រដ្ឋាភិបាលកម្ពុជាគ្រោងចុះបញ្ជីអត្ដសញ្ញាណជនពិការឱ្យចប់នៅឆ្នាំ២០២១ ដោយថា ដើម្បីងាយស្រួលក្នុងការរៀបចំគោលនយោបាយជួយដល់ជនពិការឱ្យបានត្រឹមត្រូវ។
ថ្លែងក្នុងសិក្ខាសាលាផ្សព្វផ្សាយស្ដីពី ផែនការមេអាស៊ាន២០២៥ «ការបញ្ជ្រាបសិទ្ធិជនមានពិការភាព» នៅព្រឹកនេះ ប្រធាននាយកដ្ឋានសុខុមាលភាពជនពិការ លោក យៀប ម៉ាលីណូ បានថ្លែងថា នៅថ្ងៃទី៩ ខែធ្នូ ខាងមុខក្រសួងសង្គមកិច្ច និងក្រសួងផែនការ តាមរយៈជំនួយពីអង្គការ UNICIEF និង GIZ នឹងផ្ដល់ Tablet ទៅកាន់គ្រប់ឃុំទាំងអស់នៅកម្ពុជា ដើម្បីឱ្យរដ្ឋបាលឃុំបញ្ចូលទិន្និន័យ ក្នុងនោះក៏មានបញ្ជូលពីទិន្នន័យជនពិការក្នុងឃុំនីមួយៗផងដែរ។
លោកបន្ថែមថា៖ «នៅពេលដែលយើងធ្វើអត្តសញ្ញាណកម្មគាត់ហើយ យើងអាចនឹងឈានដល់ការអនុវត្តកម្មវិធីអ្វីក៏បានដែរ។ ព្រោះយើងអាចដឹងថា ជនពិការនៅទីណា? ជនពិការកំពុងធ្វើអ្វី? ហើយតើយើងគួរធ្វើអ្វីជាមួយពួកគាត់? តម្រូវការរបស់ពួកគាត់ត្រូវបានយើងសិក្សារួចរាល់»។
លោកបានបន្ថែមថា បច្ចុប្បន្ន រដ្ឋាភិបាលកំពុងបណ្ដុះបណ្ដាលមន្ត្រីឃុំ-សង្កាត់ ក្នុងការបញ្ចូលទិន្នន័យទាំងនេះដោយរំពឹងថា នឹងអាចបញ្ចប់ការចុះអត្តសញ្ញាណជនពិការនៅកម្ពុជាយ៉ាងយូរត្រឹមឆ្នាំ២០២១ខាងមុខ។
ប្រធានអង្គការជនពិការកម្ពុជា លោក ងិន សៅរ័ត្ន មានប្រសាសន៍ថា គាំទ្រចំពោះជំហានថ្មីនេះ តែលោកបង្ហាញក្ដីបារម្ភពីកង្វះសម្ភារជាមួយនឹងការឱ្យនិយមន័យពិការភាពក្នុងការចុះបញ្ជីអត្តសញ្ញាណកម្មនេះដែលថាអាចនឹងប៉ះពាល់ដល់ចំនួន និងសិទ្ធិរបស់ជនពិការផងដែរ។
លោក ងិន សៅរ័ត្ន មានប្រសាសន៍ថា៖ «ប្រសិនជា Tablet ហ្នឹងចែកមិនគ្រប់គ្រាន់ មានន័យថា ចំនួនជនពិការក៏រកមិនទាន់គ្រប់គ្រាន់ដែរ។ ហើយចំណុចទី២ គឺយើងចង់ឱ្យមានការពន្យល់ច្បាស់លាស់អំពីនិយមន័យពិការភាព និងភាពពិការភាព ថាតើនិយមន័យពិការភាព និងសំណួរដែលគាត់ដាក់ (ក្នុងការស្រង់ទិន្និន័យ) ហ្នឹង តើវាស្របជាមួយអនុសញ្ញាសិទ្ធិជនពិការដែរឬអត់? ប្រសិនជាយើងផ្ដោតលើការពិការតាមន័យសុខាភិបាល អាហ្នឹងអាចនឹងតិចហើយ តែបើយើងផ្ដោតលើសិទ្ធិជាមូលដ្ឋានចំនួនជនពិការអាចនឹងកើនឡើងផងដែរ»។
អាស៊ានមានផែនការមេមួយ ស្ដីពីសិទ្ធិជនពិការដែលផែនការនេះមានបំណងបញ្ជ្រាបពីសិទ្ធិជនពិការចូលក្នុងគោលនយោបាយប្រទេសក្នុងតំបន់ទាំងអស់ ដែលនឹងចាប់អនុវត្តចាប់ពីឆ្នាំ២០២១ ដល់ឆ្នាំ២០២៥ ខាងមុខ ដែលរួមមានការផ្ដល់សិទ្ធិដល់ជនពិការ ជំរុញវប្បធម៌សហគ្រិនភាព ត្រូវមាន និងសម្រួលមធ្យោបាយធ្វើដំណើរគ្រប់គ្រាន់ដល់ជនពិការ តំហែទាំសុខភាព កាត់បន្ថយគម្លាតនៃការអភិវឌ្ឍ និងត្រូវផ្ដល់នូវសន្ដិភាព សន្ដិសុខដល់ជនពិការ ជាដើម។
ប្រធានវេទិកាជនពិការអាស៊ាន លោក លឹម ពុយតាក់ (Lim Puay Tiak) មានប្រសាសន៍ថា ការបញ្ជ្រាបសិទ្ធិជនពិការចូលក្នុងគោលនយោបាយ មានសារៈសំខាន់ណាស់ក្នុងការលើកទឹកចិត្តជនពិការក្នុងការរស់នៅរបស់ពួកគេ។
លោកថា៖ «ប្រសិនជាយើងបញ្ជ្រាបឱ្យបានដឹងហើយ ខ្ញុំសង្ឃឹមថា មនុស្សជាច្រើននឹងមានការចូលរួម ហើយជនពិការជាច្រើននឹងដឹងថា ជីវិតរបស់ខ្លួនបានទទួលការគាំទ្រ និងរីកចម្រើនយ៉ាងណាខ្លះ ហើយជីវិតរបស់ខ្លួនមានអត្ថន័យយ៉ាងម៉េចខ្លះ»។
បើតាមក្រសួងសង្គមកិច្ច បច្ចុប្បន្ន ក្រសួងទើបតែចុះបញ្ជីអត្តសញ្ញាណកម្មដល់ជនពិការជាង៦ម៉ឺននាក់ប៉ុណ្ណោះ ខណៈតាមរបាយការណ៍ដែលទទួលបាន មានជនពិការនៅកម្ពុជាមានជាង៣១ម៉ឺននាក់។ គិតត្រឹម៣ឆ្នាំចុងក្រោយ ថវិកាទាំងជាតិ និងអន្តរជាតិដែលត្រូវបានជួយគាំទ្រដល់ជនពិការនៅកម្ពុជាមានជាង១៦០លានដុល្លារអាមេរិក៕