ក្រុមអ្នកកាសែតកម្ពុជា បានអំពាវនាវទៅតុលាការរាជធានីភ្នំពេញ ឱ្យពន្លឿនការប្រកាសសាលក្រមសំណុំរឿងអតីតអ្នកសារព័ត៌មានវិទ្យុអាស៊ីសេរី ២រូប ឱ្យបានឆាប់។ នេះបើតាមលិខិតចំហមួយចេញនៅថ្ងៃនេះ។
សំណុំរឿងចោទប្រកាន់ទៅលើអតីតអ្នកសារព័ត៌មានវិទ្យុអាស៊ីសេរី លោក អ៊ួន ឈិន និងលោក យាង សុធារិន្ទ ហៅ យាង សុជាមេត្តា ត្រូវបានសាលាដំបូងរាជធានីភ្នំពេញ លើកយកទៅជំនុំជម្រះកាលពីថ្ងៃទី២៦ ខែកក្កដាកន្លងមក។
រហូតមកដល់ថ្ងៃនេះ តុលាការរាជធានីភ្នំពេញ នៅមិនទាន់ប្រកាសសាលក្រមនៃសំណុំរឿងនេះនៅឡើយទេ បន្ទាប់ពីគម្រោងនៃការប្រកាសសាលក្រមកាលពីខែសីហាកន្លងមក ត្រូវបានលើកពេលដោយមិនកំណត់កាលបរិច្ឆេទថ្មីនៅឡើយ។
ក្នុងលិខិតចំហនៅថ្ងៃនេះ ក្រុមអ្នកសារព័ត៌មានកម្ពុជាចំនួន ២៣រូប មកពីស្ថាប័នប្រពន្ធផ្សព្វផ្សាយផ្សេងៗគ្នា ស្នើទៅតុលាការឱ្យពន្លឿនការប្រកាសសាលក្រម ព្រមទាំងទម្លាក់ចោលការចោទប្រកាន់ទៅលើអ្នកសារព័ត៌មានទាំង ២រូបនេះផងដែរ។
លោក អ៊ួន ឈិន និងលោក យាង សុធារិន្ទ ត្រូវបានតុលាការចោទប្រកាន់ពីបទ «ប្រគល់ឱ្យរដ្ឋបរទេសនូវព័ត៌មានជាអាទិ៍ដែលបង្កឱ្យអន្តរាយដល់ការការពារជាតិ» ឬជាការចោទប្រកាន់ថា ពួកគេបានធ្វើចារកម្មឱ្យរដ្ឋបរទេស។
អ្នកកាសែតទាំងពីររូបនេះ ត្រូវបានដោះលែងឱ្យនៅក្រៅឃុំបណ្ដោះអាសន្ន និងស្ថិតក្រោមការត្រួតពិនិត្យតាមផ្លូវតុលាការចាប់តាំងពីខែសីហាក្នុងឆ្នាំ២០១៨ ក្រោយពីពួកគេត្រូវបានចាប់ខ្លួនកាលពីពាក់កណ្ដាលខែវិច្ឆិកា ឆ្នាំ២០១៧។
ក្រុមអ្នកសារព័ត៌មាន បានលើកឡើងក្នុងលិខិតចំហនោះថា ពួកគេមានក្ដីបារម្ភយ៉ាងខ្លាំងចំពោះការប្រកាន់ដ៏«ធ្ងន់ធ្ងរ» និង«គ្មានមូលដ្ឋាន»ប្រឆាំងលើអ្នកកាសែតទាំងពីររូបនេះ។
ក្រៅពីលើកឡើងអំពីតួនាទីដ៏សំខាន់របស់សារព័ត៌មានក្នុងការផ្ដល់ព័ត៌មានពិតប្រាកដជូនប្រជាពលរដ្ឋហើយនោះ ក្រុមអ្នកសារព័ត៌មានកម្ពុជា បានលើកឡើងថា ការចោទប្រកាន់ទៅលើអតីតអ្នកសារព័ត៌មានវិទ្យុអាស៊ីសេរីទាំងពីររូបនេះ កំពុងបង្កភាពភ័យខ្លាចដល់ក្រុមអ្នកសារព័ត៌មានដទៃទៀត និងធ្វើឱ្យកម្រិតសេរីភាពសារព័ត៌មាននៅកម្ពុជាធ្លាក់ចុះ៕
