រដ្ឋាភិបាល ប្រកាសបើកចំហសមាជិកភាពសម្រាប់បក្សដទៃដែលមិនទាន់ចូលជាសមាជិកក្រុមប្រឹក្សាពិគ្រោះ និងផ្ដល់យោបល់។
អ្នកនាំពាក្យរាជរដ្ឋាភិបាលលោក ផៃ ស៊ីផាន បានសរសេរនៅលើហ្វេសបុករបស់លោកដោយបញ្ជាក់ការលើកឡើងរបស់លោកនាយករដ្ឋមន្ត្រី ហ៊ុន សែន នៅក្នុងកិច្ចប្រជុំគណៈរដ្ឋមន្ត្រីនៅថ្ងៃនេះ ថាយន្តការឧត្តមក្រុមប្រឹក្សាពិគ្រោះ និងផ្ដល់យោបល់គឺមានអំណាចក្នុងការកោះហៅក្រសួងស្ថាប័នរដ្ឋមកសាកសួរបាន ដោយរដ្ឋាភិបាលនៅតែបើកចំហសម្រាប់គណបក្សដទៃទៀត អាចចូលជាសមាជិកបាន។
លោកសរសេរថា៖ « យន្តការនេះ នៅតែបើកចំហសម្រាប់គណបក្សដទៃទៀត ក្នុងការចូលរួមជាសមាជិកតាមរយៈការស្នើសុំជាសមាជិក » ។
គណបក្ស៤ ដែលមិនចូលរួមជាសមាជិកក្រុមប្រឹក្សានេះមាន គណបក្សសម្ព័ន្ធដើម្បីប្រជាធិបតេយ្យ គណបក្សប្រជាធិបតេយ្យមូលដ្ឋាន គណបក្សខ្មែរឈប់ក្រ និងគណបក្សមាតុភូមិយើង។
អ្នកនាំពាក្យគណបក្សសម្ព័ន្ធដើម្បីប្រជាធិបតេយ្យលោក កូវ គា មានប្រសាសន៍ថាគណបក្សលោកនៅតែរក្សាជំហរក្នុងការមិនចូលរួមជាមួយក្រុមប្រឹក្សានេះ ដោយសារគណបក្សមើលឃើញថាក្រុមប្រឹក្សានេះគ្មានឥទ្ធិពលអ្វីធ្វើឱ្យរដ្ឋាភិបាលកែប្រែឥរិយាបថ ឬសកម្មភាពខ្លួននោះទេ។
លោក ថា៖ « គាត់(នាយករដ្ឋមន្ត្រី)យកមកហ្នឹងគឺគ្រាន់តែជារូបភាពទេ។ គាត់មិនមែនខ្វះខាតអីទេ! ឧទាហរណ៍ថាខ្វះខាតទៀតសោតក៏វាមិនបានអីដែរ។ ទោះយើងចូលមិនចូលក៏វាមិនបានអីដែរ ចង់និយាយថាសម្ដីយើងវាមិនមានឥទ្ធិពល។ វាមានតែយើងធ្វើការបែបយើង គឺយើងមានគណបក្សនយោបាយមួយហើយមានមនោគមន៍វិជ្ជារបស់យើងហើយយើងផ្សព្វផ្សាយគំនិតហ្នឹងទៅ បើថាប្រជាពលរដ្ឋគាំទ្រទើបយើងអាចធ្វើបាន បើដូចរាល់ថ្ងៃនេះគឺយើងធ្វើអីក៏វាមិនបានដែរ » ។
អ្នកនាំពាក្យគណបក្សប្រជាធិបតេយ្យមូលដ្ឋានលោក ឡឹក សុធា មានប្រសាសន៍ថាគណបក្សលោកនៅតែរក្សាជំហរដូចដើមក្នុងការមិនចូលរួមជាមួយក្រុមប្រឹក្សានេះ ដោយថាគណបក្សសម្រេចជ្រើសរើសផ្លូវរួចហើយក្នុងការធ្វើការ។
លោក ថា៖ « យើងមិនបានគិតពីបញ្ហា ឬក៏ប្រសិទ្ធិភាពអីទេ! តែយើងគិតថាវាច្បាស់ណាស់វាគួរតែមានអ្នកណាមួយដែលឈរនៅក្រៅរង្វង់ហ្នឹងហើយចាំជួយប្រាប់វិញក៏ល្អជាង។ ហើយយើងសុខចិត្តដើរតួនាទីបែបហ្នឹងជាជាងការចូលរួមក្នុងក្រុមដែលយើងគិតថាស្ថិតក្នុងប្រអប់មួយដែលអាចមើលមិនឃើញគ្រប់ជ្រុងជ្រោយជាដើម » ។
