ប្រធានអតីតគណបក្សសង្គ្រោះជាតិ លោក កឹម សុខា បានថ្លែងសុំទោសទៅដល់សាធារណជនចំពោះការបដិសេធផ្ដល់បទសម្ភាសន៍ជាមួយសារព័ត៌មាន ដោយថា ការដាក់លក្ខខណ្ឌរបស់តុលាការធ្វើឱ្យលោកពិបាកក្នុងការនិយាយស្ដី។
ថ្លែងជាលើកដំបូងបន្ទាប់ពីជាប់ឃុំខ្លួនជាង ២ឆ្នាំនៅក្នុងពន្ធនាគារត្រពាំងផ្លុង និងផ្ទះរបស់លោក នៅរសៀលនេះ លោក កឹម សុខា ប្រាប់ថា ដោយសារការកំណត់របស់តុលាការដែលហាមឃាត់ការធ្វើនយោបាយរបស់លោក បានធ្វើឱ្យលោកពិបាកជាខ្លាំងក្នុងការនិយាយជាមួយសាធារណជន។ លោក កឹម សុខា ថ្លែងថា៖
«ទម្លាប់ខ្ញុំៗចូលចិត្តអ្នកសារព័ត៌មាន ខ្ញុំចូលចិត្តជួបប្រជាពលរដ្ឋ តែជាអកុសលគួរឱ្យសោកស្ដាយ ដោយសារគេហាមខ្ញុំមិនឱ្យធ្វើតាមនយោបាយ មិនឱ្យនិយាយពីរឿងនយោបាយ ហើយខ្ញុំមិនដឹងភាសាអីមិនមែនជារឿងនយោបាយទេ ខ្ញុំមិនទាន់ដឹងទេ ព្រោះថា កាលណាយើងនិយាយទៅ គេអាចថា គេកំណត់ប៉ុណ្ណា ដល់អញ្ចឹងខ្ញុំមិនទាន់ច្បាស់ ហើយខ្ញុំសុំអធ្យាស្រ័យពីអ្នកសារព័ត៌មានទាំងអស់ ដែលខ្ញុំមិនអាចនិយាយឆ្លើយឆ្លងគ្នាបាន ដោយមានការហាមឃាត់ខ្ញុំ ដីការកាលពីម្សិលមិញហ្នឹង»។
ឯកអគ្គទូតអាមេរិក លោក W. Patrick Murphy ដែលបានជួបជាមួយលោក កឹម សុខា នៅរសៀលនេះ បានថ្លែងថា លោកមើលឃើញថា លោក កឹម សុខា គឺមនុស្សសន្តិភាព ចិត្តល្អ និងជាមេដឹកនាំមានបទពិសោធន៍ ហើយលោកសោកស្ដាយដែលសេរីភាពរបស់លោកត្រូវបានហាមឃាត់នៅក្នុងរយៈពេល ២ឆ្នាំមកនេះ។
អគ្គរដ្ឋទូតអាមេរិករូបនេះដែលទើបតែចូលកាន់តំណែងការទូតនេះកាលពីខែសីហាកន្លងមកនោះ បានជំរុញទៅរដ្ឋាភិបាលកម្ពុជាឱ្យផ្ដល់សេរីភាពពេញលេញដល់លោក កឹម សុខា និងអ្នកនយោបាយដទៃទៀត ដែលត្រូវបានចាប់ខ្លួន និងចោទប្រកាន់ថា បានចូលរួមក្នុងសកម្មភាពដែលរដ្ឋាភិបាលចោទថា «ក្បត់ជាតិ» ឬ «ផ្ដួលរំលំរដ្ឋាភិបាល»។ លោក Patrick Murphy មានប្រសាសន៍ថា៖
«ជាការឱ្យយោបល់ក្នុងនាមជាមិត្តមួយ កម្ពុជាគួរតែរកមធ្យោបាយក្នុងការធ្វើឱ្យលោក កឹម សុខា មានសេរីភាពវិញទាំងស្រុង ដោយទម្លាក់ចោលការចោទប្រកាន់លើគាត់ ក៏ដូចជាអ្នកដទៃទៀតដែលសេរីភាពរបស់ពួកគេត្រូវបានហាមឃាត់។ យើងចង់ឱ្យពួកគេមានសេរីភាព និងអនុញ្ញាតឱ្យដើរហើរទាំងក្នុង និងក្រៅប្រទេស ក្នុងការធ្វើទំនាក់ទំនង ដូច្នេះសំឡេងរបស់ពួកគេនឹងត្រូវបានពិភពលោកបានឮ»។
មេដឹកនាំបក្សប្រឆាំង លោក កឹម សុខា ត្រូវបានដោះលែងឱ្យនៅក្រៅឃុំ ប៉ុន្តែ ជាប់លក្ខខណ្ឌមួយចំនួនដែលរួមមាន មិនអនុញ្ញាតឱ្យលោកចាកចេញពីប្រទេស ហាមឃាត់ការធ្វើនយោបាយ និងត្រូវឆ្លើយតបនឹងការកោះហៅគ្រប់សមត្ថកិច្ច។
លោក កឹម សុខា អាយុ ៦៦ឆ្នាំ ត្រូវបានសមត្ថកិច្ចចាប់ខ្លួនកាលពីដើមខែកញ្ញា ឆ្នាំ២០១៧ ហើយត្រូវបានបញ្ជូនទៅឃុំខ្លួននៅឯពន្ធនាគារត្រពាំងផ្លុង ស្ថិតនៅជិតព្រំដែនកម្ពុជា-វៀតណាម មុននឹងលោកត្រូវបានដាក់ឱ្យស្ថិតនៅក្រោមការឃុំខ្លួនក្នុងផ្ទះ៕
