អ្នកនាំពាក្យរាជរដ្ឋាភិបាលឈប់ឱ្យអ្នកការសែតសួររឿងវិធានការព្យួរប្រព័ន្ធអនុគ្រោះពន្ធ EBA របស់អឺរ៉ុបដោយថា រដ្ឋាភិបាលបានធ្វើកិច្ចការនេះរួចរាល់ហើយ ខណៈបើនៅតែចង់ដឹងលោកជំរុញឱ្យអ្នកកាសែតជិះយន្តហោះទៅសួរអឺរ៉ុបខ្លួនឯង។
អ្នកនាំពាក្យរាជរដ្ឋាភិបាលលោក ផៃ ស៊ីផាន បានប្រតិកម្មទៅនឹងសំណួររបស់អ្នកការសែតដែលបានសួរពាក់ព័ន្ធនឹងវិធានការដកហូតប្រព័ន្ធអនុគ្រោះពន្ធ EBA ដែលអឺរ៉ុបកំពុងដំណើរការដែលអាចឈានដល់ការដកហូតពីកម្ពុជា ដោយជំរុញឱ្យអ្នកការសែតជិះយន្តហោះទៅសួរអឺរ៉ុបដោយខ្លួនពីវិធានការនេះ។
លោកថា៖ «ជំហររបស់រាជរដ្ឋាភិបាលនៅដដែល ហើយបើចង់ដឹងច្បាស់ជិះកប៉ាល់ហោះទៅសួរគេ! រាជរដ្ឋាភិបាលកំពុងនិយាយគ្នាក្នុងភាពជាដៃគូ ហើយបើចង់យកយើងជា Slave (ទាសករ) ជាបាវបម្រើរបស់គោលការណ៍ EBA យើងអត់ធ្វើ។ ហើយឈប់សួររឿង EBA យើងកំពុងចរចា ការសម្រេចលើគេទេ។ ក៏ប៉ុន្ដែ រាជរដ្ឋាភិបាលកម្ពុជាមានគោលនយោបាយដោះស្រាយសម្រាប់ការងាររបស់កម្មករ និងភាពចំណេញរបស់កម្ពុជា»។
ចាប់ពីខែកុម្ភៈមក សហភាពអឺរ៉ុបដែលមានសមាជិក ២៨ប្រទេស បានដំណើរការនិតិវិធីឈានទៅព្យួរប្រព័ន្ធអនុគ្រោះពន្ធ EBA ជាបណ្ដោះអាសន្ន ក្រោយពីរកឃើញថា រដ្ឋាភិបាលបានបរាជ័យក្នុងការស្តារស្ថានភាពសិទ្ធិមនុស្ស និងប្រជាធិបតេយ្យ តាមលក្ខខណ្ឌរបស់ខ្លួន។
សហភាពអឺរ៉ុប បានទាមទារឲ្យរដ្ឋាភិបាលកម្ពុជាស្ដារស្ថានភាពសិទ្ធិមនុស្ស ឲ្យអតីតគណបក្សសង្គ្រោះជាតិបានដំណើរការឡើងវិញ និងត្រូវដោះលែងលោក កឹម សុខា ជាដើម ប៉ុន្តែ រដ្ឋាភិបាលឆ្លើយតបថា ជាបន្ទាត់ក្រហមមិនអាចធ្វើទៅរួច ព្រោះជាអធិបតេយ្យជាតិ។
ប្រព័ន្ធអនុគ្រោះពន្ធអ្វីៗគ្រប់យ៉ាងលើកលែងតែអាវុធ ហៅកាត់ថា EBA ត្រូវបានមន្ត្រីជំនាញរដ្ឋាភិបាលប៉ាន់ប្រមាណថា ទឹកប្រាក់ជិត ៧០០លានដុល្លារក្នុងមួយឆ្នាំ ដែលកម្ពុជាចំណេញពីការមិនបង់ពន្ធ៕