ប្រធានស្ដីទីនៃគណបក្សមាតុភូមិយើងលោកស្រី ហ៊ឹម សុគន្ធី មានប្រសាសន៍ថាគណបក្សលោកស្រីនៅមិនទាន់មានជំហរយ៉ាងណាចំពោះការប្រកាសថ្មីនេះដោយរង់ចាំការប្រជុំសម្រេចជាមួយប្រធានបក្សសិន។
លោកស្រី ហ៊ឹម សុគន្ធី ៖ « យើងនឹងពិភាក្សាថាយើងត្រូវចូលរួមឬមិនចូលរួម តែសម្រាប់ខ្ញុំទោះបីជាចូលរួមក៏ដោយមិនចូលរួមក៏ដោយក៏វានៅក្រោមដំបូលរបស់រាជរដ្ឋាភិបាលតែមួយទេ » ។
VOD មិនអាចទាក់ទងគណបក្សខ្មែរឈប់ក្រដើម្បីសុំការយល់ឃើញរបស់បក្សនេះចំពោះការប្រកាសរបស់រដ្ឋាភិបាលបាននៅឡើយទេ។
គិតរហូតមកដល់ពេលនេះក្រុមប្រឹក្សាពិគ្រោះ និងផ្ដល់យោបល់ត្រូវបានបង្កើតឡើងមានរយៈពេលជិត១ឆ្នាំហើយ ក្រោយពីបង្កើតឡើងនៅខែកញ្ញាឆ្នាំ២០១៨។
មន្ត្រីជាន់ខ្ពស់ផ្នែកអង្កេតនៃអង្គការឃ្លាំមើលការបោះឆ្នោតហៅកាត់ថាខុមហ្វ្រែល លោក កន សាវង្ស មានប្រសាសន៍ថាលោកមិនមានការបកស្រាយ ឬជំទាស់នោះទេទៅលើការបង្កើតនេះ តែលោកថាតាមផ្លូវច្បាប់ អ្នកដែលមានសិទ្ធិក្នុងការកោះហៅក្រសួងស្ថាប័នរដ្ឋមកឆ្លើយបំភ្លឺគឺមានតែសមាជិកសភាប៉ុណ្ណោះ។
លោកកន សាវាង្ស៖ « បើនិយាយពីក្រុមប្រឹក្សាពិគ្រោះ និងផ្ដល់យោបល់វាអត់មានចែងក្នុងរដ្ឋធម្មនុញ្ញទេ ហើយសភាក៏អត់មាននិយាយអំពីរឿងហ្នឹងដែរ។ អញ្ចឹងរាល់ការផ្ដល់សិទ្ធិ ឬអាទិភាពអំណាចឱ្យក្រុមនេះក្នុងការកោះហៅរដ្ឋមន្ត្រី ខ្ញុំមិនមានជាយោបល់ទេព្រោះវាជាការសរសេរឬលើកឡើងរបស់រដ្ឋាភិបាល តែនៅក្នុងផ្លូវច្បាប់ ដូចជានៅក្នុងរដ្ឋសភាខ្ញុំអត់ឃើញមាននេះជាអ្វីដែលមានយោងទៅលើច្បាប់ ដែលមានចែងក្នុងរដ្ឋធម្មនុញ្ញ ឬក៏មានចែងក្នុងច្បាប់នោះ » ។
ក្រោយទទួលបានអាសនៈ ១២៥កៅអីពេញសភាក្រោយការបោះឆ្នោតឆ្នាំ២០១៨ ប្រធានគណបក្សប្រជាជន លោកនាយករដ្ឋមន្ត្រីហ៊ុន សែន បានបង្កើតឧត្តមក្រុមប្រឹក្សាពិគ្រោះ និងផ្ដល់យោបល់ដើម្បីអនុញ្ញាតឱ្យបក្សដែលមិនជាប់ឆ្នោតអាចចូលរួមក្នុងអ្វីដែលលោកហៅថាជាប្រជាធិបតេយ្យបែបថ្មី ទោះជាយ៉ាងណាអ្នកវិភាគបញ្ហាសង្គមយល់ថាការបង្កើតនេះគឺគ្រាន់តែធ្វើឱ្យល្អមើល និងខ្ជះខ្ជាយថវិការជាតិ។
បច្ចុប្បន្នសមាជិកក្រុមប្រឹក្សាពិគ្រោះ និងផ្ដល់យោបល់មានចំនួន១៦ គណបក្សក្នុងចំណោមគណបក្សដែលចូលរួមបោះឆ្នោតឆ្នាំ២០១៨ ចំនួន២០គណបក្ស។
ទោះជាយ៉ាងណាកាលពីថ្ងៃទី ៧ មិថុនា កន្លងទៅលោកនាយករដ្ឋមន្ត្រីហ៊ុន សែន បានថ្លែងថាឧត្តមក្រុមប្រឹក្សា និងផ្ដល់យោបល់នឹងលែងមានទៀតហើយនៅអាណត្តិក្រោយ៕
