ក្រុមអ្នកគាំទ្រអតីតគណបក្សសង្គ្រោះជាតិប្រចាំប្រទេសជប៉ុនគ្រោងធ្វើបាតុកម្មនាដើមខែក្រោយដើម្បីគាំទ្រការវិលត្រលប់របស់លោក សម រង្ស៊ី ចូលស្រុកខ្មែរវិញ។
ក្នុងសេចក្តីប្រកាសព័ត៌មានចុះថ្ងៃទី២៤ តុលា ចលនាសង្គ្រោះជាតិប្រចាំប្រទេសជប៉ុន ឱ្យដឹងថា ក្រុមខ្លួនដែលមានគ្នាជាង២០០នាក់គ្រោងធ្វើបាតុកម្មនៅសួនចងចាំសន្ដិភាពហ៊ីរ៉ូស៊ីម៉ា នៅថ្ងៃទី ៣ វិច្ឆិកាខាងមុខ ដោយចាប់ផ្ដើមពីម៉ោង៩ ដល់ម៉ោង២រសៀល ដើម្បីបង្ហាញការគាំទ្រដល់លោក សម រង្ស៊ី ក្នុងការត្រលប់ចូលកម្ពុជាវិញនៅថ្ងៃបុណ្យឯករាជ្យជាតិខាងមុខ។
សេចក្តីប្រកាសដដែល បានឲ្យដឹងបន្ថែមថាបាតុកម្មនោះក៏ធ្វើឡើងដើម្បីជាការថ្កោសទោសដែលរដ្ឋាភិបាលដកទិវាសន្តិភាពក្រុងប៉ារីស២៣តុលាចេញពីថ្ងៃបុណ្យជាតិ និងការចុះសន្ធិសញ្ញាទទួលស្គាល់ការបោះបង្គោលព្រំដែនជាមួយវៀតណាមផងដែរ។
ទោះយ៉ាងណាក៏ដោយរដ្ឋាភិបាលលោកនាយករដ្ឋមន្ត្រី ហ៊ុន សែន បានចាត់ទុកដំណើរវិលត្រឡប់មកវិញរបស់លោក សម រង្ស៊ី ថាគឺជាការវិលត្រលប់របស់មេក្រុមភេរវកម្មដែលមានបំណងផ្ដួលរំលំរដ្ឋាភិបាលដែលនឹងត្រូវបង្ក្រាបផងដែរ។
កាលពីថ្ងៃទី៧ តុលា កន្លងទៅ នៅចំពោះមុខសិស្សនិទ្ទេសA ជាង៤០០នាក់ លោកនាយករដ្ឋមន្ត្រី ហ៊ុន សែន បានប្រកាសបញ្ចេញទ័ពឱ្យត្រៀមបង្ក្រាបក្រុមលោក សម រង្ស៊ី នៅហ្នឹងកន្លែង ប្រសិនឃើញឈានជើងចូលដល់កម្ពុជា ខណៈអ្នកគាំទ្រក៏ត្រូវចាប់ខ្លួនផងដែរ។
លោកថា៖ « កងទ័ពត្រូវដឹងតួនាទីនៅពេលសភាពការធម្មតាទ័ពអត់ចេញទេ។ ចេញតែប៉ូលីស និងកងរាជអាវុធ ហត្ថទេ ហើយនគរបាលយុត្តិធម៌ តែបើប្រកាសទ័ពបែបនេះ ហើយបានន័យថាទ័ពត្រូវពង្រាយហើយ ហើយប្រើ អាវុធគ្រប់ធុន ព្រោះអានេះមិនមែនជាបាតុកម្មទាមទារឯណា អានេះចូលដល់ប្រដាប់អាវុធ។ ហើយអ្នកគាំទ្រទាំងប៉ុន្មានអត់ចាំបាច់និយាយទេ ឃើញចាប់ៗ ខ្ញុំមិនចាំបាច់និយាយទេព្រោះអានេះភារកិច្ចបាន ប្រគល់ដោយ ច្បាប់ រួចទៅហើយ » ។
អ្នកវិភាគនយោបាយលោកបណ្ឌិតឡៅ ម៉ុងហៃ លើកឡើងថាអ្នកនយោបាយទាំងអស់គួរងាកមកគោរពរដ្ឋធម្មនុញ្ញជាតិ ដោយស្នើឱ្យព្រះមហាក្សត្រជាអ្នកសម្របសម្រួលដល់ជម្លោះនយោបាយដែលកើតឡើងកន្លងមក ដើម្បីរួបរួមជាតិដែលបែកបាក់នេះឡើងវិញហើយ។
លោកថា៖ « ព្រះមហាក្សត្រមានតួនាទីជាអ្នកអាជ្ញាកណ្ដាល ដូច្នេះបើសុំឱ្យលោកបំពេញតួនាទីជាអាជ្ញាកណ្ដាលរៀងនេះប្រហែលដោះស្រាយបាន » ។
លោកសម រង្ស៊ី បានកំណត់ថ្ងៃ៩ វិច្ឆិកា ឆ្នាំ២០១៩ ដើម្បីត្រលប់ចូលកម្ពុជាវិញ ដោយមានការរៀបចំផែនការជាបន្តបន្ទាប់ ខណៈរដ្ឋាភិបាលក៏ចាត់វិធានការឆ្លើយតបផងដែរ។
គិតត្រឹមថ្ងៃ២០ ខែតុលា អតីតសកម្មជន និងអ្នកគាំទ្របក្សប្រឆាំង ចំនួន ៥០នាក់ហើយ ត្រូវបានសមត្ថកិច្ចចាប់ខ្លួន និងត្រូវបានតុលាការចោទប្រកាន់ពីបទ «រួមគំនិតក្បត់» ពាក់ព័ន្ធទៅនឹងការបង្ហាញជំហរគាំទ្រដំណើរវិល ត្រឡប់របស់លោក សម រង្ស៊ីមកកម្ពុជាវិញ៕