ប្រធានខុទ្ទកាល័យរបស់លោក កឹម សុខា បានថ្លែងថា មេដឹកនាំអតីតបក្សប្រឆាំងរូបនេះ និងអគ្គរដ្ឋទូតបារាំងប្រចាំកម្ពុជា បានផ្លាស់ប្ដូរទស្សនៈខ្លះៗអំពីការធ្វើដំណើរឆ្ពោះទៅរកការកសាងប្រជាធិបតេយ្យនៅកម្ពុជា បន្ទាប់ពីរូបលោកត្រូវបានដោះលែងឱ្យមានសេរីភាពឡើងវិញនោះ។
ប្រធានគណបក្សសង្គ្រោះជាតិ លោក កឹម សុខា វ័យ ៦៦ឆ្នាំ ត្រូវបានសាលាដំបូងរាជធានីភ្នំពេញសម្រេចកាលពីថ្ងៃម្សិលមិញនេះ អនុញ្ញាតឱ្យមានសេរីភាពក្នុងការធ្វើដំណើរ និងចាកចេញពីគេហដ្ឋានរបស់លោកហើយ ប៉ុន្តែ មិនអនុញ្ញាតឱ្យលោកធ្វើដំណើរទៅក្រៅប្រទេស និងធ្វើសកម្មភាពនយោបាយនោះឡើយ។
មួយថ្ងៃក្រោយពីត្រូវបានដោះលែង មេដឹកនាំអតីតបក្សប្រឆាំងរូបនេះ បានជជែកជាមួយអ្នកស្រី Eva Nguyen Binh អគ្គរដ្ឋទូតបារាំងប្រចាំនៅកម្ពុជា នៅម៉ោងខ្ទង់ ១០កន្លះព្រឹក នៅឯគេហដ្ឋានរបស់លោក នៅថ្ងៃទី១១ ខែវិច្ឆិកានេះ។
នេះគឺជាជំនួបលើកដំបូងរបស់លោក កឹម សុខា ជាមួយមន្ត្រីការទូតបរទេសប្រចាំនៅកម្ពុជា មួយថ្ងៃក្រោយពីរូបលោកត្រូវបានអនុញ្ញាតឱ្យមានសេរីភាពធ្វើដំណើរលើសពីព្រំប្រទល់ដែលត្រូវបានកំណត់ដោយតុលាការកាលពីឆ្នាំ២០១៨កន្លងមក។
ថ្លែងទៅកាន់ក្រុមអ្នកសារព័ត៌មានដែលប្រមូលផ្ដុំនៅផ្ទះលោក កឹម សុខា ក្រោយជំនួបជាមួយអ្នកស្រី Eva Nguyen Binh កាលពីពេលព្រឹកនោះ ប្រធានខុទ្ទកាល័យរបស់លោក កឹម សុខា គឺលោក មុត ចន្ថា ប្រាប់ថា អគ្គរដ្ឋទូតបារាំងរូបនេះ បានគ្រាន់តែជួបសួរសុខទុក្ខលោក កឹម សុខា ធម្មតាៗតែប៉ុណ្ណោះ។ ប៉ុន្តែ លោក មុត ចន្ថា បានថ្លែងជាភាសាអង់គ្លេសទៅកាន់អ្នកសារព័ត៌មានបរទេសម្នាក់ថា៖
«ការពិត យើងគ្រាន់តែជជែកអំពីការសួរសុខទុក្ខ ជជែកអំពីសុខភាពរបស់គាត់ [កឹម សុខា] ស្ថានភាពផ្ទាល់ខ្លួន និងផ្លាស់ប្ដូរទស្សនៈខ្លះៗពីរបៀបដែលគួរតែការធ្វើដំណើរឆ្ពោះទៅរកការកសាងលទ្ធិប្រជាធិបតេយ្យ»។
លោក កឹម សុខា ត្រូវបានសមត្ថកិច្ចរបស់រដ្ឋាភិបាលចាប់ខ្លួនទាំងយប់កាលពីឆ្នាំ២០១៧កន្លងមក ហើយបញ្ជូនទៅឃុំខ្លួននៅឯពន្ធនាគារត្រពាំងផ្លុង ស្ថិតក្នុងខេត្តត្បូងឃ្មុំ នៅជិតព្រំដែនកម្ពុជា-វៀតណាម រហូតដល់លោកត្រូវបានបញ្ជូនមកដាក់ឃុំខ្លួននៅក្នុងផ្ទះកាលពីខែកញ្ញា ឆ្នាំ២០១៨៕