អ្នកនាំពាក្យរាជរដ្ឋាភិបាលលោក ផៃ ស៊ីផាន បានលើកឡើងថាការរំលឹកទិវាកិច្ចព្រមព្រៀងក្រុងប៉ារីស២៣តុលាប្រៀបបាននឹងការបើកចំឲ្យបរទេសមកគ្រប់គ្រងកម្ពុជា។
លោកផៃ ស៊ីផានថ្លែងបែបនេះក្នុងសន្នីសិទសារព័ត៌មានកាលពីម្សិលមិញ ដើម្បីឆ្លើយតបទៅនឹងការរិះគន់នានាពាក់ព័ន្ធនឹងការលុបចោលទិវាកិច្ចព្រមពៀងក្រុងប៉ារីស ២៣ ចេញពីថ្ងៃឈប់សម្រាករបស់ជាតិ។
លោក ផៃ ស៊ីផាន ថ្លែងថាអង្គការមួយចំនួននៅកម្ពុជាតែងតែប្រើប្រាស់ទិវានេះដើម្បីហៅបរទេសឱ្យមកគ្រប់គ្រងកម្ពុជា ខណៈលោកបញ្ជាក់ថាកិច្ចព្រមព្រៀងនេះគឺគ្រាន់តែជាសុបិន្តអាក្រក់មួយប៉ុណ្ណោះ ដោយជំរុញឱ្យប្រជាជនឱ្យតម្លៃដល់រដ្ឋធម្មនុញ្ញរបស់កម្ពុជាវិញ។
លោកផៃ ស៊ីផាន៖ « បើយើងរំលឹកកិច្ចព្រមព្រៀងក្រុងប៉ារីសបានន័យថាយើងបើកចំហឱ្យបរទេសមកគ្រប់គ្រងយើងផ្ទាល់! ក៏ប៉ុន្តែប្រសិនយើងរំលឹកទិវារដ្ឋធម្មនុញ្ញរបស់កម្ពុជា យើងអាចជជែកគ្នាបាន តើធ្វើយ៉ាងមិចឱ្យប្រទេសយើងជឿនលឿនតទៅទៀត? រក្សាស្ថិរភាពឱ្យបានរឹងមាំតទៅទៀត តើយើងធ្វើច្បាប់មួយការពារប្រយោជន៍របស់ប្រជាជនកម្ពុជាប្រាស់ចាកពីការជិះជាន់ពីមន្ត្រីអាក្រក់ » ។
កិច្ចព្រមព្រៀងសន្តិភាពទីក្រុងប៉ារីស ២៣ តុលា ឆ្នំា១៩៩១ មានប្រទេសចំនួន ១៨ បានចុះហត្ថលេខាទទួលស្គាល់ ក្នុងនោះមានទាំងមហាអំណាចទាំង ៥ផងដែរ ដូចជា ចិន រុស្ស៊ី បារាំង និងសហរដ្ឋអាមេរិក ជាដើម។
កិច្ចព្រមព្រៀងនេះហើយដែលធ្វើឱ្យខ្មែរគ្រប់ភាគីឈប់ប្រយុទ្ធគ្នា បើកឱ្យអង្គការសហប្រជាជាតិចូលមកជួយរៀបចំការបោះឆ្នោតឆ្នាំ១៩៩៣ ទទួលជំនួយពីសហគមន៍អន្តរជាតិសម្រាប់អភិវឌ្ឍជាតិ នាំមកនូវការគោរពសិទ្ធិមនុស្ស និងប្រជាធិបតេយ្យ។
អ្នកនាំពាក្យសមាគមអាដហុកលោក សឹង សែនករុណា មានប្រសាសន៍ថាកិច្ចព្រមព្រៀងក្រុងប៉ារីស២៣តុលា មិនមែនជាសមិទ្ធិផលរបស់បរទេសនោះទេ វាជាការស្រុះស្រួលគ្នារវាងមេដឹកនាំកម្ពុជាក្នុងការបញ្ចប់សង្គ្រាមស៊ីវិលដែលរ៉ាំរ៉ៃ និងស្វាគមន៍ឱ្យបានការជួយសម្របសម្រួលដោយអន្តរជាតិដោយកម្ពុជាខ្លួនឯង។
លោក ថា៖ « យើងត្រូវដឹងថាបញ្ហាទាំងអស់នេះគឺជាបញ្ហារបស់ខ្មែរ ផ្ទុយទៅវិញខ្មែរមានភ័ព្វវាសនាទៅវិញទេដែលបរទេសទាំងអស់នោះគេយកចិត្តទុកដាក់ពីបញ្ហានយោបាយរបស់ស្រុកខ្មែរ។ … ទោះបីជាមាន៧ មករា ក៏ដោយបើសិនគ្មាន២៣តុលាទេ សង្គ្រាមស៊ីវិលសម្លាប់ខ្មែរ និងខ្មែរគឺអត់ទាន់បញ្ចប់នៅឡើយទេ។ ទាល់តែមានកិច្ចព្រមព្រៀងក្រុងប៉ារីសហ្នឹងហើយ ទើបយើងមូលមាត់គ្នាបញ្ចប់នូវការយកឈ្នះយកចាញ់គ្នាដោយចុងកាណុង ដោយងាកមករកការបោះឆ្នោតដោយលិទ្ធិប្រជាធិបតេយ្យសេរីពហុបក្ស និងគោរពសិទ្ធិមនុស្សនេះឯង » ។
