ក្រសួងយុត្តិធម៌ សម្រេចផ្អាកមុខងារព្រះរាជអាជ្ញាខេត្តរតនគិរី លោក ជា ពេជ្រ ជាបណ្ដោះអាសន្ន ដើម្បីឲ្យតុលាការរាជធានីភ្នំពេញបន្តនីតិវិធីលើសំណុំរឿងផិតក្បត់។
ក្នុងលិខិតមួយច្បាប់ជម្រាបព្រះរាជអាជ្ញានៃអយ្យការអមសាលាដំបូងខេត្តរតនគិរី ចុះថ្ងៃទី២៥ ខែកក្កដា រដ្ឋមន្ត្រីក្រសួងយុត្តិធម៌ លោក អង្គ វង្សវឌ្ឍានា បានសម្រេចសម្រេចផ្អាកមុខងាររបស់ព្រះរាជអាជ្ញា ជា ពេជ្រ ពីតួនាទីជាព្រះរាជអាជ្ញានៃអយ្យការអមសាលាដំបូងខេត្តរតនគិរីនេះ គឺបន្ទាប់ពីអយ្យការសាលាដំបូងរាជធានីភ្នំពេញសម្រេចចោទប្រកាន់លោក ជា ពេជ្រ ពីបទផិត ដែលប្រព្រឹត្តនៅខេត្តរតនគិរី និងរាជធានីភ្នំពេញចាប់តាំងពីឆ្នាំ២០១៧ ដល់ឆ្នាំ២០១៩នេះ និងបានបញ្ជូនរឿងទៅស៊ើបសួរកាលពីថ្ងៃទី២៤ ខែកក្កដា កន្លងទៅ។
ក្នុងលិខិតនោះសរសេរថា៖ « យោងតាមមាត្រា៥៨ និងមាត្រា១០០ នៃច្បាប់ស្ដីពីលក្ខន្ដិកៈនៃចៅក្រម និងព្រះរាជអាជ្ញា ក្រសួងយុត្តិធម៌ផ្អាកមុខងាររបស់លោក ជា ពេជ្រ ព្រះរាជអាជ្ញានៃអយ្យការអមសាលាដំបូងខេត្តរតនគិរី ជាបណ្ដោះអាសន្ន រហូតដល់មានសេចក្តីសម្រេចរបស់តុលាការអំពីទោសជាស្ថាពរ » ។
អ្នកនាំពាក្យក្រសួងយុត្តិធម៌ លោក ជិន ម៉ាលីន មានប្រសាសន៍ថា ការផ្អាកជាបណ្ដោះអាសន្ននេះគឺជាការផ្អាកមុខងារប៉ុណ្ណោះដែលមានន័យថា លោក ជា ពេជ្រ នៅអាចទទួលបានប្រាក់បៀវត្ស និងប្រាក់អត្ថប្រយោជន៍ផ្សេងទៀតបាន។ ប៉ុន្តែ លោកបញ្ជាក់ថា ប្រាក់បៀវត្ស និងតួនាទីនេះក៏នឹងបាត់បង់ផងដែរ ប្រសិនជាតុលាការរកឃើញកំហុសដូចដែលបានចោទប្រកាន់មែននោះ។
លោក ជិន ម៉ាលីន៖ « ប្រសិនជារកទៅឃើញថា គាត់មានទោសដូចជាការចោទប្រកាន់ហ្នឹងមែន គឺគាត់អាចនឹងរងវិធានការវិន័យអីបន្ទាប់ទៀត ដូចជា ការលុបឈ្មោះចេញពីក្របខ័ណ្ឌអី ជាដើម។ ហើយបើនីតិវិធិបញ្ចប់ទៅរកមិនឃើញថា គាត់មានទោសដូចការចោទហ្នឹងទេ គាត់អាចត្រលប់ទៅបំពេញតួនាទីការងារគាត់ដូចដើមវិញ » ។
មាត្រា១០ នៃច្បាប់ឯកព័ន្ធភាព ចែងថា ត្រូវផ្តន្ទាទោសដាក់ពន្ធនាគារពី១ខែ ដល់១ឆ្នាំ និងផ្តន្ទាទោសពិន័យជាប្រាក់ពី ២សែនរៀល ដល់១លានរៀល ឬផ្ដន្ទាទោសណាមួយនៃទោសទាំងពីរ។
អ្នកឯកទេសឯករាជ្យផ្នែកសិទ្ធិមនុស្ស លោក សួន ប៊ុនស័ក្កិ គាំទ្រចំពោះចំណាត់ការច្បាប់នេះដោយថា ដើម្បីជួយកែទម្រង់ប្រព័ន្ធយុត្តិធម៌ក្នុងប្រទេស។
លោក សួន ប៊ុនស័ក្កិ៖ « ដើម្បីឱ្យមានយុត្តិធម៌ ទាល់តែមន្ត្រីយុត្តិធម៌ហ្នឹងធ្វើឱ្យត្រឹមត្រូវ ហើយបើមន្ត្រីយុត្តិធម៌ធ្វើមិនត្រឹមត្រូវ តើធ្វើម៉េចនឹងអាចរកយុត្តិធម៌ ភាពត្រឹមត្រូវជូនប្រជាពលរដ្ឋទៅ។ ទីមួយ បើច្បាប់ឱ្យអំណាចហើយក្រសួងយុត្តិធម៌គាត់ធ្វើចុះឲ្យតែធ្វើតាមនីតិវិធីច្បាប់ ដែលច្បាប់ផ្ដល់អំណាចឱ្យក្នុងគោលបំណងកែលំអប្រព័ន្ធយុត្តិធម៌ ដូចខ្ញុំថាអញ្ចឹង! ដើម្បីកែប្រព័ន្ធយុត្តិធម៌ ត្រូវកែច្បាប់ទម្លាប់ឲ្យល្អ ហើយត្រូវកែទម្រង់ចរិតមនុស្ស មនុស្សហ្នឹងគឺមន្ត្រីយុត្តិធម៌ឱ្យដើរឱ្យល្អដែរ » ។
ក្រោយការដកបញ្ឈរជើងលោក ជា ពេជ្រ ជាបណ្ដោះអាសន្ននេះ រដ្ឋមន្ត្រីក្រសួងយុត្តិធម៌ក៏សម្រេចផ្លាស់ព្រះរាជអាជ្ញារងនៃអយ្យការសាលាដំបូងរាជធានីភ្នំពេញ លោក ងិន ពេជ ឲ្យទៅបំពេញមុខងារជាព្រះរាជអាជ្ញាស្ដីទីនៃខេត្តរតនគិរីរហូតដល់មានការតែងតាំងផ្លូវការផងដែរ៕
