របាយការណ៍នគរបាលជាតិ បង្ហាញថា គ្រឿងញៀនសរុបដែលចាប់បានមានការកើនឡើងដល់ទៅជាងពាក់កណ្ដាល បើប្រៀបធៀបរយៈពេលដូចគ្នាកាលពីឆ្នាំមុន។
យោងតាមការចុះផ្សាយរបស់អគ្គស្នងការនគរបាលជាតិឲ្យដឹងថា យុទ្ធនាការបង្ក្រាបគ្រឿងញៀនក្នុងរយៈពេល៦ខែដើមឆ្នាំ២០១៩នេះ អាជ្ញាធរបានបង្ក្រាបបទល្មើសគ្រឿងញៀនបានចំនួន៣ ៦៧៦ករណី ឃាត់ខ្លួនមនុស្សបានជាង៧ពាន់៦រយនាក់ ក្នុងនោះស្រី៥៤៥នាក់ និងចាប់បានគ្រឿងញៀនសរុបជាង៣១២គីឡូក្រាម។
បើពិនិត្យទៅលើចំនួននៃការបង្ក្រាបនេះទៅនឹងការបង្ក្រាបកាលពីឆ្នាំមុន ឃើញថា មានការថយចុះនៃចំនួនបទល្មើសគ្រឿងញៀន (ឆមាសទី១ ឆ្នាំ២០១៨ មាន៣៨៣៨ករណី ឃាត់ខ្លួនមនុស្សបានជាង៧៥៨០នាក់) តែចំនួនគ្រឿងញៀនសរុបដែលមានចាប់បានមានការកើនឡើងទ្វេដង ខណៈក្នុងរយៈពេលដូចគ្នាកាលពីឆ្នាំមុន អាជ្ញាធរចាប់បានគ្រឿងញៀនតែជាង១៤៥គីឡូប៉ុណ្ណោះ។
អគ្គលេខាធិការអាជ្ញាធរជាតិប្រយុទ្ធប្រឆាំងគ្រឿងញៀន លោក មាស វីរិទ្ធិ មានប្រសាសន៍ប្រាប់VOD ថា មូលហេតុដែលធ្វើចំនួនថ្នាំញៀនដែលចាប់បាននៅពាក់កណ្ដាលឆ្នាំនេះមានចំនួនច្រើននោះ គឺដោយសារអាជ្ញាធរធ្វើការបង្ក្រាបចំទីតាំងដែលជាកន្លែងកែច្នៃ និងចែកចាយធំៗ។ លោកបញ្ជាក់ថា ការចាប់បានក្នុងចំនួនច្រើនបែបនេះ វាជាសញ្ញាមួយល្អនៃយុទ្ធនាការបង្ក្រាបគ្រឿងញៀនរបស់កម្ពុជា ទោះជាយ៉ាងណា លោកក៏បានបង្ហាញក្ដីបារម្ភផងដែរទៅលើបញ្ហានេះ។
លោក មាស វីរិទ្ធិ៖ «ការបារម្ភគឺនៅតែមាន ដោយសារតែនិន្នាការនៃការផលិតគ្រឿងញៀននៅទូទាំងពិភពលោក គឺមានការកើនឡើង មានការប្រែប្រួល។ ប្រែប្រួលពីការដាំដុះដំណាំអាភៀនទៅជាការរីករាលដាលនៃការផលិតគ្រឿងញៀនសំយោគប្រភេទមេតំហ្វេតាមីន អាហ្នឹងគឺកើនឡើង។ ហើយគេព្យាករទៀតថា និន្នាការនៃការកើនឡើងនៅឆ្នាំក្រោយៗទៀតនឹងមានការប្រែប្រួល»។
ទីប្រឹក្សានៃអង្គការកម្មវិធីអភិវឌ្ឍន៍ធនធានយុវជន លោក ឈាង សុខា មានប្រសាសន៍ថា លោកមិនអាចវាយតម្លៃពីបរិមាណនៃចំនួនគ្រឿងញៀនដែលចាប់បានទៅលើបញ្ហាគ្រឿងញៀនដែលកំពុងកើតឡើងពេលបច្ចុប្បន្ននេះទេ តែលោកថា វាជាចំណុចហានិភ័យសម្រាប់កម្ពុជា ខណៈបញ្ហាគ្រឿងញៀនកំពុងតែរីករាលដាលពេញប្រទេសដូចនេះ។
លោក ឈាង សុខា៖ «មកដល់ពេលបច្ចុប្បន្ននេះ ស្ទើតែប្រជាពលរដ្ឋគ្រប់គ្នាគឺបានទទួលព័ត៌មានពីការកើនឡើងនៃគ្រឿងញៀន ហើយវាស្ទើរតែកើនឡើងគ្រប់កន្លែងទាំងអស់។ មិនត្រឹមតែទីប្រជុំជនទេ សូម្បីតែចុងកាត់មាត់ញក នៅតំបន់ដាច់ស្រយាល នៅតាមស្រុកស្រែហ្នឹងក៏ឃើញមានបញ្ហាហ្នឹងកើតឡើងដែរ។ អញ្ចឹងហើយ វាក្លាយជាកង្វល់របស់ប្រទេសជាតិហើយ របស់ប្រជាពលរដ្ឋហើយ ទោះបីជាវិធានការនៃការទប់ស្កាត់ហ្នឹង វាកើនឡើង តែការបារម្ភក៏កាន់តែធំដែរសម្រាប់កម្ពុជា»។
លោក ឈាង សុខា ជំរុញដល់មន្ត្រីរដ្ឋាភិបាលបន្ថែមវិធានការនៅតាមព្រំដែន ដើម្បីទប់ស្កាត់បញ្ហានេះឲ្យខ្លាំងក្លា ជាជាងមានវិធានការតែក្នុងប្រទេសដូចពេលបច្ចុប្បន្ននេះ។
កាលពីឆ្នាំ២០១៧កន្លងទៅ លោកនាយករដ្ឋមន្ត្រី ហ៊ុន សែន បានដាក់ចេញផែនការស្ដីពីយុទ្ធនាការប្រយុទ្ធប្រឆាំងគ្រឿងញៀន ដើម្បីបោសសម្អាតគ្រឿងញៀនឲ្យអស់ពីកម្ពុជា ដែលរហូតមកដល់ពេលនេះ យុទ្ធនាការនេះបានបន្តដល់យុទ្ធនាការទី៤ហើយ។
កាលពីឆ្នាំ២០១៨កន្លងទៅ នគរបាលប្រឆាំងប្រយុទ្ធប្រឆាំងគ្រឿងញៀនបានបង្ក្រាបបទល្មើសគ្រឿងញៀនបានជិត៧ពាន់ករណី និងឃាត់ខ្លួនមនុស្សបានជាង១ម៉ឺន៣ពាន់នាក់ ខណៈរឹបអូសគ្រឿងញៀនបានជាង៥០០គីឡូក្រាម៕