អគ្គលេខាធិការសហប្រជាជាតិ លោក អង់តូនីញូ ហ្គុយតេរេស បានរម្លឹកពីភាពចាំបាច់នៃការចរចារដោយសន្ដិវិធីនៅកម្ពុជាបច្ចុប្បន្ន ដែលនឹងបង្កឱ្យមានបរិយាកាសនយោបាយអំណោយផលមួយដល់ជាតិ។ នេះបើតាមហ្វេសបុកផ្លូវការរបស់អង្គការសិទ្ធិមនុស្សសហប្រជាជាតិប្រចាំកម្ពុជា។
ទំព័រហ្វេសបុកសិទ្ធិមនុស្សសហប្រជាជាតិប្រចាំកម្ពុជា United Nations Human Rights in Cambodia សរសេរនៅថ្ងៃនេះថា អគ្គលេខាធិការនៃអង្គការសហប្រជាជាតិ លោក អង់តូនីញូ ហ្គុយតេរេស កំពុងតាមដានស្ថានភាពវិវឌ្ឍន៍នៅកម្ពុជា ទាក់ទងនឹងការប្រកាសវិលត្រឡប់មកវិញរបស់លោក សម រង្ស៊ី និងមេដឹកនាំផ្សេងទៀតនៃគណបក្សប្រឆាំង។ លោកមានក្តីបារម្ភចំពោះវិធានការរឹតត្បិតរបស់អាជ្ញាធរទៅលើសេរីភាពក្នុងការធ្វើដំណើរ ការជួបប្រជុំ និងការដាក់ពង្រាយកម្លាំងយោធានៅតាមបន្ទាត់ព្រំដែនជាប់ជាមួយប្រទេសថៃ។ United Nations Human Rights in Cambodia បានសរសេរថា៖
« អគ្គលេខាធិការធ្វើការគូសបញ្ជាក់អំពីភាពចាំបាច់ក្នុងការបង្កើតឱ្យមានកិច្ចសន្ទនាដោយសន្តិវិធី ក្នុងចំណោមអ្នកពាក់ព័ន្ធទាំងអស់ និងមានបរិយាកាសនយោបាយមួយដែលអំណោយផល ដោយគ្មានការបំភិតបំភ័យ ការយាយីធ្វើទុក្ខបុកម្នេញ ឬការភ័យខ្លាច » ។
ក្រោយប្រកាសជាសាធារណៈអំពីគម្រោងវិលត្រឡប់មកកាន់ប្រទេសកម្ពុជាវិញនាថ្ងៃទី៩ វិច្ឆិកា លោក សម រង្ស៊ី អំពាវនាវជាបន្តបន្ទាប់ទៅកងកម្លាំងប្រដាប់អាវុធ និងប្រជាពលរដ្ឋទូទៅ ឱ្យចូលរួមទទួលស្វាគមន៍ដំណើរវិលត្រឡប់របស់លោក ខណៈលោកនាយករដ្ឋមន្ត្រី ហ៊ុន សែន បានចាត់ទុកជាការប្រកាសនេះជាចេតនាប៉ុនប៉ងផ្តួលរំលំរដ្ឋាភិបាល និងបានបញ្ជាឱ្យបញ្ចេញទ័ពត្រៀមបង្ក្រាបផងដែរ៕
