ឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេសកម្ពុជា លោក ប្រាក់ សុខុន បានអះអាងថាលោកគ្មានសញ្ជាតិផ្សេងក្រៅពីសញ្ជាតិកម្ពុជានោះឡើយ។
ការអះអាងនេះ ធ្វើឡើងក្រោយពេលភ្នាក់ងារសារព័ត៌មានអន្តរជាតិបានចុះផ្សាយអំពីមន្ត្រីជាន់ខ្ពស់រដ្ឋាភិបាល និងសាច់ញាតិលោកនាយករដ្ឋមន្ត្រី ហ៊ុន សែន ជាច្រើនរូបបានទិញសញ្ជាតិ Cypriot នៅតំបន់អឺរ៉ុប និងកំពុងសុំសញ្ជាតិពីប្រទេសមួយនេះថែមទៀតផង។
ថ្លែងប្រាប់អ្នកសារព័ត៌មាននៅក្នុងស្ថានទូតអាល្លឺម៉ង់នៅរាជធានីភ្នំពេញនាព្រឹកនេះ រដ្ឋមន្ត្រីក្រសួងការបរទេសកម្ពុជា លោក ប្រាក់ សុខុន មិនបានឆ្លើយតបទៅនឹងសំណួរអ្នកកាសែត ជុំវិញការទិញនិងស្នើសុំសញ្ជាតិពីប្រទេស Cyprus នោះឡើយ ដោយលោករុញឱ្យសួរទៅស្ថាប័នជំនាញ។
ចំណែករូបលោកវិញ លោកអះអាងថា គ្មានសញ្ជាតិផ្សេងក្រៅពីកម្ពុជានោះឡើយ។
លោក ប្រាក់ សុខុន៖ «[អ្នកកាសែត] អីចឹងមួយទៀត តើឯកឧត្តមមានសញ្ជាតិផ្សេងដែរទេចាស៎? [លោក ប្រាក់ សុខុន] ខ្ញុំខ្មែរសុទ្ធ។ ហាសហា»។
កាលពីថ្ងៃទី១៦ ខែតុលា ទីភ្នាក់ងារសារព័ត៌មានរ៉យទ័រ (Reuter) បានចុះផ្សាយថា សាច់ញាតិ និងមន្ត្រីជាន់ខ្ពស់បក្សកាន់អំណាចមួយចំនួនដែលស្និទ្ធនឹងលោកនាយករដ្ឋមន្ត្រី ហ៊ុន សែន បានចំណាយលុយរាប់លានដុល្លារសហរដ្ឋអាមេរិកទៅវិនិយោគនៅប្រទេស Cyprus ដែលជាប្រទេសតូចមួយក្នុងសហគមន៍អឺរ៉ុប ដើម្បីទទួលបានសញ្ជាតិប្រទេសនេះ។
ទីភ្នាក់ងារសារព័ត៌មានដដែល បញ្ជាក់ថា សាច់ញាតិ និងមន្ត្រីជាន់ខ្ពស់រដ្ឋាភិបាលទាំងនោះរួមមាន កូនស្រីលោក ហ៊ុន ណេង ដែលជាបងបង្កើតលោក ហ៊ុន សែន គឺ អ្នកស្រី ហ៊ុន គឹមឡេង មានអចលនទ្រព្យតម្លៃរាប់សិបលានដុល្លារសហរដ្ឋអាមេរិកនៅទីក្រុងឡុងដ៍ និងសិង្ហបុរី ព្រមទាំងបានវិនិយោគក្នុងទំហំទឹកប្រាក់ជាង២លានដុល្លារនៅប្រទេស Cyprus ហើយអ្នកស្រីទទួលបានសញ្ជាតិប្រទេសនេះក្នុងឆ្នាំ២០១៦។
ប្រភពដដែលបន្ថែមថា លោក នេត សាវឿន ស្វាមីអ្នកស្រី ហ៊ុន គឹមឡេង និងកូនស្រីរបស់ខ្លួនពីរនាក់ទៀត ក៏បានស្នើសុំសញ្ជាតិពីប្រទេស Cyprus ក្នុងឆ្នាំ២០១៦។ បន្ថែមពីនេះ អ្នកស្រី ហ៊ុន ចន្ថា ក្មួយស្រីម្នាក់ទៀតរបស់លោក ហ៊ុន សែន បានកាន់កាប់អចលនទ្រព្យតម្លៃរាប់សិបលានដុល្លារនៅក្រុងឡុងដ៍ និងជិះយន្តហោះឯកជនទៅកាន់រមណីយដ្ឋានប្រណិតៗនៅតំបន់អឺរ៉ុបទៀតផង។
ទីភ្នាក់ងារសារព័ត៌មានរ៉យទ័រ ឲ្យដឹងទៀត អ្នកស្រី ជឹង សុភាព ហៅយាយភូ ដែលជាមនុស្សស្និទ្ធនឹងភរិយាលោក ហ៊ុន សែន ទទួលបានសញ្ជាតិពីប្រទេស Cyprus នៅក្នុងឆ្នាំ២០១៧ បន្ទាប់ពីវិនិយោគលុយ២លានដុល្លារសហរដ្ឋអាមេរិកលើសណ្ឋាគារ Radisson Blu នៅប្រទេសនេះក្នុងឆ្នាំដដែល។
រីឯស្វាមីរបស់យាយ ភូ វិញ គឺលោក ឡៅ ម៉េងឃិន ដែលជាសមាជិកព្រឹទ្ធសភាមកពីគណបក្សប្រជាជនកម្ពុជា បានស្នើសុំសញ្ជាតិពីប្រទេស Cyprus ជាមួយសមាជិកគ្រួសារ៥នាក់ផ្សេងទៀតនៅក្នុងឆ្នាំ ២០១៦ និង២០១៧។
រ៉យទ័រ ឱ្យដឹងទៀតថា ឧបនាយករដ្ឋមន្ត្រី និងជារដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន ក៏បានស្នើសុំសញ្ជាតិហ្ស៊ីប ក្នុងឆ្នាំ២០១៧ដែរ។ ចំណែកភរិយារបស់លោក អូន ព័ន្ធមុនីរ័ត្ន គឺអ្នកស្រី អ៊ឹម ប៉ូលីកា ដែលជាកូនបង្កើតអតីតរដ្ឋមន្ត្រីក្រសួងអប់រំ លោក អ៊ឹម សុទ្ធី បានវិនិយោគលុយជាង២លានដុល្លារសហរដ្ឋអាមេរិកលើសណ្ឋាគារ Radisson Blu ក្នុងឆ្នាំ២០១៧ និងទទួលបានសញ្ជាតិពីប្រទេស Cyprus ក្នុងឆ្នាំដដែលនោះផងដែរ៕