ក្រសួងបរិស្ថានយកឱកាសបុណ្យអុំទូកដើម្បីផ្សព្វផ្សាយពីវិធានការរបស់រដ្ឋាភិបាលលើអ្នកចោលសំរាមខុសច្បាប់ ខណៈបញ្ជាក់ថា ក្រោយចប់ពិធីនេះវិធានការនឹងអនុវត្តដោយមិនលើកលែងនោះទេ។
អ្នកនាំពាក្យក្រសួងបរិស្ថាន លោក នេត្រ ភ័ក្ត្រា មានប្រសាសន៍ប្រាប់ក្រុមអ្នកសារព័ត៌មានក្នុងពិធីបើកសន្និបាតបូកសរុបការងារប្រចាំឆ្នាំ២០១៩ នៅព្រឹកនេះថា នាថ្ងៃបុណ្យអុំទូកថ្ងៃទី១០ ១១ និង១២ ខែវិច្ឆិកាខាងមុខ ក្រសួងគ្មានវិធានការណាមួយក្នុងការពិន័យអ្នកដែលបានចូលរួមរួចចោលសំរាមផ្ដេសផ្ដាសនោះទេ ដោយប្រើឱកាសនេះក្នុងការផ្សព្វផ្សាយវិធានការថ្មី និងពន្យល់ពលរដ្ឋពីបញ្ហានេះវិញ។
លោកថា៖ « ខ្ញុំគិតថា ក្នុងពិធីបុណ្យអុំទូកនេះ បើទោះបីយើងមានច្បាប់ក្នុងការផាកពិន័យ ក៏ខ្ញុំគិតថា ដោយសារមនុស្សច្រើន យើងប្រើប្រាស់នៃការអប់រំផ្សព្វផ្សាយតាមរយៈអ្នកស្ម័គ្រចិត្តក្នុងបរិវេនណនៃការរៀបចំពិធីបុណ្យនេះ ដើម្បីអប់រំផ្សព្វផ្សាយជូនគាត់។ ហើយចប់បីថ្ងៃនេះ សម្រាប់អ្នកដែលមិនមានការយល់ដឹង ឬក៏បន្តបំពុលបរិស្ថានផ្ដេសផ្ដាស ឬមួយក៏អីហ្នឹង ប្រសិនជាទីភ្នាក់ងារបរិស្ថាន ឬមួយក៏ទីភ្នាក់ងារនៅតាមខណ្ឌសង្កាត់គាត់ចាប់បានគឺនឹងត្រូវផាកពិន័យ » ។
ក្នុងប្រកាសអន្តរក្រសួងចុះថ្ងៃទី១១ ខែកញ្ញា ឆ្នាំ២០១៩ ក្រសួងមហាផ្ទៃ ក្រសួងសេដ្ឋកិច្ច និងក្រសួងបរិស្ថានបានសម្រេចឱ្យរដ្ឋបាលរាជធានី ក្រុង ស្រុក ខណ្ឌទាំងអស់បង្កើតគណៈកម្មការទទួលបន្ទុកអនុវត្តន៍ការពិន័យអន្តរការលើបទល្មើសនានាដែលមានចែងក្នុងជំពូកទី៧នៃអនុក្រឹត្យស្ដីពីការគ្រប់គ្រងសំរាម សំណល់រឹងទីប្រជុំជន ដោយថា ដល់ពេលដែលត្រូវអនុវត្តតឹងរ៉ឹងចំពោះអ្នកចោលសំរាមមិនត្រឹមត្រូវហើយ។
ប្រធានក្រុមយុវជនសំរាម លោក សាន ដារ៉ាវីត ថាលោកមិនមានយោបល់យ៉ាងណាចំពោះចំណាត់ការរបស់រដ្ឋនៅពេលនេះទេ ខណៈលោកបញ្ជាក់ថា ក្រុមលោកនឹងធ្វើយុទ្ធនាការប្រមូលសំរាមនៅថ្ងៃអុំទូក ដើម្បីជំរុញឱ្យមានការចូលរួមពីពលរដ្ឋខ្មែរឱ្យយកចិត្តទុកដាក់លើបញ្ហានេះ។
លោក សាន ដារ៉ាវីត លើកឡើងថា៖ « អ្វីដែលយើងធ្វើតាំងពីដើមមកគឺចង់ឱ្យមានការចូលរួម យ៉ាងហោចណាស់ក៏មានក្រសួងទេសចរណ៍បានគាំទ្រថា ការធ្វើបែបហ្នឹងវាល្អអីអញ្ចឹងដែរ។ មានការចូលរួមពីក្រសួង មានការចូលរួមពីពលរដ្ឋទូទៅ ពីយុវជន អញ្ចឹងនៅតែអាជ្ញាធរមួយទៀត ប្រសិនគាតអនុវត្តច្បាប់ត្រឹមត្រូវទៀត វានឹងធ្វើឱ្យផ្នត់គំនិតពលរដ្ឋយើងលើសំរាមនឹងដូចពលរដ្ឋប្រទេសរីកចំរើនផ្សេងទៀតដូចសាំងហ្គារពួរដូចអីហើយ » ។
ក្នុងរយៈពេល៣ថ្ងៃនៃព្រះរាជពិធីបុណ្យអុំទូកកាលពីឆ្នាំ២០១៨ ក្រុមហ៊ុនប្រមូលសំរាមស៊ិនទ្រី ឱ្យដឹងថា ខ្លួនប្រមូលសំរាមបានជាង៦ពាន់តោន។
ជំពូកទី៧ នៃអនុក្រឹត្យស្ដីពីការគ្រប់គ្រងសំរាម សំណល់រឹងទីប្រជុំជន បានចែងពីការពិន័យជាប្រាក់រាប់ចាប់ពីអ្នកចោលសំរាមនៅតាមទីសាធារណៈ អ្នករៀបចំសំរាមទុកដាក់សំរាមមិនត្រឹមត្រូវ និងអ្នកគេចវេសពីការទទួលខុសត្រូវលើសំរាមខ្លួន ត្រូវប្រឈមនឹងការពិន័យជាប្រាក់ពីពីរម៉ឺនរៀលដល់បួនលានរៀលតាមទំហំនៃកំហុសដែលបានប្រព្រឹត្តិ៕