ក្នុងអនុក្រឹត្យចុះថ្ងៃទី២ ខែសីហា រដ្ឋាភិបាលបានកាត់បន្ថយថ្ងៃឈប់សម្រាកការងាររបស់មន្ត្រីរាជការ និយោជក កម្មករ ប្រចាំឆ្នាំ២០២០ ពី ២៨ថ្ងៃ មកត្រឹម ២២ថ្ងៃវិញ។
រដ្ឋាភិបាលឲ្យដឹងទៀតថា ថ្ងៃដែលបានលុបចេញពីប្រតិទិននោះមាន ទិវាកុមារអន្តរជាតិ ១មិថុនា ទិវាជាតិនៃការចងចាំ ២០ឧសភា ទិវាសិទ្ធិមនុស្សអន្តរជាតិ ១០ធ្នូ ទិវាកិច្ចព្រមព្រៀងសន្តិភាពទីក្រុងប៉ារីស ២៣តុលា និងលុបចោល ២ថ្ងៃ សម្រាប់ព្រះរាជពិធីគោរពវិញ្ញាណក្ខន្ធអតីតព្រះមហាក្សត្រ នរោត្តម សីហនុ។
ថ្លែងប្រាប់VOD កាលពីសប្ដាហ៍មុន ប្រធានគ្រង់ផ្នែកអង្កេតនៅអង្គការលីកាដូ លោក អំ សំអាត លើកឡើងថា ការដកថ្ងៃ ២៣ តុលា ចេញពីថ្ងៃឈប់សម្រាកប្រចាំឆ្នាំនេះ អាចធ្វើឲ្យពលរដ្ឋភ្លេចប្រវត្តិសាស្ត្រដ៏សំខាន់មួយនេះ និងធ្វើឲ្យសហគមន៍អន្តរជាតិ កាន់តែមើលឃើញថា រដ្ឋាភិបាលគ្មានឆន្ទៈស្តារស្ថានភាពសិទ្ធិមនុស្សតាមយន្តការប្រជាធិតេយ្យ ដូចមានចែងក្នុងរដ្ឋធម្មនុញ្ញកម្ពុជានោះឡើយ។
លោក អំ សំអាត មានប្រសាសន៍ថា៖ «យើងឃើញហើយថា កិច្ចព្រមព្រៀងសន្តិភាពទីក្រុងប៉ារីស១៩៩១នេះ វានាំមកនូវព្រះរាជាណាចក្រកម្ពុជាទី២ ហើយនាំកម្ពុជាឲ្យប្រកាន់របបប្រជាធិបតេយ្យសេរីពហុបក្ស។ អានេះក្រៅតែអំពីបទឈប់បាញ់ ក្រៅអំពីការអភិវឌ្ឍ ជួយជ្រោមជ្រែងប្រទេសកម្ពុជាឲ្យរួចផុតពីរបបកុម្មុយនីស្តកន្លងមក»។
ទិវាកិច្ចព្រមព្រៀងសន្តិភាពទីក្រុងប៉ារីស ២៣តុលា ១៩៩១នេះ ត្រូវរដ្ឋាភិបាលលុបចេញពីប្រតិទិនឈប់សម្រាកការងារម្តងហើយកាលពីឆ្នាំ២០០៥ ប៉ុន្តែ បានសម្រេចដាក់បញ្ចូលវិញនៅឆ្នាំ២០១២ ក្រោយអតីតព្រះមហាក្សត្រ នរោត្តម សីហនុ ចូលទីវង្គត។
រដ្ឋាភិបាល អះអាងពេលនោះថា ការដាក់ឡើងបញ្ចូលថ្ងៃ២៣ តុលា ទៅក្នុងថ្ងៃឈប់សម្រាកឡើងវិញនោះថា ជាឆន្ទៈនយោបាយរបស់រាជរដ្ឋាភិបាល ដើម្បីឆ្លើយតបទៅនឹងវីរភាពរបស់សម្តេចព្រះ នរោត្តម សីហនុ និងលោកនាយករដ្ឋមន្ត្រី ហ៊ុន សែន ដែលជាស្ថាបនិកនៃកិច្ចព្រមព្រៀងនេះ នាំឲ្យកម្ពុជាសម្រេចបាននូវការបោះឆ្នោត មានសភាធម្មនុញ្ញ មានរដ្ឋធម្មនុញ្ញ ប្រកាន់យករបបប្រជាធិបតេយ្យ សេរីពហុបក្ស៕
