អាជ្ញាធរខេត្តសៀមរាប បានឱ្យដឹងថា យ៉ាងហោចណាស់មនុស្ស ២នាក់ បានស្លាប់ ហើយ ១៣នាក់ផ្សេងទៀត បានរងរបួស ក្រោយសំណង់អគារសាលាឆាន់ក្នុងវត្តគោកចក ស្ថិតក្នុងក្រុងសៀមរាប បានបាក់រលំនៅរសៀលថ្ងៃនេះ។
អ្នកនាំពាក្យសាលាខេត្តសៀមរាប លោក លី សំរិទ្ធ បានប្រាប់វីអូឌីនៅរសៀលថ្ងៃនេះថា ប្រតិបត្តិការរុករកមនុស្សដែលជាប់នៅក្នុងសំណង់អគារសាលាឆាន់ដែលបាក់រលំនោះ បានរកឃើញមនុស្សយ៉ាងហោចណាស់ ១៥នាក់ហើយ ក្នុងនោះមនុស្ស ២នាក់បានស្លាប់។
លោកបន្ថែមថា មនុស្សរងរបួស ១៣នាក់ ត្រូវបានបញ្ជូនទៅសង្គ្រោះនៅឯមន្ទីរពេទ្យបង្អែកខេត្តសៀមរាបហើយមកដល់ម៉ោង ៥កន្លះល្ងាចថ្ងៃនេះ។
លោក លី សំរិទ្ធិ ប្រាប់ថា៖ «រកឃើញចុងក្រោយនេះម៉ោង ៥កន្លះនេះ យើងបានបញ្ជូនទៅមន្ទីរពេទ្យហើយ។ បើតាមការផ្ទៀងផ្ទាត់ យើងបាត់តែម្នាក់ហ្នឹងទេ ហើយឥឡូវរកឃើញហើយ។ ប៉ុន្តែ ទោះបីយ៉ាងម៉េចក៏ដោយ ដោយសារយើងមិនទាន់ច្បាស់ យើងនឹងខំរុករកបន្តទៀត ដោយប្រតិបត្តិការហ្នឹង គឺទី១ ដើម្បីស្តារកន្លែងការដ្ឋាន និងរុករកមនុស្ស»។
បើតាមអ្នកនាំពាក្យរូបនេះ អគារសាលាឆាន់ដែលមានទទឹង ២០ម៉ែត្រ និងបណ្ដោយ ៤០ម៉ែត្រនេះ កំពុងស្ថិតក្រោមដំណើរការសាងសង់អស់រយៈពេល ១ឆ្នាំមកហើយ ហើយលោកថា ត្រូវបានសាងសង់ឡើងដោយខុសបច្ចេកទេស។
កាលពីថ្ងៃទី ២២ ខែមិថុនា សំណង់អគារកម្ពស់ ៧ជាន់ ដែលមានម្ចាស់ជាជនជាតិចិន នៅខេត្តព្រះសីហនុ បានបាក់រលំ បានបណ្ដាលឱ្យកម្មករខ្មែរស្លាប់ចំនួន ២៨នាក់ និងរងរបួសចំនួន ២៦នាក់។
ក្រោយហេតុការណ៍នេះ ប្រមុខរដ្ឋាភិបាលលោកនាយករដ្ឋមន្ត្រីហ៊ុន សែន បានប្រកាសពីការផ្តល់សំណងដល់ជនរងគ្រោះស្លាប់ និងអ្នករងរបួសនូវទឹកប្រាក់ចំនួន ដែលជាទឹកប្រាក់បានមកពីសប្បុរសជន។
ចំណែកជនជាតិចិនចំនួន ៤នាក់ ក្នុងនោះរួមមានម្ចាស់ការដ្ឋានសំណង់ ជាងសំណង់ និងអ្នកមើលការងារក្នុងការដ្ឋាន ត្រូវបានតុលាការខេត្តព្រះសីហនុសម្រេចឃុំខ្លួនកាលពីថ្ងៃទី ២៤មិថុនា ប៉ុន្តែ មកទល់ពេលនេះជនរងគ្រោះ នៅមិនទាន់ទទួលបានយុត្តិធម៌នៅឡើយទេ ក្រៅពីសំណងបានពីរដ្ឋាភិបាលនោះ៕