រដ្ឋាភិបាលកម្ពុជាប្រកាសថា បានត្រៀមខ្លួនរួចរាល់ក្នុងការឈប់ប្រើក្រដាសស្នាមសម្រាប់បំពេញបែបបទពាណិជ្ជកម្មឆ្លងកាត់ព្រំដែនទៀតហើយ ខណៈនៅតែរង់ចាំរដ្ឋសភាជាតិធ្វើការអនុម័តប៉ុណ្ណោះ។
យោងតាមហ្វេសបុកក្រសួងពាណិជ្ជកម្មនៅថ្ងៃទី ៦ កញ្ញា ឱ្យដឹងថា រដ្ឋលេខាធិការក្រសួងពាណិជ្ជកម្មលោកស្រី តឹក រ៉េកំរង បានបញ្ជាក់ក្នុងសិក្ខាសាលាមួយដែលធ្វើនៅភ្នំពេញថា កម្ពុជាបានត្រៀមខ្លួនរួចហើយក្នុងការផ្លាស់ប្ដួរពីការសម្របសម្រួលពាណិជ្ជកម្មដោយប្រើក្រដាសស្នាម ទៅជាការប្រើប្រាស់ប្រព័ន្ធអេឡិចត្រូវនិកជំនួសវិញ ដោយនៅតែរង់ចាំការអនុម័តច្បាប់ ស្តីពីពាណិជ្ជកម្មអេឡិចត្រូនិកពីសភាប៉ុណ្ណោះ។
ក្រសួងពាណិជ្ជកម្មសរសេរថា៖ « កម្ពុជាបានត្រៀមខ្លួនរួចជាស្រេច ដើម្បីអនុវត្តកិច្ចសម្រួលពាណិជ្ជកម្មឆ្លងកាត់ព្រំដែនដោយមិនបាច់ប្រើក្រដាសស្នាម តាមរយៈការចូលជាសមាជិកសន្ធិសញ្ញាអង្គការសហប្រជាជាតិ ស្តីពីប្រតិបត្តិការនេះនៅតំបន់អាស៊ីប៉ាស៊ីហ្វិក ការបង្កើតគណៈកម្មាធិការបញ្ជរតែមួយជាតិ និងការប្រើប្រាស់ច្បាប់ស្តីពីពាណិជ្ជកម្មអេឡិចត្រូនិក ដែលបច្ចុប្បន្នកំពុងរង់ចាំរដ្ឋសភាជាតិធ្វើការអនុម័ត ដើម្បីដាក់ឱ្យប្រើប្រាស់ជាផ្លូវការ » ។
អ្នកនាំពាក្យសភាជាតិលោក ឡេង ប៉េងឡុង បានឱ្យVOD ដឹងថាច្បាប់ពាណិជ្ជកម្មអេឡិចត្រូវនិក បានដាក់ចូលសភារូចហើយ ខណៈគណៈកម្មការទី៩ កំពុងត្រួតពិនិត្យ និងរាយការណ៍ទៅគណៈកម្មាធិការអចិន្ត្រយ៍ ដោយសង្ឃឹមថាច្បាប់នេះអាចនឹងត្រូវប្រជុំអនុម័តនាខែតុលាខាងមុខ។
លោកថា៖ « គណៈកម្មការជំនាញគេសិក្សារួចហើយ តែគាត់មិនទាន់បានរាយការណ៍ជូនគណៈកម្មការអចិន្ត្រៃយ៍ផង។ គាត់នឹងធ្វើរបាយការណ៍គណៈកម្មការអចិន្ត្រៃយ៍មួយទៀត តែរឿងផ្សេងខ្ញុំក៏អត់បានដឹងដែរ » ។
ក្នុងសៀវភៅស ដែលចេញក្នុងខែកក្កដាកន្លងទៅ ក្រុមពាណិជ្ជករអឺរ៉ុបប្រចាំកម្ពុជា បានលើកឡើងពីបញ្ហាជាមួយនីតិវិធីដ៏ស្មុគស្មាញនៃការផ្ដល់ឯកសារជាក្រដាសទៅឲ្យមន្ត្រីគយនៅពេលដែលទំនិញមកដល់កម្ពុជា ហើយការបង់ថ្លៃសេវាគយនៅកម្ពុជាមិនមានប្រព័ន្ធណាមួយដែលអាចធ្វើការបង់តាមប្រព័ន្ធអេឡិចត្រូនិចនៅឡើយទេ ដោយពួកគេជំរុញដល់រដ្ឋាភិបាលផ្លាស់ប្ដួរនីតិវិធីទាំងនេះឱ្យទៅជាការប្រើប្រាស់តាមប្រព័ន្ធអេឡិចត្រូនិចវិញ ដើម្បីរក្សា និងបង្កើនពាណិជ្ជករឱ្យកាន់តែច្រើនមកកម្ពុជា។
នាយកប្រតិបត្តិសម្ព័ន្ធគណនេយ្យភាពសង្គម សន ជ័យ គាំទ្រចំពោះការផ្លាស់ប្ដូរនេះ ដោយថាវានឹងជំរុញឱ្យមានការរីកចម្រើនផ្នែកពាណិជ្ជកម្ម ហើយក៏រួមចំណែកទប់ស្កាត់អំពើរពុលរលួយផងដែរ។
លោក សន ជ័យ៖ « ការដែលអ្នកផ្ដល់សេវា អ្នកទទួលសេវា មិនបានជួបមុខគ្នា វាជាឱកាសនៃការកាត់បន្ថយក្នុងកំរិតខ្ពស់នៃអំពើពុករលួយ ដែលខ្ញុំយល់ថានេះគឺជាយន្តការល្អ » ។
រហូតមកដល់ពេលនេះមានរយៈពេល២ឆ្នាំហើយ បន្ទាប់ពីកម្ពុជាបានចុះហត្ថលេខាលើក្របខណ្ឌកិច្ចព្រមព្រៀង ស្តីពីកិច្ចសម្រួលពាណិជ្ជកម្មឆ្លងព្រំដែនដោយមិនបាច់ប្រើក្រដាសស្នាមនៅអាស៊ីប៉ាស៊ីហ្វិក កាលពីថ្ងៃទី២៩ ខែសីហា ឆ្នាំ២០១៧។ កិច្ចព្រមព្រៀងនេះមានគោលបំណង ដើម្បីពង្រឹងកិច្ចសហប្រតិបត្តិការពាណិជ្ជកម្មអន្តរជាតិ ធានាដល់ប្រសិទ្ធិភាព និងតម្លាភាព ពាណិជ្ជកម្ម ព្រមទាំងការគោរពបទដ្ឋានគតិយុត្ត ដែលនឹងផ្តល់អត្ថប្រយោជន៍រយៈពេលវែងដល់កម្ពុជានិងប្រទេសក្នុងតំបន់៕
