អ្នកវិភាគដែលមានឈ្មោះថា សូរ សមយុទ្ធ បានបដិសេធថា លោកមិនបានជេរប្រមាថទៅលើលោកនាយករដ្ឋមន្ត្រី ហ៊ុន សែន និងថ្នាក់ដឹកនាំដទៃទៀតរបស់បក្សកាន់អំណាចនោះឡើយ នៅក្នុងសំណេរវិភាគរបស់លោកនោះ។
នៅព្រឹកថ្ងៃនេះ លោក ហ៊ុន សែន បានព្រមានចាត់វិធានការទៅលើអ្នកវិភាគ លោក សូរ សមយុទ្ធ ដែលលោកនាយករដ្ឋមន្ត្រីអះអាងថា បានប្រមាថរូបលោក និងហៅរដ្ឋមន្ត្រីក្រសួងមហាផ្ទៃ លោក ស ខេង ថា «អាត្នោត»។
លោក ហ៊ុន សែន បានថ្លែងទៀតថា អ្នកវិភាគរូបនេះ គឺលោក ឃន ជាអតីតមន្ត្រីជាន់ខ្ពស់មួយរូបរបស់គណបក្សសង្គ្រោះជាតិ ដែលស្ថិតក្នុងចំណោមថ្នាក់ដឹកនាំជាន់ខ្ពស់ ១១៨រូប ដែលត្រូវបានតុលាការហាមឃាត់សិទ្ធិធ្វើនយោបាយរយៈពេល ៥ឆ្នាំផងដែរ។
លោក ហ៊ុន សែន ថ្លែងថា៖ «វាហៅសម្តេចក្រឡាហោមថា អាត្នោត វាហៅខ្ញុំ អាហ្នឹង ហើយអាហ្នឹងមនុស្សម្នាក់ក្នុងចំណោមនុស្ស ១១៨នាក់។ អាក្មួយត្រូវចាំ តែមួយសារទៀត ពូយកហើយ ហើយអ្នកនៅបាងកក សូមចាំឲ្យច្បាស់ កម្ពុជាមិនប្រើប្រាស់ទឹកដីរបស់កម្ពុជាប្រឆាំងនឹងប្រទេសថៃ ហើយប្រទេសថៃក៏បានប្តេជ្ញាថា មិនប្រើប្រាស់ទឹកដីរបស់ខ្លួនប្រឆាំងនឹងកម្ពុជា នាយករដ្ឋមន្ត្រីទាំងពីរបានប្តូរផ្តាច់ត្រូវធ្វើរឿងនេះ»។
ប៉ុន្តែ អ្នកវិភាគ សូរ សមយុទ្ធ បានច្រានចោលការចោទប្រកាន់នេះ ហើយថា លោកបានជ្រើសរើសដោយប្រុងប្រយ័ត្ននូវភាសា និងពាក្យពេចន៍ ដែលប្រើប្រាស់នៅក្នុងសំណេរវិភាគរបស់លោកកន្លងមក ដើម្បីបញ្ចៀសនូវពាក្យពេចន៍ធ្វើឲ្យជាតិឈឺចាប់ ឬក៏មានលក្ខណៈមើលងាយប្រមាថដល់បុគ្គលណាម្នាក់នោះ។
អ្នកវិភាគ សូរ សមយុទ្ធ បានរៀបរាប់លើទំព័រហ្វេសប៊ុកផ្ទាល់ខ្លួនថា៖ «ខ្ញុំនៅតែមានជំនឿថា ជេរជួយជាតិមិនបាន, ជេរអាចបំផ្លាញជាតិ, ជេរអាចធ្វើឱ្យជាតិឈឺចាប់, ជេរអាចធ្វើឱ្យមនុស្សគុំគួនចងអាឃាតរវាងគ្នានិងគ្នា, ជេរមួលបង្កាច់ និងលាបពណ៌គ្នា គឺបំផ្លាញជាតិឯង។ ខ្ញុំតែងតែលើកឡើង ជម្រាបអ្នកអានថា បើចេះត្រឹមតែជេរ ជួយស្រុកមិនបានទេ។ ការជេរ គឺបំផ្លាញការគិតរបស់ខ្មែរ។ ចង់ជួយខ្មែរ ពន្យល់ខ្មែរ។ ការជេរខ្មែរ គឺសម្លាប់ខ្មែរ។ ជាមួយគ្នានេះ ខ្ញុំក៏សុំបងប្អូនមួយចំនួន ដែលតែងតែចូលមកសរសេរ ជេរ ប្រមាថបុគ្គលដទៃលើអត្ថបទរបស់ខ្ញុំ ជាថ្មីម្តងទៀត បើរាប់អាន ឬគាំទ្រអត្ថបទខ្ញុំ សុំឈប់ ឬសុំកែប្រែ ពីព្រោះរាល់អត្ថបទរបស់ខ្ញុំ គឺចង់ឱ្យបងប្អូន អាន ពិចារណា វិភាគ គិត កសាង និងការពារជាតិ មិនមែនជាវេទិកា ឱ្យបងប្អូនជេរប្រមាថបុគ្គលណាម្នាក់ និងបង្កការឈឺចាប់ដល់ជាតិឡើយ»។
យ៉ាងនេះក្តី គណនីហ្វេសប៊ុករបស់ សូរ សមយុទ្ធ បានលើកឡើងថា កន្លងមក មានការបង្កើតគណនី និងទំព័រជាច្រើន ដោយប្រើប្រាស់ឈ្មោះរបស់លោក ឬយកសំណេរទៅចែកចាយ ឬយកសំណេរទៅអធិប្បាយបន្ថែម។
លោកថា មួយលើកជាពីរលើក លោកតែងតែបានបដិសេធ និងជម្រាបសាធារណជន ដោយថា គណនីហ្វេសប៊ុកពិតរបស់”សូរ សមយុទ្ធ” មានតែមួយនេះគត់ (https://www.facebook.com/samyuth)។ ចំនែកគណនី និងទំព័រផ្សេងៗ ដែលប្រើឈ្មោះ សូរ សមយុទ្ធ នោះ ពុំមែនជារបស់លោកឡើយ ហើយលោកក៏មិនអាចទទួលខុសត្រូវចំពោះអ្នកបង្កើត អ្នកបញ្ចេញមតិ និងអ្នកអធិប្បាយបន្ថែម លើសំណេររបស់លោកដែរ។
លើសពីនេះ លោកក៏មិនអាចទទួលខុសត្រូវចំពោះអ្នកបញ្ចេញមតិ (comment) នៅលើសំណេរអត្ថបទរបស់លោកឡើយ ជាពិសេស អ្នកដែលចូលមកសរសេរ ជេរប្រមាថ ពាក្យអសុរោះលើបុគ្គលណាម្នាក់នោះ។
អ្នកវិភាគ សូរ សមយុទ្ធ ដែលតែងតែសរសេរអត្ថបទវិភាគចុះផ្សាយនៅលើកាសែតភ្នំពេញប៉ុស្តិ៍ ជាច្រើនឆ្នាំមកហើយ និងធ្លាប់បានវិភាគអត្ថបទខ្លី និងវែង នៅលើគណនីហ្វេសប៊ុករបស់ខ្លួន អំពីបញ្ហាជាតិ និងបញ្ហានយោបាយក្នុងតំបន់។
លើសពីនេះ លោកធ្លាប់បានសរសេរសៀវភៅបែបវិភាគអំពីស្ថានភាពនយោបាយ និងសង្គមកម្ពុជា ចំនួន២ក្បាលរួចមកហើយ ដោយសៀវភៅទី១ ជាសៀវភៅពណ៌ស មានចំណងជើងថា «សគិតជាតិ» និង សៀវភៅទី២ ដែលជាសៀវភៅពណ៌ក្រហម មានចំណងជើងថា «កសាងជាតិ»។ អ្នកវិភាគរូបនេះ ក៏មានបំណងចេញសៀវភៅទី៣ របស់ខ្លួននៅពេលខាងមុខ ដែលជាសៀវភៅខៀវ គ្រោងដាក់ចំណងជើងថា «ការពារជាតិ»៕
