មន្ត្រីនាំពាក្យតុលាការរាជធានីភ្នំពេញ បានឱ្យដឹងថា អ្នកគាំទ្រអតីតបក្សប្រឆាំង ១០រូប ត្រូវបានតុលាការសម្រេចដោះលែងឱ្យនៅក្រៅឃុំនៅថ្ងៃនេះ។
អ្នកនាំពាក្យសាលាដំបូងរាជធានីភ្នំពេញ លោក អ៊ី រិន្ទ បានប្រាប់វីអូឌីនៅល្ងាចថ្ងៃនេះថា ចៅក្រមស៊ើបសួរសាលាដំបូងរាជធានីភ្នំពេញ បានសម្រេចបង្គាប់ឱ្យដោះលែងមនុស្ស ១០នាក់ ដែលត្រូវបានចាប់ខ្លួនក្រោមការចោទថា បាន«ចូលរួមគំនិតក្បត់»។ លោក អ៊ី រិន្ទ មានប្រសាសន៍ថា៖
«នៅថ្ងៃនេះ ចៅក្រមស៊ើបសួរនៃសាលាដំបូងរាជធានីភ្នំពេញ បានសម្រេចបង្គាប់ឱ្យដោះលែងឱ្យនៅក្រៅឃុំទៅលើអ្នកដែលបានចូលរួមគំនិតក្បត់ គឺមាន ១០នាក់ រហូតដល់ម៉ោងនេះ គឺយើងបានចេញដីកាទៅហើយ ហើយខាងពន្ធនាគារគេអនុវត្ត»។
តុលាការរាជធានីភ្នំពេញ បានសម្រេចបែបនេះ តែប៉ុន្មានម៉ោងប៉ុណ្ណោះក្រោយពីលោកនាយករដ្ឋមន្ត្រី ហ៊ុន សែន បានថ្លែងបញ្ជាឱ្យមានការដោះលែងមនុស្សទាំងឡាយដែលត្រូវបានចាប់ខ្លួនក្រោមការចោទថា បានជាប់ពាក់ព័ន្ធនឹងផែនការវិលត្រឡប់របស់អតីតមេបក្សប្រឆាំង។
ក្រៅពីបញ្ជាឱ្យដោះលែងអ្នកគាំទ្រអតីតបក្សប្រឆាំងដែលត្រូវបានចាប់ខ្លួនហើយនោះ លោក ហ៊ុន សែន ក៏បានបញ្ជាទៅសមត្ថកិច្ចទូទាំងប្រទេសកុំឱ្យចាប់ខ្លួនសកម្មជន ឬអ្នកគាំទ្រអតីតបក្សប្រឆាំង ហើយបើកឱ្យពួកគេវិលត្រឡប់ពីការគេចខ្លួននៅក្រៅប្រទេស ចូលស្រុកវិញដោយគ្មានទុក្ខទោសអ្វីនោះឡើយ។
អគ្គនាយក នៃអគ្គនាយកដ្ឋានពន្ធនាគាររបស់ក្រសួងមហាផ្ទៃ លោក នុត សវនា បានប្រាប់ថា លោកទទួលដំណឹងថា អ្នកគាំទ្រអតីតបក្សប្រឆាំង ៤រូបនៅខេត្តកំពង់ធំ បានដាក់ពាក្យស្នើសុំនៅក្រៅឃុំនៅថ្ងៃនេះ ប៉ុន្តែ សម្រាប់តួលេខនៃការដោះលែងនៅទូទាំងប្រទេស លោកពុំទាន់អាចបញ្ជាក់បាននៅឡើយទេ។ លោក នុត សវនា មានប្រសាសន៍ថា៖
«អូ! អាទូទាំងប្រទេស វាច្រើនដែរ ហើយខាងពន្ធនាគារមួយៗហ្នឹង អត់ទាន់បានរាយការណ៍មក។ គ្រាន់តែដឹងថា នៅកំពង់ធំហ្នឹង មានអ្នកទាំង ៤នាក់ហ្នឹងបានស្នើសុំហើយ។ ចាំមើលខ្ញុំសួរថែមទៀត ប៉ុន្តែ អត់ទាន់មានឃើញអ្នកណារាយការណ៍មក»។
