អង្គការ Plan International ជំរុញឱ្យមានការផ្សព្វផ្សាយវិជ្ជមានពីស្ដ្រីវិញឱ្យបានច្រើន ព្រោះថាអង្គការនេះរកឃើញថាឥទ្ធិពលនៃសារក្នុងប្រព័ន្ធផ្សព្វផ្សាយបច្ចុប្បន្នកំពុងតែធ្វើឱ្យប៉ះពាល់ដល់ទំនុកចិត្ត និងក្ដីសុបិន្តរបស់ក្មេងស្រីដែលធ្វើឱ្យប៉ះពាល់ដល់ការសម្រេចចិត្ត និងអាជីពរបស់ពួកគាត់នាថ្ងៃអនាគត។
ក្នុងសេចក្តីប្រកាសព័ត៌មានចុះថ្ងៃទី២០ កញ្ញា ប្រធានស្ដីទីអង្គការ Plan ប្រចាំកម្ពុជាលោក យី គីមថាន បានលើកឡើងថាការផ្សព្វផ្សាយព័ត៌មានភាគច្រើននាពេលបច្ចុប្បន្ននេះមិនសូវផ្ដោតច្រើនលើការផ្សព្វផ្សាយពីស្ដ្រី និងក្មេងស្រីបែបវិជ្ជមានដូចជាភាពជាអ្នកដឹកនាំ ភាពជោគជ័យ ឬសមិទ្ធិផលការងារដែលស្ត្រីបានធ្វើឱ្យបានផុលផុសនោះទេ។
លោកថា៖ « ជាក់ស្ដែង ប្រសិនបើយើងអានព័ត៌មាន ឬមើលទូរទស្សន៍មួយចំនួន យើងនៅតែឃើញមានការផ្សព្វផ្សាយពីក្មេងស្រី និងស្រីក្នុងលក្ខណៈមួយដែលបង្ហាញពីភាពទន់ខ្សោយ និងបន្ទាបតម្លៃរបស់ពួកគាត់ » ។
ថ្លែងប្រាប់ក្រុមអ្នកសារព័ត៌មាននៅព្រឹកនេះលោក យី គឹមថាន បានបញ្ជាក់ថាសារវិជ្ជមានដែលប្រព័ន្ធផ្សព្វផ្សាយអាចធ្វើបាន នោះគឺជាការផ្សព្វផ្សាយ ពីជោគជ័យរបស់ស្ដ្រីក្នុងការប្រើចំណេះដឹងរបស់ខ្លួន ឬភាពជោគជ័យក្នុងកិច្ចការរបស់ស្រ្តី ជាជាងបង្ហាញរូបសម្ផស្សរបស់មនុស្សស្រី។
លោក មានប្រសាសន៍ថា៖ « ជួនកាលយើងផ្ដោតតែលើព័ត៌មានពីភាពសិចស៊ីរបស់ស្រ្តី យើងថតទាក់ទងតែរូបសម្ផស្សរបស់មនុស្សស្រីដែលយកចុះផ្សាយ ដែលនេះមានច្រើននៅក្នុងសារព័ត៌មាន ឬក៏ទស្សនាវដ្ដី ដែលផ្ដោតសំខាន់ទៅលើរូបរាងលើសម្ផស្សរបស់គាត់ ជាជាងកត្ដាជោគជ័យមនុស្សស្រី ឬក៏ក្មេងស្រីនោះ » ។
បើតាមលោក យី គឹមថាន កត្ដាបែបនេះហើយទើបធ្វើឱ្យក្មេងស្រីបាត់បង់ទំនុកចិត្តលើសមត្ថភាពខ្លួន និងធ្វើឱ្យប៉ះពាល់ដល់អាជីពរបស់ពួកគេនៅថ្ងៃអនាគតផងដែរ។
អគ្គនាយកនៃអគ្គនាយកដ្ឋានសមភាពយេនឌ័រ និងអភិវឌ្ឍន៍សេដ្ឋកិច្ចនៃក្រសួងកិច្ចការនារីលោក ថេ ឈុនហាក់ ទទួលស្គាល់ពីបញ្ហានេះ ខណៈលោកជំរុញដល់បណ្ដាញផ្សព្វផ្សាយ និងប្រជាពលរដ្ឋឱ្យកែប្រែផ្នត់គំនិតមិនល្អពីស្ដ្រីចេញផងដែរ។
លោកថា៖ « យើងត្រូវបង្ហាញពីភាពគំរូឱ្យច្រើននៅតាមសហគមន៍ ឬបណ្ដាញសង្គមយើង ដើម្បីឱ្យគាត់ចាប់ផ្ដើមមើលឃើញថា ស្រីខ្លួនឯងគាត់មានសុបិន្តធំ សុបិន្តដែលគាត់គិតថាគាត់អាចធ្វើអ្វីៗបាន » ។
បើតាមលោក ថេ ឈុនហាក់ បច្ចុប្បន្នការចូលរួមរបស់ស្រ្តីមានច្រើនត្រឹមថ្នាក់ឃុំប៉ុណ្ណោះ ខណៈស្ត្រីដែលធ្វើការក្នុងជួរដឹកនាំក៏នៅមានកម្រិតផងដែរ។
តួលេខជំរឿនប្រជាជនក្នុងឆ្នាំ២០១៩នេះបង្ហាញថា ប្រទេសកម្ពុជាមានប្រជាជនប្រមាណ ១៥លាននាក់ ក្នុងនោះស្រ្តីមានជិត៨លាននាក់ ទោះជាយ៉ាងណាចំនួនស្រ្តីក្នុងការងារធំៗនៅមានកម្រិតនៅឡើយ។
ក្នុងតំណាងរាស្ត្រជាប់ឆ្នោតអាណត្តិទី៦នេះ មានស្ត្រីតែ១៩រូបប៉ុណ្ណោះ ក្នុងចំណោមតំណាងរាស្ត្រសរុប ១២៥ក្នុងសភា។ ចំណែកតំណែងឧបនាយករដ្ឋមន្ត្រីមាន៩ រូប មានស្រ្តីតែ១ រូប រីឯថ្នាក់រដ្ឋមន្ត្រីវិញ២៩ មានស្ត្រីជារដ្ឋមន្ត្រី៣រូប។
ដោយឡែកសមាសភាពថ្នាក់ដឹកនាំថ្នាក់ក្រោមជាតិ ២៥ រាជធានីខេត្ត មានអភិបាលខេត្តជាស្ត្រីតែ ១រូបប៉ុណ្ណោះ គឺអភិបាលខេត្តកោះកុង៕
