិក្សានៅផ្ទះរបស់ខ្លួន ឬក៏មកសិក្សានៅមជ្ឈមណ្ឌលដោយផ្ទាល់បាន។
អ្នកស្រី ឡុង សុផាន មានប្រសាសន៍ថា៖ «មិនតម្រូវឲ្យសិស្សមករៀននៅមណ្ឌលតែម្ដងនោះទេ ព្រោះអីយើងរៀនហ្នឹងគឺយើងអាចរៀនតាមអនឡាញ តែនៅក្នុងហ្នឹងគាត់អាចមកជួបអ្នកសម្របសម្រួលនៅតាមមណ្ឌលហ្នឹងរៀងរាល់២សប្ដាហ៍ម្ដង ឬក៏រាល់ពេលដែលគាត់មានបញ្ហា។ ហើយបើសិនជាគាត់អត់មានស្មាតហ្វូន ឬក៏កុំព្យូទ័រសម្រាប់រៀនទេ គាត់អាចមករៀននៅមណ្ឌល ព្រោះអីនៅមណ្ឌលយើងមាន Tablet សម្រាប់ពួកគាត់អាចចូលអង្គុយរៀនបាន»។
អ្នកស្រីបញ្ជាក់ថា សិស្សក្រោយពីប្រលងបញ្ចប់ការសិក្សាកម្រិតមូលដ្ឋាននេះហើយ នឹងទទួលសញ្ញាប័ត្រដែលមានកម្រិតស្មើនឹងសញ្ញាប័ត្រកម្រិតមូលដ្ឋានរបស់រដ្ឋ ហើយពួកគេអាចធ្វើការសិក្សាបន្តទៀតនៅសាលារដ្ឋ ឬអាចបន្តការសិក្សាបច្ចេកទេសនៅក្រសួងការងារបាន។
មន្ត្រីកម្មវិធីអប់រំរបស់អង្គការយូណេស្កូប្រចាំកម្ពុជា លោក លៀវ គឹមឡាយ មានប្រសាសន៍ថា ការអប់រំកម្រិតមូលដ្ឋាននេះមានសារៈសំខាន់ណាស់ដល់មនុស្សទូទៅ ដើម្បីឲ្យពួកគេមានលទ្ធភាពក្នុងការអាន និងចំណេះដឹងទូទៅគ្រប់គ្រាន់ ដែលអាចឲ្យពួកគេអាចធ្វើការសិក្សាបច្ចេកទេសបានងាយស្រួល។ លោកបន្ថែមថា តាមរយៈកម្មវិធីនេះ វានឹងអាចជួយឲ្យអ្នកដែលបោះបង់ការសិក្សាចាប់ពីថ្នាក់ទី៦ ដល់ទី៩ អាចទទួលបានការសិក្សាមូលដ្ឋានពេញលេញ ខណៈអ្នកដែលបានបោះបង់ការសិក្សានៅថ្នាក់នេះមានចំនួនស្ទើរតែពាក់កណ្ដាលនៃសិស្សដែលបន្តការសិក្សានៅសាលារដ្ឋ។
លោកថា៖ «កម្មវិធី ប៊ីប នេះគឺជាស្ពានចម្លងមួយដ៏សំខាន់ដែលបានផ្ដល់ឱកាសដល់ពួកគាត់ ជាពិសេសដល់អ្នកដែលរៀនដល់ថ្នាក់ទី៦ ហើយអត់បានបន្ត ឬក៏អ្នកដល់ថ្នាក់ទី៧ ទី៨ ទី៩ ឬក៏អ្នកប្រលងទី៩អត់ជាប់ហ្នឹង គាត់មានឱកាសទី២។ រៀនហើយបានទទួលនូវសញ្ញាបត្រ ដែលមានតម្លៃស្មើថ្នាក់ទី៩ ហើយអាចយកទៅសញ្ញាបត្រដែលបាននេះយកទៅប្រើប្រាស់ ដើម្បីបានទទួលសិក្សាបន្តនៅវិទ្យាស្ថានបណ្ដុះបណ្ដាលវិជ្ជាជីវៈ ឬក៏វិទ្យាល័យបាន»។
បើតាមលោក គឹមឡាយ ការបើក២មជ្ឈមណ្ឌលចុងក្រោយនេះ ជាការបញ្ចប់គម្រោងទីមួយនៅកម្ពុជា ដែលគម្រោងទី២នឹងចាប់ផ្ដើមនៅដើមឆ្នាំ២០២០ខាងមុខ ដែលគោលដៅបន្ទាប់អាចនៅខេត្តភាគឦសាននៃប្រទេសកម្ពុជា។
បច្ចុប្បន្ន មជ្ឈមណ្ឌលសិក្សាកម្រិតមូលដ្ឋានតាមរយៈអ៊ីនធឺណិតនេះ បានបើកចំនួន១០ទីតាំង ក្នុងនោះ៥នៅភ្នំពេញ និង៥នៅសៀមរាប ដោយមានអ្នកចូលរៀនមាន១៤៨នាក់ ស្រីជិតពាក់កណ្ដាល ដែលអ្នកចូលរៀនមានអាយុពីជាង២០ ដល់ជាង៣០ឆ្នាំ៕
