អង្គការឃ្លាំមើលសិទ្ធិមនុស្សអន្តរជាតិ Human Right Watch ជំរុញទៅរដ្ឋាភិបាលកម្ពុជាឱ្យដោះលែងអ្នកទោសនយោបាយទាំងអស់ និងបានជំរុញដល់អន្តរជាតិឱ្យមានវិធានការខ្លាំងក្លាលើរឿងនេះផងដែរ។
ក្នុងសេចក្តីប្រកាសព័ត៌មានចុះថ្ងៃ២០ តុលា អង្គការឃ្លាំមើលសិទ្ធិមនុស្ស Human Right Watch ដែលមានមូលដ្ឋាននៅទីក្រុងញ៉ូវយ៉ក សហរដ្ឋអាមេរិក បានលើកឡើងថាគិតត្រឹមថ្ងៃ២០ តុលា មានសមាជិកអតីតបក្ស ប្រឆាំង និងអ្នករិះគន់រដ្ឋាភិបាលជិត៦០នាក់ដែលត្រូវបានចាប់ឃុំខ្លួន ក្រោយពេលពួកគេហ៊ានបរិយាយរិះគន់រដ្ឋាភិបាលលោកហ៊ុន សែន ក្នុងបណ្ដាញសង្គម និងជួបជុំគ្នាជាដើម។
Human Right Watch លើកឡើងថា៖ « ការសើរើច្បាប់គាប់សង្កត់ និងការធ្វើវិសោធនកម្មច្បាប់ដែលមានស្រាប់ក្នុងរយៈពេលប៉ុន្មានឆ្នាំចុងក្រោយនេះបានផ្ដល់ឱ្យអាជ្ញាធរនូវឧបករណ៍ច្បាប់ក្នុងការចាប់ និងឃុំខ្លួនបុគ្គលម្នាក់ៗតាមទំនើងចិត្ត ចំពោះការបញ្ចេញមតិរបស់ពួកគេទាំងសាធារណៈ និងអ៊ិនធើណិត ការទាក់ទងជាមួយអ្នកទៃទាំងនៅក្នុងក្រុម ឬការប្រជុំជាសាធារណៈដោយសន្ដិវិធីក្ដី » ។
Human Right Watch ចាត់ទុកសកម្មភាពនេះជាការរំលោភសិទ្ធិមនុស្សធ្ងន់ធ្ងរ និងជំរុញដល់រដ្ឋាភិបាល ឲ្យបញ្ឈប់សកម្មភាពទាំងនេះ និងដោះលែងអ្នកទាំងនោះផងដែរ។
នាយករងប្រចាំតំបន់អាស៊ីនៃអង្គការ Human Right Watch លោក Phil Robertson ក៏បានជំរុញដល់រដ្ឋាភិបាលប្រទេសម្ចាស់ជំនួយឱ្យពិនិត្យមើលពីបញ្ហានេះនឹងមានវិធានការផងដែរ។
លោក Phil Robertson៖ « រដ្ឋាភិបាល និងម្ចាស់ជំនួយបរទេសគួរតែអំពាវនាវឱ្យបញ្ឈប់នូវការចាប់ខ្លួននេះ ហើយជំរុញឱ្យកម្ពុជាដោះលែងអ្នកទាំងអស់ដែលត្រូវបានឃុំឃាំងទាំងអស់នេះដោយគ្មានលក្ខខណ្ឌ » ។
ឆ្លើយតបទៅនឹងសំណួររបស់VOD តាមសារអេឡិចត្រូនិកTelegram អ្នកនាំពាក្យគណៈកម្មាធិការសិទ្ធិមនុស្សលោក កត្តា អ៊ន ឱ្យដឹងថា ការលើកឡើងរបស់Human Right Watch គឺជាការលើកឡើង ដោយមិនបានពិចារណាអំពីអង្គហេតុ អង្គច្បាប់ ឬសក្ខីកម្មនានានៃស្ថានភាពសិទ្ធិមនុស្សនោះទេ។ លោកចាត់ទុកថានេះជាការបរិយាយតាំងនាមឱ្យក្រុមប្រឆាំងផ្កាប់មុខមួយប៉ុណ្ណោះ ហើយចេតនានេះក៏គ្មានឥទ្ធិពលអ្វីដល់របស់ប្រទេសម្ចាស់ជំនួយនោះទេ។
