រដ្ឋាភិបាលចាត់ទុករបាយការណ៍របស់អ្នករាយការណ៍ពិសេសអង្គការសហប្រជាជាតិស្ដីពីសិទ្ធិមនុស្ស លោកស្រី រ៉ូណា ស្មីត ពីកង្វល់របស់លោកស្រីទៅលើស្ថានការណ៍វិវត្តន៍ចុងក្រោយនៅកម្ពុជា ថាកំពុងបំភ័ន្តមហាជនពីស្ថានភាពពិតនៅកម្ពុជា។
កាលពីម្សិលមិញ អ្នករាយការណ៍ពិសេសអង្គការសហប្រជាជាតិស្ដីពីសិទ្ធិមនុស្ស លោកស្រី រ៉ូណា ស្មីត បានចេញរបាយការណ៍មួយដែលបង្ហាញក្ដីបារម្ភចំពោះការបង្ក្រាបផ្នែកនយោបាយកាន់តែខ្លាំងឡើងៗ រួមទាំងការដាក់ពង្រាយកម្លាំងប្រដាប់អាវុធតាមព្រំដែន និងបានអំពាវនាវដល់រដ្ឋាភិបាលកម្ពុជាឱ្យគោរពឡើងវិញនូវសិទ្ធិសេរីភាពក្នុងការបញ្ចេញមតិ យោបល់ និងការជួបប្រជុំនៅក្នុងប្រទេសខ្លួន។
ក្នុងសេចក្តីប្រកាសព័ត៌មានចុះថ្ងៃទី៨ វិច្ឆិកា ឆ្នាំ២០១៩ ស្ថានបេសកកម្មអចិន្ត្រៃយ៍នៃព្រះរាជាណាចក្រកម្ពុជាប្រចាំ UN នៅទីក្រុងហ្សឺណែវ ប្រទេសស្វីស បានកត់សម្គាល់ថា ការចេញផ្សាយរបស់លោកស្រី រ៉ូណា ស្មីត ថាមានការវាយតម្លៃដែលគ្មានតុល្យភាព និងបង្កឱ្យមានការភ័ន្តច្រលំចំពោះរដ្ឋាភិបាលកម្ពុជា។
ស្ថានបេសកកម្មបានបកស្រាយថា ការចាប់ឃុំខ្លួនមួយចំនួននោះ និងការដាក់ពង្រាយកងកម្លាំងប្រដាប់អាវុធគឺមិនអាចបកស្រាយថាជាការបង្ក្រាបផ្នែកនយោបាយនោះទេ គឺជាការអនុវត្តច្បាប់សុទ្ធសាធដើម្បីរក្សាស្ថិរភាព សន្ដិសុខសង្គម និងប្រជាធិបតេយ្យក្នុងប្រទេស។ ស្ថានបេសកម្មបានយល់ឃើញថា៖
« អាណត្តិរបស់អ្នកសរសេររបាយការណ៍ពិសេសគឺជួយកម្ពុជាក្នុងការលើកស្ទួយ និងការពារសិទ្ធិមនុស្ស តាមរយៈកិច្ចសន្ទនា និងកិច្ចសហប្រតិបត្តិការ ពុំមែនចេញផ្សាយព័ត៌មានសាធារណៈណាមួយដែលធ្វើឱ្យសាធារណជនមានការភ័ន្តច្រឡំ និងត្រូវបានគេមើលឃើញថាជាអំពោះជ្រៀតជ្រែកចូលទៅក្នុងយុត្តធិការនៃរដ្ឋអធិបតេយ្យមួយនោះទេ » ។
ក្រោយការប្រកាសរបស់លោក សម រង្ស៊ី ថាលោកនឹងចូលស្រុកនាថ្ងៃទី៩ វិច្ឆិកានេះ ដោយអំពាវនាវឱ្យកងកម្លាំងប្រដាប់អាវុធ និងប្រជាពលរដ្ឋទូទៅឱ្យចូលរួមទទួលស្វាគមន៍ដំណើរវិលត្រឡប់មកវិញនេះ រដ្ឋាភិបាលលោក ហ៊ុន សែន ចាប់ផ្ដើមមានវិធានការជាបន្តបន្ទាប់លើអ្នកគាំទ្រលោក សម រង្ស៊ី និងត្រៀមកម្លាំងចាំបង្ក្រាបផងដែរ។
តាមការបញ្ជាក់របស់អ្នកនាំពាក្យអគ្គស្នងការនគរបាលជាតិ លោក ឆាយ គឹមខឿន ឲ្យដឹងថា គិតត្រឹមថ្ងៃម្សិលមិញ អ្នកដែលត្រូវចាប់ខ្លួនពីបទ “រួមគំនិតក្បត់” មានចំនួន៦៤នាក់ មានដីកាតាមចាប់ខ្លួន៩១នាក់ទៀត និងចេញមុខសារភាព៤១១នាក់។
កាលពីម្សិលមិញ អគ្គលេខាធិការ UN លោក អង់តូនីញូ ហ្គុយតេរេស តាមរយៈអង្គការសិទ្ធិមនុស្សសហប្រជាជាតិប្រចាំកម្ពុជា ឱ្យដឹងថា លោកកំពុងតាមដានស្ថានភាពវិវឌ្ឍន៍នៅកម្ពុជា ទាក់ទងនឹងការប្រកាសវិលត្រឡប់មកវិញរបស់លោក សម រង្ស៊ី ដោយបង្ហាញក្តីបារម្ភចំពោះវិធានការរឹតត្បិតរបស់អាជ្ញាធរទៅលើសេរីភាពក្នុងការធ្វើដំណើរ ការជួបប្រជុំ និងការដាក់ពង្រាយកម្លាំងយោធានៅតាមបន្ទាត់ព្រំដែនជាប់ជាមួយប្រទេសថៃ។
ក្នុងនោះ លោក អង់តូនីញូ ហ្គុយតេរេស ក៏បានរម្លឹកពីភាពចាំបាច់នៃការចរចាដោយសន្ដិវិធីនៅកម្ពុជាបច្ចុប្បន្ន ដែលនឹងបង្កឱ្យមានបរិយាកាសនយោបាយអំណោយផលមួយដល់ជាតិផងដែរ៕
