ម្ចាស់សំណង់អាគារខុសច្បាប់កម្ពស់៩ ជាន់ដែលជាជនជាតិចិន បានយល់ព្រមរុះរើអាគារដោយខ្លួនឯងតាមសំណើរបស់អាជ្ញាធរខេត្តព្រះសីហនុ។
តាមការចុះផ្សាយលើទំព័រ Facebook រដ្ឋបាលខេត្តព្រះសីហនុកាលពីម្សិលមិញ អភិបាលខេត្ត លោក គួច ចំរើន បានកោះហៅម្ចាស់សំណង់លោក Zhu Fubing រួមជាមួយម្ចាស់សំណង់ដែលរកឃើញមានបញ្ហាទ្រេតមួយផ្សេងទៀតឈ្មោះ Ma Shundi ដើម្បីធ្វើការដោះស្រាយ។
ប្រភពដដែល ឱ្យដឹងទៀតថាម្ចាស់សំណង់ទាំងពីរបានយល់ព្រមធ្វើការរុះរើសំណង់របស់ខ្លួនជាបន្ទាន់ តាមការណែនាំរបស់អាជ្ញាធរ ប៉ុន្តែ លោក Fubing ស្នើរសុំឱ្យរដ្ឋបាលខេត្តជួយសិក្សាបច្ចេកទេស និងផ្តល់លិខិតអនុញ្ញាតសាងសង់វិញ និងសុំពន្យាពេលកិច្ចសន្យាថ្លៃជួលដី។
ដោយឡែក លោក Shundi ដែលសំណង់របស់គេស្ថិតនៅភូមិ៣ សង្កាត់លេខ២ ក្រុងព្រះសីហនុ ស្នើរសុំរដ្ឋបាលខេត្តជួយសម្របសម្រួលជាមួយម្ចាស់ដី តម្លៃជួលក្នុងការរុះរើ និងច្បាប់សាងសង់។
ដំណោះស្រាយនេះ គឺធ្វើឡើងបន្ទាប់ពី អ្នកនាំពាក្យរដ្ឋបាលខេត្តព្រះសីហនុកាលពីម្សិលមិញ បានបញ្ជាក់ជំហរក្នុងការវាយកម្ទេចសំណង់អាគារកម្ពស់៩ ជាន់នោះ បន្ទាប់ពីមន្រ្តីជំនាញរកឃើញមានស្នាមប្រេះស្រាំ និងស្រុតផ្នែកមួយចំនួន។
អ្នកនាំពាក្យរដ្ឋបាលខេត្ត លោក ឃាង ភារម្យ ប្រាប់ វីអូឌី ថា អាជ្ញាធរនឹងហៅមកសាកសួរ និងចាត់ការតាមនិតិវិធីច្បាប់សំណង់កម្ពុជា ហើយពួកគេត្រូវតែគោរពតាមសេចក្តីជូនដំណឹងរបស់ក្រសួង។
លោកថា៖ «វាមិនមានហេតុផលណាមួយដែលគាត់ [ម្ចាស់សំណង់] មិនអនុវត្តតាម[សេចក្តីប្រកាស]នោះទេ។ បើមិនអនុវត្តតាមយើងចាត់ការតាមនិតិវិធីច្បាប់ហើយ។ បើគាត់មិនរុះរើ មានន័យថាអាជ្ញាធរនឹងចុះរុះរើ។»
ប្រធានសហព័ន្ធសហជីពពលករសំណង់ និងព្រៃឈើកម្ពុជា លោក សុខ គីន សាទរចំពោះចំណាត់ការរបស់អាជ្ញាធរខេត្ត ប៉ុន្តែ លោកចង់ឱ្យមានការពន្លឿន និងបន្តការអនុវត្តឱ្យមានប្រសិទ្ធភាពលើសំណង់អាគារខុសច្បាប់ដទៃទៀត ដែលឃើញមានមួយចំនួនទៀតនៅជិតមាត់សមុទ្ទ ដើម្បីបញ្ជៀសគ្រោះថ្នាក់កើតឡើងជាយថាហេតុ។
លោក គីន និយាយថា៖ «យើងអត់ចង់ឱ្យមានបញ្ហាគ្រោះថ្នាក់ហើយបានចាត់វិធានការទេ។ យើងចង់ឱ្យចាត់វិធានការស្មើៗគ្នាពេលដែលគាត់[អាជ្ញាធរ]រកឃើញ ព្រោះវាជៀសវាងកុំឱ្យមានបញ្ហាទៅខាងមុខទៀត»។
មន្រ្តីសម្របសម្រួលសមាគមន៍អាដហុកប្រចាំខេត្តព្រះសីហនុ លោកស្រី ចៀប សុធារី ពុំទាន់មានទំនុកចិត្តចំពោះចំណាត់ការរបស់រដ្ឋបាលខេត្តនៅឡើយ ដោយផ្អែកលើករណីបាក់សំណង់អាគារសាងសង់ខុសបច្ចេកទេសកម្ពស់៧ ជាន់ កាលពី២ខែមុនជាឧទាហរណ៍។
លោកស្រី សុធារី បន្ថែមថា៖ «បើសិនជាម្ចាស់សំណង់ ឬម្ចាស់អាគារ គាត់អត់គោរពតាមបញ្ជា ឬក៏សេចក្តីណែនាំ សេចក្តីសម្រេចរបស់គណកម្មការ ឬរបស់ក្រសួង អាជ្ញាធរទេ សូមឱ្យប្រើវិធានការតាមផ្លូវច្បាប់ទៅ ជៀសវាមានគ្រោះថ្នាក់តទៅទៀត។ បើគ្រាន់តែចេញលិខិតហើយ យើងមិនតាមដានមើលការអនុវត្ត ឬប្រសិទ្ធភាពនៃលិខិតឯកសារគតិយុត្តបស់យើងទេ។ អាហ្នឹងវាដូចជាអត់ប្រយោជន៍។ វាធ្វើឱ្យច្បាប់ស្រុកយើងអត់មានតម្លៃ»។
បន្ទាប់ពីកើតមានករណីបាក់អាគារកម្ពស់៧ ជាន់ សង្កត់មនុស្សស្លាប់២៨ នាក់ និងរបួស២៦ នាក់កាលពីខែមិថុនា នៅក្រុងព្រះសីហនុ រដ្ឋាភិបាលបានបង្កើតឱ្យមានគណកម្មការត្រួតពិនិត្យគុណភាពសំណង់ក្នុងខេត្ត ហើយជាបន្តបន្ទាប់ សំណង់ខុសច្បាប់ និងមិនគោរពស្តង់ដាសុវត្ថិភាពត្រូវបានរកឃើញ និងតម្រូវឱ្យរុះរើចេញជាបន្ទាន់៕
