លោកនាយករដ្ឋមន្ត្រី ហ៊ុន សែន នៅថ្ងៃបុណ្យឯករាជ្យជាតិនេះបានអំពាវនាវឱ្យពលរដ្ឋខ្មែររួមគ្នាបន្តរក្សាការពារស្ថិរភាពជាតិបច្ចុប្បន្ន ខណៈលោក សម រង្ស៊ី ថ្លែងឱ្យពលរដ្ឋមានការតាំងចិត្តខ្ពស់ជាមួយលោកក្នុងការផ្លាស់ប្ដូរ។
លោកនាយករដ្ឋមន្ត្រី ហ៊ុន សែន បានសរសេរនៅលើទំព័រហ្វេសបុករបស់លោកថា ថ្ងៃទី៩ វិច្ឆិកានេះជាថ្ងៃប្រវត្តិសាស្ត្ររបស់កម្ពុជាដែលបានទទួលឯករាជ្យពីបារាំង ដែលជាថ្ងៃរីករាយចំពោះមោទនភាពជាតិ ដោយមិនត្រូវឱ្យមានអ្វីមករំខានដល់សេចក្តីសុខ និងសន្ដិភាពរបស់កម្ពុជាតទៅទៀតឡើយ។ លោកសរសេរថា៖
« ខ្ញុំសូមអរគុណដល់បងប្អូនរួមជាតិដែលបានចូលរួមថែរក្សាការពារសន្តិភាពសម្រាប់ប្រទេសយើងមកទល់សព្វថ្ងៃ។ ដើម្បីអបអរសាទរនៅក្នុងខួប៦៦ឆ្នាំនៃទិវាបុណ្យឯករាជ្យជាតិលើកទី៦៦ និងខួបនៃការបង្កើតកងយោធពលខេមរភូមិន្ទ ខ្ញុំសូមអញ្ជើញបងប្អូនទាំងក្នុង និងក្រៅប្រទេសទទួលទានអំបុកដែលជានំចំណីអត្តសញ្ញាណជាតិខ្មែរយើង នៅក្រោមពាក្យស្លោក “ អំបុកខ្មែរថែរជាតិ សាសនា និងព្រះមហាក្សត្រ” » ។
ខុសពីលោកនាយករដ្ឋមន្ត្រី គូបដិបក្ខរបស់លោកគឺលោក សម រង្ស៊ី នៅថ្ងៃនេះក៏បានចេញវីដេអូឃ្លីបខ្លីមួយដែរដោយប្រកាសពីជំហររបស់លោកក្នុងការនាំពលរដ្ឋឈរតវ៉ាប្រឆាំងរដ្ឋអំណាចរបស់លោក ហ៊ុន សែន នាថ្ងៃបុណ្យឯករាជ្យនេះ ដែលលោកថានឹងនាំមកនូវប្រជាធិបតេយ្យ និងការផ្លាស់ប្ដូរវិជ្ជមាននៅកម្ពុជា។ លោកថា៖
« សុំបងប្អូនជឿជាក់ចុះ ការខិតខំប្រឹងប្រែង ការលះបង់របស់ថ្នាក់ដឹកនាំគណបក្សសង្គ្រោះជាតិមានទាំងរូបខ្ញុំ សម រង្ស៊ី ផងដែរ គឺនៅមានការតាំងចិត្តខ្ពស់មិនចុះថយឡើយ ផ្ទុយទៅវិញគឺកាន់តែខ្លាំងឡើងៗ ដើម្បីនាំមកការផ្លាស់ប្ដូរតាមបែបប្រជាធិបតេយ្យ ការផ្លាស់ប្ដូរជាវិជ្ជមានដែលយើងចង់បានទាំងអស់គ្នា » ។
ក្នុងទិវាបុណ្យឯករាជ្យនៅឆ្នាំនេះ មិនទាន់ឃើញសារនយោបាយពីអ្នកនយោបាយលេចធ្លោមួយទៀតគឺលោក កឹម សុខា នៅឡើយទេ ខណៈលោកត្រូវបានរដ្ឋាភិបាលចាប់ឃុំខ្លួនជាង២ឆ្នាំមកហើយនោះ។
ក្រោយរដ្ឋាភិបាលកម្ពុជាចាប់ខ្លួនលោក កឹម សុខា និងរំលាយបក្សប្រឆាំងនាឆ្នាំ២០១៧ ជាមួយការប្រកាសចូលស្រុករបស់លោក សម រង្ស៊ី នៅថ្ងៃទី៩ ខែវិច្ឆិកា ហើយលោក ហ៊ុន សែន ប្រកាសបង្ក្រាបនោះ វាកាន់តែធ្វើឱ្យស្ថានភាពនយោបាយដែលកំពុងប្រះស្រាំស្រាប់កាន់តែធ្ងន់ធ្ងរឡើង។
អគ្គលេខាធិការសហប្រជាជាតិ លោក អង់តូនីញូ ហ្គុយតេរេស កាលពីម្សិលមិញបានរម្លឹកអ្នកនយោបាយខ្មែរពីភាពចាំបាច់នៃការចរចាដោយសន្ដិវិធីមួយនៅកម្ពុជា ដែលវានឹងបង្កឱ្យមានបរិយាកាសនយោបាយអំណោយផលមួយដល់ជាតិឡើងវិញ៕