លោកសរសេរថា៖ « មនុស្ស៦០ នាក់ដែលបានឃាត់ខ្លួន មិនមែនសំដែងមតិ ឬប្រមូលផ្តុំដោយសន្តិវិធីទេ ពួកគាត់មានពាក់ព័ន្ធនៃអំពើល្មើសច្បាប់ ហើយក្នុងចំណោមនោះពាក់ព័ន្ធនឹងបទឧក្រិដ្ឋ ដែលរដ្ឋត្រូវអនុវត្តច្បាប់ជាតិរបស់ខ្លួន ដើម្បីប្រយោជន៍ជាតិរបស់ខ្លួន។ ករណីនេះ មិនខុសពីអង្គការ human rights watch ទេ ក្នុងករណីមន្រ្តីណាមួយរបស់ខ្លួនធ្វើខុស ក៍អង្គការនេះអនុវត្តបទបញ្ជាផ្ទៃក្នុងរបស់ខ្លួនដែរ។ ជាគោលការណ៍ច្បាប់ និង សិទ្ធិមនុស្ស ការប្រើប្រាស់សិទ្ធិសេរីភាពបញ្ចេញមតិ និងប្រមូលផ្តុំត្រូវគោរពច្បាប់ និង សិទ្ធិ កត្តិយស សេចក្តីថ្លៃថ្នូររបស់អ្នកដទៃ បើមិនអញ្ចឹងទេគឺល្មើសច្បាប់ហើយ ហើយត្រូវទទួលខុសត្រូវចំពោះមុខច្បាប់ » ។
លោក សម រង្ស៊ី បានប្រកាសវិលចូលប្រទេសកម្ពុជានៅថ្ងៃទី៩ វិច្ឆិកា ខាងមុខដោយបានអំពាវនាវទៅកងកម្លាំងប្រដាប់អាវុធ អ្នកគាំទ្ររបស់លោក និងប្រជាពលរដ្ឋទូទៅ ឱ្យចូលរួមទទួលស្វាគមន៍ផងដែរ។ ទោះជាយ៉ាងណារដ្ឋាភិបាលរបស់លោកនាយករដ្ឋមន្ត្រី ហ៊ុន សែន បានចាត់ទុកដំណើរវិលត្រឡប់មកវិញរបស់អតីតមេបក្សប្រឆាំងថា មានគោលដៅ «ផ្ដួលរំលំរដ្ឋាភិបាល» និងបានចាត់ទុកជាក្រុមភេរកម្ម ដែលត្រូវកម្ចាត់ផងដែរ។
អ្នកវិភាគនយោបាយលោកបណ្ឌិតឡៅ ម៉ុងហៃ ធ្លាប់លើកឡើងប្រាប់VOD កាលពីខែមុនថា ជម្លោះនយោបាយនៅកម្ពុជាកំពុងតែរុញច្រានប្រទេសខ្លួនឯងឱ្យធ្លាក់ក្នុងបញ្ហាកាន់តែធ្ងន់ធ្ងរ ដោយលោកជំរុញដល់អ្នកនយោបាយទាំងពីរគួរឈប់ឈ្លោះគ្នា ហើយស្រុះស្រួលវិលរកតុចរចារដើម្បីពិភាក្សាពីបញ្ហាជាតិវិញទើបធ្វើឱ្យប្រទេសជាតិរីកចំរើន។
លោកឡៅ ម៉ុងហៃ៖ « យើងមានយន្តការរួចហើយ តែសម្រាប់អ្នកកាន់អំណាចចេះតែក្រាញអំណាចរៀងៗខ្លួនអាហ្នឹងវាតាមហ្នឹងទៅ។ សម្រាប់យើងជាអ្នកមិនពាក់ព័ន្ធអំណាច ដែលយើងគិតពីសុខមាលភាពរបស់ប្រជាពលរដ្ឋយើងទាំងអស់គ្នា មានតែអំពាវនាវឱ្យគេយកយន្តការដែលមានសម្រាប់ ដែលធ្លាប់ប្រើប្រាស់ដើម្បីដោះស្រាយទំនាស់ក្នុងស្រុកយើងនេះ » ។
គិតចាប់តាំងពីដើមឆ្នាំ២០១៩ រហូតមកដល់ពេលនេះសមាជិក និងអ្នកគាំទ្រអតីតបក្សប្រឆាំងចំនួន៥០នាក់ត្រូវបាន ចាប់ខ្លួន និងចោទប្រកាន់ពីបទ «រួមគំនិតក្បត់» ពាក់ព័ន្ធទៅនឹងការបង្ហាញជំហរគាំទ្រដំណើរវិលត្រឡប់របស់លោក សម រង្ស៊ីមកកម្ពុជាវិញ៕
