លោកនាយករដ្ឋមន្ត្រី ហ៊ុន សែន ជំរុញដល់សាធារណរដ្ឋកូរ៉េខាងត្បូងឱ្យបង្កើនទំហំពាណិជ្ជកម្មកម្ពុជាឱ្យបានខ្លាំងក្លាបន្ថែមទៀត ជាពិសេសការបង្កើនការវិនិយោគមកកម្ពុជាឡើងវិញផងដែរ។
ការលើកឡើងរបស់លោក ហ៊ុន សែននេះ គឺធ្វើឡើងក្នុងកិច្ចប្រជុំពិភាក្សាការងារមួយជាមួយឯកអគ្គរដ្ឋទូតកូរ៉េខាងត្បូង លោក អូ ណាក់យ៉ុង ដែលចប់អាណត្តិកាលពីម្សិលមិញនៅទីស្ដីការគណៈរដ្ឋមន្ត្រី។
ថ្លែងប្រាប់ក្រុមអ្នកសារព័ត៌មានបន្ទាប់ពីបញ្ចប់កិច្ចប្រជុំនេះ រដ្ឋមន្ត្រីប្រតិភូអមនាយករដ្ឋមន្ត្រី លោក កៅ គឹមហួន មានប្រសាសន៍ថា ក្នុងកិច្ចប្រជុំនោះ លោកនាយករដ្ឋមន្ត្រីបានជំរុញដល់ភាគីកូរ៉េឱ្យបន្តជួយនាំចូលផលិតផលកសិផលរបស់កម្ពុជា ចូលទៅកាន់ទីផ្សារកូរ៉េ និងជំរុញឱ្យបង្កើននូវទំហំពាណិជ្ជកម្មរវាងប្រទេសទាំងពីរមានការកើនឡើងថែមទៀត ក្នុងនោះលោកក៏ចង់ឃើញសាធារណរដ្ឋកូរ៉េ បង្កើនការវិនិយោគមកកាន់កម្ពុជាថែមទៀតផងដែរ។
លោក កៅ គឹមហួន ប្រាប់ថា៖ «ខ្ញុំសុំជម្រាបជូនផងដែរថា អ្វីដែលសម្តេចចង់ឃើញនាពេលខាងមុខនេះ គឺទីមួយមានការកើនឡើងទំនាក់ទំនងរវាប្រជាជន និងប្រជាជន ទីពីរ ទំហំពាណិជ្ជកម្ម និងការកើនឡើងកំណើនវិនិយោគ និងទេសចរណ៍ ហើយជាពិសេសទៀត យើងដឹងស្រាប់ហើយអ្នកដែលជំរុញការផ្ដួចផ្ដើមទំនាក់ទំនងការទូតរវាងកម្ពុជាកូរ៉េ គឺសម្តេចតេជោតែម្ដង។ ហើយនៅពេលខាងមុខនេះ នឹងមានកិច្ចប្រជុំកំពូលអាស៊ានកូរ៉េ ហើយសម្ដេចក៏នឹងគ្រោងទៅទស្សនកិច្ចនៅកូរ៉េផងដែរ តែចំណុចនេះ ពេលវេលាមិនទាន់កំណត់ច្បាស់លាស់នៅឡើយទេ»។
បើតាមរបាយការណ៍វិនិយោគអាស៊ាន ទុនវិនិយោគដោយផ្ទាល់ពីប្រទេសកូរ៉េមកកាន់កម្ពុជា បានធ្លាក់ចុះជាបន្តបន្ទាប់ពីដៃគូរវិនិយោគលំដាប់ទី២ ដែលមានតម្លៃជាង ១៧០លានដុល្លារនៅឆ្នាំ២០១៣ ដល់ដៃគូរវិនិយោគទី៥ ដែលមានតម្លៃប្រមាណ ១៣០លានដុល្លារនៅឆ្នាំ២០១៧។
ក្នុងឆ្នាំ២០១៨ នេះទំហំពាណិជ្ជកម្មកម្ពុជា-កូរ៉េ មានតម្លៃ ៧៥៦លានដុល្លារ ក្នុងនោះភាគីកម្ពុជានាំចូលទៅកាន់ទីផ្សារកូរ៉េមានតម្លៃ ២០២លានដុល្លារ ខណៈកូរ៉េខាងត្បូងនាំចូលមកកាន់កម្ពុជាវិញ មានតម្លៃ ៥៤៧លានដុល្លារ។
ទំនិញភាគច្រើនដែលកម្ពុជានាំចេញទៅកាន់ទីផ្សារកូរ៉េមានដូចជា សម្លៀកបំពាក់ គ្រឿងអេឡិចត្រូនិក ស្បែកជើងភេសជ្ជៈ កាបូប កៅស៊ូ ឱសថ និងក្រដាសកាតុង ហើយទំនិញដែលកម្ពុជានាំចូលពីកូរ៉េខាងត្បូងវិញភាគច្រើន គឺជាក្រណាត់តំបាញ រថយន្តដឹកទំនិញភេសជ្ជៈ គ្រឿងម៉ាស៊ីន គ្រឿងតុបតែងលម្អផ្ទះ ឱសថ សាប៊ូ និងផលិតផលប្លាស្ទិក៕
