មេដឹកនាំអតីតបក្សប្រឆាំង លោក កឹម សុខា បានលើកឡើងថា លោកនឹងបន្តទាមទារសេរីភាពពេញលេញរបស់លោកត្រឡប់មកវិញ ហើយនឹងចុះជួបប្រជាពលរដ្ឋក្នុងពេលឆាប់ៗខាងមុខនេះ បន្ទាប់ពីរូបលោកត្រូវបានដោះលែងឱ្យរួចផុតពីការឃុំខ្លួនក្នុងផ្ទះ។ នេះបើតាមសារដែលត្រូវបានផុសនៅលើទំព័រហ្វេសប៊ុកផ្លូវការរបស់លោកនៅរសៀលថ្ងៃនេះ។
សាលាដំបូងរាជធានីភ្នំពេញ បានសម្រេចឱ្យលោក កឹម សុខា ប្រធានគណបក្សសង្គ្រោះជាតិដែលត្រូវបានតុលាការកំពូលសម្រេចរំលាយចោលនោះ អាចធ្វើដំណើរចាកចេញពីបរិវេណគេហដ្ឋានរបស់គាត់ ប៉ុន្តែ មិនអនុញ្ញាតឱ្យលោកចាកចេញផុតពីព្រំដែនកម្ពុជា និងហាមធ្វើសកម្មភាពនយោបាយ។
ទំព័រហ្វេសប៊ុកផ្លូវការរបស់លោក បានបង្ហោះសារនៅរសៀលថ្ងៃនេះថា លោកនឹងបន្តទាមទារឱ្យមានការទម្លាក់ចោលបទចោទប្រកាន់ទៅលើរូបលោក បន្ទាប់ពីលោកត្រូវបានឃុំខ្លួនអស់រយៈពេល ២ឆ្នាំ។ទំព័រហ្វេសប៊ុកលោក កឹម សុខា រៀបរាប់ថា៖
«ខ្ញុំរំពឹងថា សេចក្ដីសម្រេចក្នុងថ្ងៃនេះ គឺជាជំហានទី១ ប៉ុន្តែ រូបខ្ញុំក៏ដូចជាពលរដ្ឋខ្មែរដទៃទៀតដែលបានបាត់បង់សិទ្ធិសេរីភាពនយោបាយ នៅតែត្រូវការដំណោះស្រាយ និងយុត្តិធម៌ពិតប្រាកដ»។
លោក ផែង ហេង មេធាវីមួយរូបក្នុងចំណោមក្រុមមេធាវីការពារក្ដីឱ្យលោក កឹម សុខា បានបញ្ជាក់ថា សារនៅលើទំព័រហ្វេសប៊ុកនោះ ត្រូវបានផុស បន្ទាប់ពីការអនុញ្ញាតពីលោក កឹម សុខា។ ទំព័រហ្វេសប៊ុកដដែលនេះ រៀបរាប់បន្តថា៖
«ខ្ញុំសូមផ្ញើសេចក្ដីនឹករលឹកយ៉ាងខ្លាំងដល់ប្រជាពលរដ្ឋខ្មែរ ហើយខ្ញុំនឹងទៅជម្រាបសួរសុខទុក្ខបងប្អូនប្រជាពលរដ្ឋនាពេលដ៏ខ្លីខាងមុខនេះ»។
លោក ផែង ហេង បានប្រាប់ថា ដំណើរចុះជួបប្រជាពលរដ្ឋជាលើកដំបូងរបស់លោក កឹម សុខា ក្រោយពីត្រូវបានដោះលែងឱ្យរួចផុតពីការឃុំខ្លួនក្នុងផ្ទះនោះ នឹងត្រូវជូនដំណឹងនៅពេលក្រោយ។
លោក កឹម សុខា ត្រូវបានសមត្ថកិច្ចរបស់រដ្ឋាភិបាលចាប់ខ្លួនទាំងយប់កាលពីឆ្នាំ២០១៧កន្លងមក ហើយបញ្ជូនទៅឃុំខ្លួននៅឯពន្ធនាគារត្រពាំងផ្លុង ស្ថិតក្នុងខេត្តត្បូងឃ្មុំ នៅជិតព្រំដែនកម្ពុជា-វៀតណាម រហូតដល់លោកត្រូវបានបញ្ជូនមកដាក់ឃុំខ្លួននៅក្នុងផ្ទះកាលពីខែកញ្ញា ឆ្នាំ២០១៨៕