សមត្ថកិច្ចក្រុងព្រះសីហនុ ឱ្យដឹងថា ករណីឪពុក និងកូនស្រី ត្រូវបានប្រទះឃើញដេកស្លាប់ក្នុងផ្ទះ និងម្តាយឃើញនៅសល់ដង្ហើម ហើយបានស្លាប់ក្រោយបញ្ជូនទៅសង្គ្រោះបន្ទាន់ នៅវេលាម៉ោងប្រហែល ៨ យប់ថ្ងៃម្សិលមិញ គឺជាករណីស្ត្រីមេផ្ទះបំពុលសម្លាប់ប្តី កូន និងខ្លួនឯង។
ស្នងការនគរបាលខេត្តព្រះសីហនុ លោក ជួន ណារិន បានប្រាប់ វីអូឌី តាមទូរសព្ទថា ឆ្លងកាត់តាមការស្រាវជ្រាវបឋមពីមន្រ្តីជំនាញនៃស្នងការដ្ឋាននគរបាលខេត្តព្រះសីហនុ សមត្ថកិច្ចវាយតម្លៃជំហានដំបូងថា ហេតុការណ៍ខាងលើ គឺជាករណីអត្តឃាត បន្ទាប់ពីសមត្ថកិច្ចស្រាវជ្រាវស៊ើបអង្កេតទៅលើទីតាំងកើតហេតុតាមបច្ចេកទេសជំនាញ។
លោក ជួន ណារិន៖ «វិធានការជំនាញរបស់យើងស្រាវជ្រាវ ទី១ គឺពិនិត្យទៅលើកន្លែងកើតហេតុ គាត់បានខ្ទាស់ខ្ទាស់អីនៅក្នុងផ្ទះជិតតែម្តង មិនអាចនរណាចេញចូលបាន ទី២ គាត់ឈ្លោះគ្នាញឹកញាប់ ប្តីជាមួយនឹងប្រពន្ធ ហើយទី៣ ការស្លាប់នេះមិនមានស្លាកស្នាមធើអីទេ គឺថាពាក់ព័ន្ធនឹង..ជាតិពុល»។
លោកបន្ថែមថា នៅមានមូលហេតុមួយទៀតដែលនាំឱ្យសមត្ថកិច្ចសន្និដ្ឋានករណីនេះមិនមែនជាករណីឃាតកម្មនោះគឺថា ឪពុក និងកូនស្រីស្លាប់មុន ឯស្រ្តីជាម្តាយ និងជាប្រពន្ធស្លាប់តាមក្រោយដោយសារធាតុពុលដូចគ្នា ហើយថាស្រ្តីជាប្រពន្ធ និងជាម្តាយ គឺជាអ្នកបំពុលប្តី និងកូនស្រីរបស់ខ្លួនមុន រួចទើបបំពុលខ្លួនឯងតាមក្រោយ។
យោងតាមប្រភពព័ត៌មានពីសមត្ថកិច្ច ជនរងគ្រោះជាឪពុកមានឈ្មោះ ខេង អាយុ ៤៣ឆ្នាំ មុខរបរជាមេការជាងកញ្ចក់, កូនស្រី មានឈ្មោះ លី ស៊ីវឈីង អាយុ១២ ឆ្នាំ មុខរបរជាសិស្ស និងស្រ្តីជាប្រពន្ធ និងជាម្តាយមានឈ្មោះ ម៉ឹង សុផល អាយុ ៤១ឆ្នាំ មុខរបរអ៊ុតសក់ ពួកគេទាំងបី បានជួលផ្ទះរបស់ឈ្មោះ យ៉ាន់ សុផុន អាយុ ៦៥ឆ្នាំ។
គួរបញ្ជាក់ថា មុនពេលកើតហេតុ កម្លាំងនគរបាលប៉ុស្តិ៍រដ្ឋបាលសង្កាត់២ បានទទួលព័ត៌មានថា នៅផ្ទះជួលរបស់ឈ្មោះ យ៉ាន់ សុផុន មានមនុស្សដេកស្លាប់ ដោយចាក់សោរជាប់ពីខាងក្នុង។
ភ្លាមៗនោះកម្លាំងសមត្ថកិច្ចជំនាញចុះទៅដល់កន្លែងកើតហេតុឃើញថាទ្វារផ្ទះត្រូវបានម្ចាស់ផ្ទះជួល និងសាច់ញ្ញាតិជនរងគ្រោះ ព្រមទាំងប្រជាពលរដ្ឋកំពុងនាំគ្នាគាស់ រួចចូលទៅក្នុងផ្ទះ ឃើញមានមនុស្ស២នាក់ដេកស្លាប់ក្នុងបន្ទប់ (ឪពុកនិងកូនស្រី) ចំណែកម្តាយនៅមានដង្ហើម ក៏បញ្ជូនទៅសង្គ្រោះនៅមន្ទីរពេទ្យបង្អែកខេត្ត ហើយក្រោយមកបានស្លាប់ នៅវេលាម៉ោង២៣នឹង២០នាទី៕