មន្ត្រីជាន់ខ្ពស់នៃក្រុមប្រឹក្សាអភិវឌ្ឍន៍កម្ពុជាបានឱ្យដឹងថាក្នុងរយៈពេលជាង២ឆ្នាំចុងក្រោយនេះ ទំហំទុនវិនិយោគរបស់ជនជាតិចិនមកវិនិយោគក្នុងខេត្តមាត់សមុទ្រចំនួន៣នៅកម្ពុជាមានទំហំជិត៣ពាន់លានដុល្លារ ស្មើនឹង១១,៥ភាគរយនៃទំហំទុនវិនិយោគសរុប។
ថ្លែងក្នុងសន្នីសិទ្ធសារព័ត៌មាននៅទីស្ដីការគណៈរដ្ឋមន្ត្រីកាលពីម្សិលមិញ អគ្គលេខាធិការរងនៃក្រុមប្រឹក្សាអភិវឌ្ឍន៍កម្ពុជាលោក ជា វុទ្ធី មានប្រសាសន៍ថាចាប់តាំងពីឆ្នាំ២០១៦ ដល់ខែសីហាឆ្នាំ២០១៩ ជនជាតិចិនបានដាក់ទុនវិនិយោគក្នុងខេត្តកំពត កោះកុង និងព្រះសីហនុមានតម្លៃប្រមាណ២,៦ពាន់លានដុល្លារ ក្នុងនោះខេត្តព្រះសីហនុជាង២ពាន់លានដុល្លារ ខេត្តកោះកុងមានជាង៤៧០លានដុល្លារ និងខេត្តកំពតមានជាង១០០លានដុល្លារ។
លោកបន្ថែមថាការបង្កើនទុនវិនិយោគដ៏ច្រើនរបស់ប្រទេសចិន ក៏ដូចជាអ្នកវិនិយោគប្រទេសដទៃមកកម្ពុជានេះ ដែលបានជំរុញដល់កម្ពុជាមានកំណើនសេដ្ឋកិច្ចជាង៧ភាគរយជារៀងរាល់ឆ្នាំ និងឱកាសការងារដល់ពលរដ្ឋជាង១៥ម៉ឺននាក់ជារៀងរាល់ឆ្នាំ។
លោកថា៖ « ខ្ញុំសូមថ្លែងអំណរគុណដល់អ្នកវិនិយោគបរទេសក៏ដូចជាអ្នកវិនិយោគក្នុងប្រទេសយើងដែលផ្ដល់ឱ្យកម្ពុជានូវការអភិវឌ្ឍសេដ្ឋកិច្ចដែលទទួលបានអត្រាខ្ពស់គឺជាមធ្យម៧,៧ភាគរយក្នុងមួយឆ្នាំ ហើយក៏ផ្ដល់លទ្ធភាពបង្កើតការងារជូនបងប្អូនកម្មករយើងដែលមានចំនួនជាមធ្យមក្នុងមួយឆ្នាំជាង១៥ម៉ឺននាក់ » ។
ក្នុងរបាយការណ៍ការវិនិយោគដោយផ្ទាល់ពីបរទេសចូលកម្ពុជាក្នុងឆ្នាំ២០១៨ ចេញផ្សាយដោយអគ្គលេខាធិការអាស៊ាន កម្ពុជាទទួលបានការវិនិយោគពីបរទេសចំនួន២ ៧៣២លានដុល្លារ កើនឡើងជាង៥រយលានដុល្លារ បើធៀបនឹងឆ្នាំ២០១៦ ក្នុងនោះទំហំទុនវិនិយោគពីប្រទេសចិនមានប្រមាណ៣៥ភាគរយជាប្រាក់វិនិយោគពីប្រទេសចិន៕
