កុមារាម្នាក់ស្លាប់ភ្លាមៗ ក្នុងគ្រោះអគ្គិភ័យឆេះផ្ទះពលរដ្ឋ នៅសង្កាត់ច្រាំងចំរេះ ខណ្ឌឫស្សីកែវ រាជធានីភ្នំពេញនៅថ្ងៃនេះ ហើយបុរសម្នាក់ជាឪពុកត្រូវបានបញ្ជូនទៅសង្រ្គោះបន្ទាន់នៅមន្ទីរពេទ្យកាល់ម៉ែត្រ។
អភិបាលខណ្ឌឫស្សីកែវ លោក ជា ពិសី បានឱ្យវី.អូ.ឌី ដឹងនៅរសៀលនេះថា គ្រោះអគ្គិភ័យនោះសមត្ថកិច្ចជំនាញបានអន្តរាគមន៍ជួយពន្លត់បានទាំងស្រុង ក្រោយពេលកើតហេតុបានប្រមាណ១ម៉ោង។ លោកបន្តថា អាជ្ញាធរនៅមិនទាន់អាចបូកសរុបទំហំនៃការខូចខាតបាននៅឡើយទេ ប៉ុន្តែលោកបញ្ជាក់ថាមានកុមារាម្នាក់បានស្លាប់ និងមានបុរសម្នាក់ត្រូវបានបញ្ជូនទៅសង្រ្គោះបន្ទាន់នៅមន្ទីរពេទ្យ។ លោក ឲ្យដឹងទៀតថាបុរសនោះក៏បានដឹងខ្លួនហើយដែរ។
អភិបាលខណ្ឌរូបនេះឱ្យដឹងទៀតថា អាជ្ញាធរនៅមិនទាន់អាចសន្និដ្ឋានបានអំពីមូលហេតុឆេះនោះបាននៅឡើយទេ ដោយកំពុងស្រាវជ្រាវ។ លោកថាគ្រោះអគ្គិភ័យនេះបណ្តាលឱ្យផ្ទះឈើ១៣ខ្នងរងផលប៉ះពាល់ ដោយក្នុងនោះ៩ខ្នងឆេះទាំងស្រុង ហើយ៤ខ្នងផ្ទះផ្សេងទៀត គ្រាន់តែឆេះរោលៗប៉ុណ្ណោះ។
លោក បន្តថា ៖«ការខិតខំរបស់អាជ្ញាធរមានសមត្ថកិច្ច គឺបានខិតខំខ្វែងដៃខ្វែងជើងណាស់។ មិញហ្នឹងឡានទឹកប្រហែលជា២០ ដង្ហែរគ្នាដាក់ទៅ ប៉ុន្តែដោយសារច្រកចូលចង្អៀត ទើបយើងចូលបានតែ១ឡានទេអូន។ រ៉ូយ៉ែចូលមួយទៅ ហើយបន្តទឹកដាក់គ្នាទៅ ហើយយើងបានបាញ់ចេញពីម៉ូទ័របូមពីកាណូតចេញពីមាត់ទន្លេដោយបានបាញ់ចេញលឿន និងរហ័ស»។
លោក ជា ពិសី ឱ្យដឹងថា ក្រោយកើតហេតុអាជ្ញាធររាជធានីភ្នំពេញ និងខាងសាខាកាកបាទក្រហមកម្ពុជាក្រុង ព្រមទាំងខណ្ឌបានយកជំនួយបឋមមួយចំនួនជួយដល់គ្រួសារជនរងគ្រោះនិងអ្នកបាត់បង់ជីវិតផងដែរ។ ជាមួយគ្នានេះ លោកអំពាវនាវឱ្យពលរដ្ឋទាំងអស់បង្កើនការប្រុងប្រយ័ត្នបន្ថែមទៀត ចំពោះបញ្ហាគ្រោះអគ្គិភ័យនេះ។
អគ្គស្នងការនគរបាលជាតិកាលពីខែធ្នូ ឆ្នាំមុន បានឱ្យដឹងថា រយៈពេល១១ខែ កាលពីឆ្នាំ២០១៨ គ្រោះអគ្គិភ័យកើតឡើង៤៣៣លើក បណ្តាលឱ្យមនុស្សស្លាប់ចំនួន២១នាក់ និងរងរបួស៧៥នាក់ ព្រមទាំងឆេះផ្ទះ៤០៥ខ្នង៕