អ្នកនាំពាក្យក្រសួងយុត្តិធម៌ លោក ជិន ម៉ាលីន បានប្រាប់ថា លោកក៏ពុំទាន់មានតួលេខអំពីការដោះលែងសកម្មជន ឬអ្នកគាំទ្រអតីតបក្សប្រឆាំង ដែលត្រូវបានចាប់ខ្លួននៅទូទាំងប្រទេសនៅឡើយទេ ដោយថា ក្រសួងកំពុងប្រមូលទិន្នន័យពីតាមតុលាការនៅតាមបណ្ដាខេត្តនានា។ លោក ជិន ម៉ាលីន មានប្រសាសន៍ថា៖
«ក្រសួងរហូតដល់ពេលនេះ កំពុងធ្វើការជាមួយតុលាការនៅឡើយ ដើម្បីស្រង់ស្ថិតិថា តើប៉ុន្មាននាក់ជាប់ដីកាតាមចាប់ខ្លួន ហើយប៉ុន្មាននាក់ទៀតដែលរងនូវបទចោទ ស្ថិតនៅក្រោមការឃុំខ្លួនបណ្ដោះអាសន្ន។ រហូតមកដល់ពេលនេះ យើងមិនទាន់ធ្វើការបូកសរុបនៅឡើយទេ»។
លោក សំ សុគង់ មេធាវីម្នាក់ក្នុងចំណោមមេធាវីការពារក្តីឱ្យសកម្មជនអតីតបក្សប្រឆាំង បានឱ្យដឹងថា មានសកម្មជនបក្សប្រឆាំង ៣រូប ក្នុងនោះ ២រូបនៅខេត្តកំពត និង ១រូបទៀតនៅខេត្តក្រចេះ ត្រូវបានដោះលែងហើយគិតត្រឹមរសៀលថ្ងៃព្រហស្បតិ៍នេះ ប៉ុន្មានម៉ោងក្រោយបញ្ជារបស់លោកនាយករដ្ឋមន្ត្រី ហ៊ុន សែន។
មេធាវីរូបនេះ ឱ្យដឹងទៀតថា ក្រុមមេធាវីកំពុងរង់ចាំមើលចំណាត់ការរបស់តុលាការនៅតាមបណ្ដាខេត្តដទៃទៀត ជាទីដែលសកម្មជន និងអ្នកគាំទ្របក្សប្រឆាំងត្រូវបានចាប់ខ្លួនដាក់ពន្ធនាគារជាបន្តបន្ទាប់ នៅក្នុងអ្វីដែលរដ្ឋាភិបាលចោទថា បានចូលរួម «គំនិតក្បត់» ឬចូលរួមក្នុងផែនការ«រដ្ឋប្រហារ»។ លោក សំ សុគង់ មានប្រសាសន៍ថា៖
«ការដោះលែងចំពោះសកម្មជនគណបក្សសង្រ្គោះជាតិទាំង ៣រូបខាងលើនេះ គឺតុលាការសម្រេចឱ្យនៅក្រៅឃុំបណ្តោះអាសន្នដោយដាក់លក្ខខណ្ឌមួយចំនួន»។
បើតាមសេចក្ដីថ្លែងការណ៍របស់អង្គការឃ្លាំមើលសិទ្ធិមនុស្សអន្តរជាតិ សកម្មជន និងអ្នកគាំទ្រអតីតគណបក្សសង្គ្រោះជាតិជាង ៨០នាក់ ត្រូវបានចាប់ខ្លួន និងចោទប្រកាន់ថា បានចូលរួម«គំនិតក្បត់» នៅក្នុងផែនការវិលត្រឡប់ចូលប្រទេសកម្ពុជាវិញរបស់លោក សម រង្ស៊ី ដែលប្រកាសខ្លួនឯងថា ជាប្រធានស្ដីទីនៃគណបក្សនេះ៕