គណបក្សប្រជាធិបតេយ្យមូលដ្ឋាន(គ.ប.ម.) បានជំរុញទៅរដ្ឋាភិបាលឱ្យស្ដារស្ថានភាពនៃការគោរពសិទ្ធិមនុស្ស និងលទ្ធិប្រជាធិបតេយ្យឡើងវិញ ដោយថា ជាគន្លឹះដើម្បីរក្សាប្រព័ន្ធអនុគ្រោះពន្ធដែលផ្ដល់ឱ្យដោយសហភាពអឺរ៉ុប។
ប្រព័ន្ធអនុគ្រោះពន្ធពាណិជ្ជកម្ម«អ្វីគ្រប់យ៉ាងលើកលែងតែអាវុធ» (EBA) ដែលត្រូវបានផ្ដល់មកឱ្យកម្ពុជាសម្រាប់នាំចេញទំនិញគ្រប់ប្រភេទចូលទីផ្សារសហគមន៍អឺរ៉ុបដោយរួចផុតពីកាតព្វកិច្ចបង់ពន្ធគយនោះ កំពុងស្ថិតនៅក្រោមការត្រួតពិនិត្យពីសំណាក់សហភាពអឺរ៉ុប ដែលអាចឈានទៅរកការដកហូតប្រព័ន្ធអនុគ្រោះពន្ធនេះនៅឆ្នាំក្រោយ។
នៅចន្លោះថ្ងៃទី១៣ ដល់ថ្ងៃទី១៧ ខែតុលា បញ្ហា EBA នេះ ត្រូវបានលោកនាយករដ្ឋមន្ត្រី ហ៊ុន សែន នាំយកទៅជជែកអំឡុងដំណើរទស្សនកិច្ចរបស់លោកទៅកាន់ប្រទេសឆែក ហុងគ្រី និងប៊ុលហ្ការី ជាទីដែលលោកបានស្នើទៅមេដឹកនាំប្រទេសជាសមាជិកសហភាពអឺរ៉ុបទាំង ៣នេះ ឱ្យជួយបន្តគាំទ្រដល់ការផ្ដល់ប្រព័ន្ធអនុគ្រោះពន្ធនេះមកដល់កម្ពុជាបន្តទៀត។
ប៉ុន្តែ គណបក្សប្រជាធិបតេយ្យមូលដ្ឋាន បានលើកឡើងនូវគន្លឹះ ៣ ដែលគណបក្សមួយនេះ ចាត់ទុកជាដំណោះស្រាយសម្រាប់រក្សាប្រព័ន្ធអនុគ្រោះពន្ធ EBA របស់សហភាពអឺរ៉ុប។
គន្លឹះទាំង ៣ដែលលើកឡើងដោយ គ.ប.ម. មានការដោះលែងមេដឹកនាំគណបក្សសង្គ្រោះជាតិ លោក កឹម សុខា ដែលកំពុងស្ថិតនៅក្រោមការឃុំខ្លួនក្នុងផ្ទះ ការបើកលំហសេរីភាពដល់គណបក្សនយោបាយ សង្គមស៊ីវិល និងប្រព័ន្ធផ្សព្វផ្សាយឯករាជ្យ និងការធានានូវការបោះឆ្នោតដោយសេរីនាពេលខាងមុខ។
គ.ប.ម. បានលើកឡើងក្នុងថ្លែងការណ៍ថា៖ «គ.ប.ម. យល់ថា ការកែលម្អស្ថានភាពតាមរយៈវិធានការសំខាន់ៗទាំង ៣ដូចខាងលើនេះ ជាការចាប់ផ្ដើមដ៏ល្អក្នុងការពង្រឹងកិច្ចសហការគ្នារវាងកម្ពុជា និងសហភាពអឺរ៉ុប និងដើម្បីធ្វើឱ្យប្រសើរឡើងនូវស្ថានភាពនយោបាយ និងសេដ្ឋកិច្ចនៅកម្ពុជា»។
ប្រព័ន្ធអនុគ្រោះពន្ធ EBA ដែលត្រូវបានសហភាពអឺរ៉ុបផ្ដល់ទៅឱ្យបណ្ដាប្រទេសក្រីក្រនោះ បានជួយជំរុញដល់ការនាំចេញទំនិញនានារបស់កម្ពុជាចូលទៅបណ្ដាប្រទេសជាសមាជិកសហភាពអឺរ៉ុបដោយរួចផុតពីកាតព្វកិច្ចបង់ពន្ធគយដែលមានតម្លៃយ៉ាងហោចណាស់ ៧០០លានដុល្លារក្នុងមួយឆ្នាំ។
សហភាពអឺរ៉ុប បានចាប់ផ្ដើមនីតិវិធីដែលអាចឈានទៅរកការដកហូតប្រព័ន្ធអនុគ្រោះពន្ធ EBA ពីកម្ពុជា ចាប់តាំងពីខែកុម្ភៈដើមឆ្នាំ២០១៩នេះ ហើយសេចក្ដីសម្រេចលើបញ្ហា EBA សម្រាប់ប្រទេសកម្ពុជានេះ នឹងត្រូវធ្វើឡើងនៅក្នុងខែកុម្ភៈដើមឆ្នាំក្រោយនេះ។
តួលេខពាណិជ្ជកម្មរបស់សហភាពអឺរ៉ុប បង្ហាញថា កម្ពុជាបាននាំចេញទំនិញមានតម្លៃដល់ទៅជាង ៥.៣៦ពាន់លានដុល្លារទៅកាន់ទីផ្សារសហគមន៍អឺរ៉ុបកាលពីឆ្នាំ២០១៨កន្លងមក ក្នុងនោះផលិតផលកាត់ដេរមានចំណែកដល់ទៅជិត ៩០ភាគរយ៕